ده‌رمان ده‌گاته‌ توشبوانى شێرپه‌نجه‌ له‌ موسڵ

نه‌ینه‌وا، هاوڵاتییه‌كی موسڵاوی له‌ كاتی وه‌رگرتنی چاره‌سه‌ری نه‌خۆشی شێرپه‌نجه‌دا فۆتۆ: كه‌ركوك ناو

كه‌ركوك ناو – نه‌ینه‌وا

لایه‌نه‌ ته‌ندروستییه‌كانی نه‌ینه‌وا، دابینكردنی سه‌دا 70ی ده‌رمانی پێویست بۆ توشبوانی شێرپه‌نجه‌ راده‌گه‌یه‌نن، دوای ئه‌وه‌ی به‌ ده‌ست نه‌بونی ده‌رمان و خزمه‌تگوزارییه‌ پزیشیكییه‌كانیشه‌وه‌ دیانناڵاند.

توشبوانی شێرپه‌نجه‌ له‌ موسڵ، پێشتر و له‌ رێی راپۆرتێكی (كه‌ركوك ناو)ه‌وه‌، داوای ده‌رمان و خزمه‌تگوزاری تری پزیشكییان كرد.

به‌پێی ئاماری لایه‌نه‌ ته‌ندروستییه‌كان، له‌ ئێستادا ئاستی دابینكردنی ده‌رمانی ئه‌و نه‌خۆشییه‌ گه‌یشتۆته‌ سه‌دا 70.

نه‌خۆشخانه‌ی تایبه‌ت شێرپه‌نجه‌ و چاره‌سه‌ری كیمیایی، كه‌ له‌ به‌ری راستی موسڵ بوو، یه‌كێك بوو له‌ پرۆژه‌ تایبمه‌تمه‌نده‌كانی ئه‌و بواره‌ له‌ عیراق و ناوچه‌ی عه‌ره‌بیدا، سێ جۆر خزمه‌تگوزاری پزیشكی هه‌بوو، له‌وانه‌ چاره‌سه‌ر به‌ كه‌وی و كیمیایی.

له‌ هێرشه‌كانی داعش و شه‌ڕی ئه‌و رێكخراوه‌دا، دوو به‌شی نه‌خۆشخانه‌ به‌ رێژه‌ی سه‌دا 100 زیانیان به‌ركه‌وت.

عه‌بدولقادر سالم، به‌ڕێوه‌به‌ری نه‌خۆشخانه‌كه‌ به‌ (كه‌ركوك ناو)ی وت "نۆژه‌نكردنه‌وه‌ و جارێكیتر كردنه‌وه‌ی نه‌خۆشخانه‌ی چاره‌سه‌ری گرێ شێرپه‌نجه‌ییه‌كان له‌ به‌ری راستی موسڵ سێ ساڵ كاتی ده‌وێت و كاركردنیش تێیدا به‌رده‌وامه‌".

به‌پێی ئاماره‌كانی ته‌ندروستی نه‌ینه‌وا، له‌ 2019دا، سێیه‌كی نه‌خۆشییه‌ شێرپه‌نجه‌ییه‌ تۆماركراوه‌كان له‌ پارێزگاكه‌دا، شێرپه‌نجه‌ی مه‌مكه‌ كه‌ به‌ گشتی توشی ژنان ده‌بێت، به‌دوای ئه‌ودا شێرپه‌نجه‌ی سییه‌كان و كۆئه‌ندامی هه‌ناسه‌یه‌، به‌ڵام له‌ منداڵدا حاڵه‌ته‌كانی لوكیمیا و مێشك و گرێی غوده‌ هه‌یه‌.

"ناوه‌ندی جێگره‌وه‌ی چاره‌سه‌ری شێرپه‌نجه‌ له‌ گه‌ڕه‌كی وه‌حده‌ی به‌ری چه‌پی موسڵ، ئاستی جێبه‌جێكردنی گه‌یشتۆته‌ سه‌دا 90، دوای مانگ و نیوێك ده‌كرێته‌وه، بۆیه‌ ئه‌وكات له‌ نه‌خۆشخانه‌ی ئیبن ئه‌سیر نامێنین" به‌وته‌ی عه‌بدولقادر.

له‌ ئه‌یلولی 2018دا، ته‌ندروستی نه‌ینه‌وا به‌شێكی جێگره‌وه‌ی 40 قه‌ره‌وێڵه‌یی بۆ‌ نه‌خۆشییه‌كانی شێرپه‌نجه‌ و چاره‌سه‌ری كیمیایی له‌ نه‌خۆشخانه‌ی ئیبن ئه‌سیری فێركاری كرده‌وه‌.

له‌ شاری موسڵ، به‌پێی بۆچونی پزیشكانی پسپۆڕ؛ ترس و ده‌نگی ته‌قینه‌وه‌ و پاشماوه‌كانی جه‌نگ، له‌گه‌ڵ كه‌شوهه‌وا هۆكار بون بۆ زیاتربونی توشبوان به‌ نه‌خۆشییه‌كانی شێرپه‌نجه‌.

  • FB
  • Instagram
  • Twitter
  • YT