به‌شه‌ نه‌وتی مانگانه‌ی خه‌ڵكی موسڵ زیادده‌كرێت

نه‌ینه‌وا، ئۆتۆمبێلێكی بارهه‌ڵگر نه‌وتی سپی ده‌فرۆشێت كه‌ هه‌ر به‌رمیلێكی 200 لیتری به‌ زیاتر له‌ 100 هه‌زار دیناره‌ فۆتۆ: كه‌ركوك ناو

كه‌ركوك ناو – نه‌ینه‌وا

هه‌ر خێزانێكی شاری موسڵ، له‌مه‌ودوا مانگانه‌ 100 لیتر نه‌وتی حكومی پێده‌درێت، كه‌ پێشتر به‌هۆی كه‌مكردنه‌وه‌ی بۆ 50 لیتر ناڕه‌زایی خه‌ڵكی لێكه‌وته‌وه‌.

له‌ پارێزگاكانی عیراق، له‌گه‌ڵ نزیكبونه‌وه‌ی وه‌رزی زستان دابه‌شكردنی نه‌وتی حكومی به‌سه‌ر هاوڵاتیاندا ده‌ستپێده‌كات و چه‌ند مانگێك به‌رده‌وامی ده‌بێت، ئه‌وه‌ش به‌ كۆبۆن و له‌ به‌رانبه‌ر بڕه‌ پاره‌یه‌كی دیاریكراودا.

فه‌لاح مه‌ندیل، به‌ڕێوه‌به‌ری لقی نه‌ینه‌وای دابه‌شكردنی به‌رهه‌مه‌ نه‌وتییه‌كان بۆ (كه‌ركوك ناو) رونیكرده‌وه‌، دابه‌شكردنی نه‌وت به‌پێی كۆبۆنی ژماره‌ پێنج ده‌ستیپێكردووه‌، كه‌ 100 لیتره‌ بۆ هه‌ر خێزانێك و به‌بڕی 15 هه‌زار دینار.

دابه‌شكردنی نه‌وت، له‌ وێستگه‌ حكومیی و ئه‌هلییه‌كانیشدا هه‌یه‌، بۆیه‌ مه‌ندیل داوای له‌ خه‌ڵك كرد، زوو به‌شه‌ نه‌وتی خۆیان وه‌ربگرن.

پێشتر به‌شه‌ نه‌وتی مانگانه‌ی خه‌ڵكی موسڵ بۆ 50 لیتر كه‌مكرایه‌وه‌، ئه‌وه‌ش ناڕه‌زایی لێكه‌وته‌وه‌، به‌وپێیه‌ی به‌شێكی زۆر له‌ دانیشتوانه‌كه‌ی زیانلێكه‌وتوی شه‌ڕ بون و له‌ توانایاندا نییه‌ له‌ بازاڕی ره‌شدا نه‌وت و سوته‌مه‌نی به‌ گرانتر بكڕن.

musll
نه‌ینه‌وا، وێرانكارییه‌كانی شه‌ڕی داعش له‌ شاری كۆنی موسڵ له‌ به‌ری راست فۆتۆ: كه‌ركوك ناو

"50 لیتری مانگانه‌ زۆر كه‌م بوو بۆ خێزانێكی موسڵاوی، چونكه‌ زۆرینه‌ هێشتا له‌ خانووی نیمچه‌ روخاودا ده‌ژین و بارودۆخی دارایی خه‌ڵك خراپه‌، بۆیه‌ ته‌نیا پشت به‌و به‌شه‌ نه‌وته‌ی حكومه‌ت ده‌به‌ستن بۆ چێشلێنان و گه‌رمكردنه‌وه‌ی ماڵ" عه‌بدولره‌حمان عاسم، هاوڵاتی دانیشتوی موسڵ وای وت.

ئه‌و هاوڵاتییه‌ داواده‌كات بارودۆخی خه‌ڵكی موسڵ له‌ به‌رچاو بگیرێت، به‌ تایبه‌ت له‌ بڕیار و رێكاره‌كاندا، چونكه‌ ئێستاش كه‌ نه‌وته‌كه‌ بۆته‌ 100 لیتر له‌ مانگێكدا هێشتا پێداویستییه‌كان پڕناكاته‌وه‌، به‌ڵام هه‌ر باشتره‌ له‌ 50 لیتر.

 پارێزگای نه‌ینه‌وا، هاوشێوه‌ی به‌شێك له‌ ناوچه‌كانی تری عیراق ده‌وڵه‌مه‌نده‌ به‌ نه‌وت و له‌ هێرشه‌كانی داعش بۆ سنوره‌كه‌، زیانی زۆر به‌ر ئه‌و كه‌رته‌ كه‌وت و له‌ ئێستادا حكومه‌ت هه‌وڵی جارێكیتر بوژانه‌وه‌ی ده‌دات.

حه‌مزه‌ كه‌لاوی، شاره‌زای بواری نه‌وت پێیوایه‌ بنیاتنانی پاڵێوگه‌یه‌ك له‌ نه‌ینه‌وا ده‌بێته‌ چاره‌سه‌ری قه‌یرانی سوته‌مه‌نی، بۆ (كه‌ركوك ناو) وتی "نه‌ینه‌وا به‌ ده‌ست قه‌یرانی سوته‌مه‌نییه‌وه‌ ده‌ناڵێنێت و پێموایه‌ به‌ ئه‌نقه‌ستیش چاره‌سه‌ری ئه‌و كێشه‌یه‌ ناكرێت، بۆیه‌ پێویسته‌ په‌رله‌مانتاران لیژنه‌یه‌ك پێكبهێنن و ئه‌و كێشه‌یه‌ یه‌كلاییبكه‌نه‌وه‌".

پرۆژه‌ی بنیاتنانی پاڵێوگه‌ی نه‌وتی گه‌یاره‌، له‌ قۆناغی یه‌كه‌میدایه‌، كه‌ له‌گه‌ڵ به‌گه‌ڕخستنیدا سوته‌مه‌نی له‌ نه‌وت و به‌نزین به‌رهه‌مده‌هێنێت له‌گه‌ڵ گاز بۆ وێستگه‌كانی كاره‌با.

جگه‌ له‌ گه‌یاره‌، چه‌ند كێڵگه‌یه‌كی تری نه‌وتی گه‌وره‌ له‌ نه‌ینه‌وا هه‌یه‌ له‌وانه‌؛ عه‌ین زاله‌، به‌تمه‌، سه‌فیه‌ كه‌ له‌ سه‌رده‌می حوكمڕانی داعش وه‌ك سه‌رچاوه‌ی دارایی ئه‌و رێكخراوه‌ سودی لێوه‌رده‌گرت و له كاتی هێرشی هێزه‌ عیراقییه‌كانیشدا، ئه‌و رێكخراوه‌ ئاگری له‌ به‌شێكیان به‌ردا به‌ تایبه‌ت گه‌یاره‌

  • FB
  • Instagram
  • Twitter
  • YT