چیرۆكە قێزەونەكە وەك خۆی

January 20, 2015 at 9:47 am

پشێوییەكانی رەوشی ئەمنی‌و ئابوری عیراق وایكردووە، بازرگانیكردن بە ژنانەوە پەرەبستێنێت

 وێنەی دایك‌و دوو لەكچەكانی فۆتۆ: عەلی حاجی


وێنەی دایك‌و دوو لەكچەكانی فۆتۆ: عەلی حاجی

دوای ئەو دەستدرێژییە سێكسییەی كرایە سەر ژنێك بەبەرچاوی كچەكانی‌و هاوسەرەكەیەوە، دەمویست هەرچۆنێك بێت چاوپێكەوتن لەگەڵ ئەو خێزانەدا بكەم، بەڵام ئەو كارە هەروائاسان نەبوو.

كاركردن بۆ رونكردنەوەی راستی روداوەكە، (هەر دەزگایەو بەشێوەیەك بڵاویاندەكردەوە)، بوەهۆی سوربونم لەسەر ئەوەی هەرچۆنێك بێت ئەو كارە ئەنجامبدەم، كە پێموایە ئەوە قێزەونترین روداوی كۆمەڵایەتییە لەژیانی خۆمدا كارم لەسەركردبێت، دوای بینینی ئەو خێزانەش هەروابوو.

رێگرییەكان بۆ چاوپێكەوتنەكە بەشێكیان پەیوەندییان بەدەزگا ئەمنییەكانەوە هەبوو، چونكە لە لێكۆڵینەوەدابون لە روداوەكەو بەشەكەی تری پەیوەندی بەباری دەرونی ئەو خێزانەوە هەبوو، كەبەلایانەوە بینینی كەسێك دوای روداوەكەو قسەكردن بۆ راگەیاندن ئاسان نەبوو، بەڵام من كۆڵمنەدا.

خێزانەكە لەدایك‌و باوك‌و سێ كچ پێكهاتبون.

لە 2015/4/1 پێنج كەس دوای ئەوەی لە دەرەوەی ماڵ پیاوێك دەستگیردەكەن‌و هەڕەشەی كوشتنی لێدەكەن ئەگەر پارەیان نەداتێ، ئەویش دەڵێت دەچینەماڵەوەو لەوێ پارەتان پێدەدەم، ئەمە سەرەتای روداوەكەیە لەزمانی ئەو خێزانەوە دراوەتە (كەركوك ناو).

هەفتەی رابردو، دوای چەندین هەوڵ بۆ چاوپێكەوتن لەگەڵ ئەو خێزانە، دەرفەتێكم دەستكەوت، بۆ ئەوەش دەبوو سەردانی بەڕێوەبەرایەتی نەهێشتنی تاوان بكەم لە كەركوك.

بەڕێوەبەری نەهێشتنی تاوانەكان رێی پێدام بچمە ژورەوە، بینیم دایكێك‌و دوان لە كچەكانی، لەبەردەم بەڕێوەبەردا دانیشتبون. (ئەوان ئەو خێزانەبون كە هەفتەی پێشوتر دەستدرێژییان كرابوەسەر)و بونە مانشێتی زۆربەی ماڵپەڕو رۆژنامەكان.

دوای وەرگرتنی مۆڵەت پێكەوە قسەمانكردو ئامادەبون بەوردی باسی روداوەكە بكەن.

هەرسێكیان جلوبەرگی رەشیان پۆشیبوو، كە ئەوەش ئاماژەیە بۆ خەم‌و دڵتەنگی، سێیەم كچیان بەهۆی كەمی تەمەنییەوە كە پێنج ساڵە لەوێ نەبوو.

بەر لە چونەژورەوەم لێكۆڵینەوە لەگەڵ خێزانەكەدا كرابوو، هەر بۆیە رێگە بەمن درا بیانبینم‌و قسەیان لەگەڵ بكەم، پێشتریش یەك دوجار داوام لە بەڕێوەبەر كردبوو كە دەمەوێت لەگەڵ ئەو خێزانە قسەبكەم.

(ل، س) ژنێكی ئەسمەری باڵا مامناوەند، چاوە قاوەییەكانی بەردەوام فرمێسكی لێدەهاتە خوارێ، ئەوە دایكی سێ كچەكەبوو.

لەگەڵ هەر قسەیەكدا نزای دەكردو دەیوت خوایە قبوڵی مەكە.

رێكخراوەكان لەئاست روداوەكە بەبێ هەڵوێست ناودەبرێن، وێنەكە تەنها ئاماژەیەكە بۆ بونی توندوتیژیی دژ بەژنان‌و پەیوەندی بەو خێزانەوە نییە

رێكخراوەكان لەئاست روداوەكە بەبێ هەڵوێست ناودەبرێن، وێنەكە تەنها ئاماژەیەكە بۆ بونی توندوتیژیی دژ بەژنان‌و پەیوەندی بەو خێزانەوە نییە

چیرۆكەكەی گێڕایەوە “كاتژمێر پێنجی ئێوارە بوو، گوێم لەدەنگی هاوسەرەكەم بوو، ژاوەژاوێك دەهات لەدەرەوەی پەنجەرەكەوە بینیم چەند كەس پیاوەكەمیان بەدەستەوەیە‌و رایدەكێشن… لێیدەدەن… هەڕەشەی لێدەكەن.”

زیاتر وتی “كاتێك زانیم نیازیان خراپە كچەكانم كردە ژورەوە‌و دەرگام داخست، ئەوان پێنج كەس بون، بەكوردی قسەیان دەكردو جلی كوردییان لەبەربوو… داوای پارەیان لەهاوسەرەكەم دەكرد – تەمەنی 63ساڵە-، بەڵام هاوسەرەكەم وتی هیچ پارەم نییە، ئەوان بەوە توڕەبون‌و وتیان دەستدرێژی دەكەینە سەر ژن‌و كچەكانت.”

یەكێك لەو پێنج كەسە وەك پاسەوان لەبەردەم دەرگای حەوشەی ماڵی ئەو خێزانە دەمێنێتەوە.

(ل، س)، كە تەمەنی 45 ساڵە، وتی “ئەوان بەرەو روی من هاتن، زۆر پاڕامەوە، قاچیانم ماچكرد… كەوتم بەسەر پێڵاوی یەكێكیاندا‌و وتم مەچن بەلای كچەكانمدا چیتان دەوێت لەگەڵ من بیكەن، هاوسەركەمیان كردە سوچێكی چێشتخانە.”

لەگیِرَانەوەكە بەردەوامبوو زیاتر وتی “دوان لە پیاوەكان چەكیان لەسەر سەرم راگرت‌و دەستیان بەستمەوە، دوانیش وەك گورگ لەبەرچاوی پیاوەكەم منیان روتكردەوە‌و هەر ئەو دوو پیاوە چوارجار سێكسیان لەگەڵ كردم، دوای ئەوە زۆریان لێدام، پاشان گوێیان لەدەنگی ئۆتۆمبێلی پۆلیس بوو، هەڵاتن.”

ئەو خێزانە لەپارێزگاكانی تری عیراقەوە ئاوارەی كەركوك بون‌و لە یەكێك لە گەڕەكەكانی ئەو شارە نیشتەجێبون.

(م، ع)، یەكێك لەسێ كچەكە هەمان چیرۆكی دایكی گێڕایەوە، وتیشی “لەبەر هەژاریی‌و بێكەسی لەترسی كوشتن‌و تیرۆر كەركوكمان بەئارامترین شار هەڵبژارد تا لەكوچەیەكی ئەم شارە بەهەژاریی بژین.”

ئەو كە تەمەنی 15 ساڵە، دەڵێت هەرگیز دەنگی نزاكانی ئەو رۆژەی دایكی بیرناچێتەوە (بەدەم گریانەوە) وتی “ئێستا ئەو كەسانە بدەنە دەستی من خۆم دەزانم چۆن تۆڵەی دایكم‌و خەمەكانی باوكە پیرەكەمیان لێدەكەمەوە.”

(ز، ع) یەكێكی ترە لە ئەندامانی ئەو خێزانە‌و تەمەنی 19 ساڵە، ماوەیەكە لە هاوسەرەكەی جیابۆتەوە، باس لەبارودۆخی خۆیان دەكات دوای ئەو روداوەو دەڵێت “رومان نییە بچینە ناو خەڵك، چۆن بەكەسوكارمان بڵێین، هەرگیز ئەو وێنەیەم بیرناچێتەوەو لەڕوی دەرونییەوە زۆر روخاوین.”

داواشی لەدەزگا ئەمنییەكان كرد، ژیانیان بپارێزن.

ئەو چیرۆكە بۆ من وەك رۆژنامەنوس یەكجار ئازاربەخشبوو، بڵاوكردنەوەی وتەكانیشیان بەشێكە لە كاری خۆم وەك رۆژنامەنوس تا یاسا لەو كەیسەدا سەروەربێت.

ئێستا هەر پێنج كەسەكە لەسەر ئەو روداوە دەستگیركراون‌و دوانیان (ئەوانەی دەستدرێژییە سێكسییەكەیان كردوە) سزای لەسێدارەدانیان بۆ دەرچووە، كە یەكێكیان پلەدارە لەدەزگا ئەمنییەكانی كەركوك.

عەقید رەزوان، بەڕێوەبەری نەهێشتنی تاوان لە كەركوك وتی “لێكۆڵینەوەمان دەستپێكردوەو راپۆرتی پزیشكییمان بۆ ژنەكە كردوەو ئەوەی ماوەتەوە پەیوەندی بەدادگاوە هەیە.”

روداوەكە سەرەڕای قێزەونیی ناڕەزایی لە نێو رێكخراوەكانی داكۆكیكەر لەمافی ژنان لێنەكەتەوە.

ناسكە محەمەد، چالاكوان لەبواری مافەكانی ژنان لە كەركوك وتی “دەبوو ئێستا ناڕەزایی دەربڕین‌و خۆپیشاندان لەهەموو كوچەو كۆڵانەكان دەستپێبكات، بەڵام بەداخەوە لە 23 رێكخراوی جۆراوجۆر تەنانەت یەك رێكخراو هەڵوێستی نەبووە.”

عەلی حاجی ـ كەركوك ناو

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری