منداڵانی موسڵ لەسەر ئاشتی‌و پێكەوەژیان رادەهێنرێنەوە

February 14, 2017 at 9:32 pm

كەركوك ناو
توندوتیژی‌و كردەوەكانی رێكخراوی داعش، كاریگەری لەسەر منداڵانی پارێزگای موسڵ بەجێهێشتووە‌و لایەنە پەیوەندیداریەكانیش لەهەوڵی ئەوەدان، هەڵمەتێك بۆ راهێنانەوەیان لەسەر ئاشتی‌و پێكەوەژیان ئەنجامبدەن.

نیشاندانی مەترسییەكانی حوكمی داعش لەسەر منداڵ‌و مێردمنداڵانی سنوری موسڵ، لەچوارچێوەی بەدواداچوونێكی مەیدانیدا هات، كە ئەنجامەكەی لەكۆنگرەیەكی رۆژنامەوانیدا لەشاری هەولێر راگەیەندرا.

حەسەن زەینەڵ، وتەبێژی هەڵمەتی پاراستنی مافەكانی منداڵ لەلێدوانێكدا بۆ (كەركوك ناو) وتی “بەگوێرەی بەدواداچوونەكە دەركەوتوە ئەوانەی لەتەمەنی هەرزەكاریدان (13 بۆ 18 ساڵ) توندوتیژییەكانی داعش كاریگەری زۆری لەسەریان بەجێهێشتووە بەراورد بەمنداڵانی خوار ئەو تەمەنە”.

ئەو هەڵمەتە، بەچاودێری رێكخراوی مێرسی كۆی ئەمریكی راگەیەندراوە بەئامانجی بەرەنگاربوونەوەی كاریگەریی‌و مەترسیی كردەوەكانی داعش لەسەر منداڵانی پارێزگای نەینەوا.

وتەبێژی هەڵمەتەكە نمونەی ئەوەی هێنایەوە “لەنێو مێرمنداڵەكاندا هەبوو كە بەدایكی وتووە نوێژ بكە هەتا داعش نەتكوژێت”.

زیاتر وتیشی “لێرەدا ئەوەی گرنگە هەموو پێكهاتەكانی نەینەوا بەیەكەوە كار بكەین بۆ رزگاركردنی نەوەی داهاتوومان، بەیەكەوە بین بۆ پاراستنی منداڵەكانمان، ئەوە كارێكی دەستەجەمعییە”.

چەكدارانی داعش، لەناوەڕاستی ساڵی 2014 دەستیانگرت بەسەر شاری موسڵ‌و روبەرێكی فراوان لەپارێزگاكانی نەینەوا، كەركوك، دیالە‌و سەڵاحەدین، دوای راگەیاندنی “دەوڵەتی خەلافەتی ئیسلامی” چەندین رێنمایی‌و رێكاری تیابەت بەخۆیان بەسەر خەڵدا سەپاند.

غەزوان حام حەمید، سەرۆكی لیژنەی مافەكانی مرۆڤ لەئەنجومەنی پارێزگای نەینەوا دەڵێت بەپێی بەدواداچوونی تیمێكی رێكخراوەكانی كۆمەڵگەی مەدەنی لەسەر منداڵان لەناو كەمپەكاندا، دەركەوتووە كردارو كردەوەكانی داعش بەتایبەتی توندوتیژی كاریگەری لەسەریان جێهێشتووە.

چەكدارانی داعش، لەماوەی دووساڵ‌و نیوی دەسەڵاتیاندا سەدان كردەوەی توندوتیژییان ئەنجامدا‌و دەیان هاوڵاتی بەهۆیەوە بوونەتە قوربانی، بەشێكی زۆر لەو كردەوانەش لەبەرچاوی خەڵك بوون یان لەرێی تۆڕە كۆمەڵایەتیەكان‌و ئینتەرنێتەوە بڵاویانكردۆتەوە.

سەرۆكی لیژنەی مافەكانی مرۆڤ لەئەنجومەنی پارێزگای نەینەوا، ئاماژەی بەوەدا كە بۆ كاركردن لەسەر دەرەنجامی بەدواداچوونەكە، بەهەماهەنگی لەگەڵ بەڕێوەبەرایەتیەكانی ئەوقاف، پەروەردە، تەندروستی، رۆشنبیری، وەرزش و لاوان چەند راسپاردەیەكیان دەركردووە.

“گرنگترینیان داوا لەوەزارەتی پەروەردەو پەروەدەی موسڵ كرا لەهەموو ئاستەكانی خوێندندا پێنج خولەكی یەكەم مامۆستایان باس لەگرنگی بەیەكەوە ژیانی ئاشتییانەی پێكهاتەكان بكەن” غەزوان حام حەمید وادەڵێت.

هەروەها داواكراوە لەكۆتایی هەفتەدا، ئاڵای عێراق لەناو ناوەندەكانی خوێندن بەرزبكرێتەوە بۆ زیاتر گرنگیدان بەپێكەوەژیانی ئاشتییانە، جگە لەوەش توێژەری كۆمەڵایەتی دابمەزرێندرێن بۆ هەمان مەبەست.

زۆربەی ئەو ناوچانەی داعش دەستی بەسەرداگرت، دانیشتوانەكەی فرە پێكهاتە بوون، بەڵام ئەو رێكخراوە بەكوشن‌و چەندین شێوازی توند روبەڕوی نا موسڵمانەكان بووەوە، بەشێكی زۆریشی ناچار بە كۆچی زۆرەملێ‌ كرد.

سەرۆكی لیژنەی مافەكانی مرۆڤ باسی لەوەشكرد كە هەوڵدەدرێت لەرێی وەرزشەوە پەیامی پێكەوەژیان بگەیەنن‌و داوا لە مزگەوت‌و كڵێسا‌و شوێنە ئاینییەكانی تر كراوە لەوتارەكانیاندا كار بۆ ئاشتی بكەن‌و دژی توندوتیژی بوەستنەوە.

لەماوەی دوو ساڵی رابردوودا، داعش بەشێكی زۆری ئەو ناوچانەی لەدەستدا كە دەستی بەسەرداگرت‌و لەئێستاشدا، ئۆپەراسیۆنی كۆنترۆڵكردنەوەی موسڵ بەردەوامی هەیە دوای ئەوەی لەسێ‌ مانگدا توانی ناوچەكانی دەوروبەری پارێزگای نەینەوا‌و نزیك بەنیوەی ناوەندی شارەكە كۆنترۆڵبكاتەوە.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری