وەزارەتی تەندروستی: چاودێری چڕی تەندروستی سەمیرە مواقی دەكەین

February 15, 2017 at 2:20 pm

14-2-2017، سەمیرە مواقی رۆژنامەنووسی جەزائیری لە نەخۆشخانەی مەدینە توب لە بەغدا فۆتۆ: وەزارەتی تەندروستی

كەركوك ناو
وتەبێژی وەزارەتی تەندروستی عیراق جەختدەكاتەوە لە باشبوونی تەندروستی سەمیرە مواقی‌و كەسوكارەكەشیان لە دۆخەكەی ئاگاداركردووەتەوە، لە ئێستاشدا چاودێری چڕی تەندروستی ئەو رۆژنامەنووسە جەزائیرییە دەكرێت.

د.ئەحمەد ئەلڕدێنی، لە لێدوانێكی تایبەتدا بە (كەركوك ناو)ی وت “دۆخی تەندروستی سەمیرە مواقی جێگیرەو تیمێكی پزیشكی پسپۆڕ سەرپەرشتی وردی چارەسەركردنی دەكەن… ناتوانرێت كات دەستنیشان بكرێت كە چەند ماوەی پێویستە بۆ یەكجارەكەی چاكبوونەوەی، چونكە بە گولەی قەناس پێكراوەو بەر سەری كەوتووەو دەبێت بەوردی چاودێری چڕی تەندروستی بكرێت”.

سەمیرە واقی، خانمە رۆژنامەنووسی جەزائیری دووشەممە 15-2 لە ناوچەكانی قەزای تەلەعفەر لە رۆژئاوای پارێزگای نەینەوا، بە فیشەكی قەناس لەلایەن چەكدارانی داعشەوە پێكرا‌و بەسەختی برینداربوو، لەئێستاشدا لە نەخۆشخانەی نەشتەرگەری پسپۆڕییە لە نەخۆشخانەی مەدینە توب لە بەغدا .

وتەبێژی وەزارەتی تەندروستی ئاشكرایكرد كە شاندێكی جەزائیر سەردانی سەمیرە مواقی-یان لە نەخۆشخانە كردووەو جەختیشیكردەوە “وەزارەتی دەرەوەی عیراق لەڕێگەی باڵیۆزخانەی عیراق لەجەزائیر پەیوەندییان بە خانەوادەی سەمیرەوە كردووە‌و دڵنیاییان لەبارەی تەندروستی سەمیرە پێداون”.

دەستەی راگەیاندنی حەشدی شەعبی پێشتر لەبەیاننامەیەكدا رایگەیاند، ئەو رۆژنامەنووسە سەرلەبەیانی 13ی ئەم مانگە لەكاتی رۆماڵكردنی بەرەكانی جەنگ، بەسەختی برینداربووە بەهۆی فیشەكی قەناس بەدەستەكانی داعش‌و سەرەتا رەوانەی نەخۆشخانەی گەیارە كراوە، دواتر بەفڕۆكەیەكی سەربازی گواستراوەتەوە بۆ بەغدا.

هاوكات مستەفا ناسر، سەرۆكی كۆمەڵەی داكۆكی لە ئازادی رۆژنامەوانی لە عیراق سێشممە بە (كەركوك ناو)ی وت “رەوشی تەندروستی ئەو رۆژنامەنووسە بەڕێژەی لەسەدا 60 باش بووە وەكو دكتۆرەكانی نەخۆشخانەی مەدینە توب لە بەغدا ئاماژەی پێدەكەن، وەزارەتی دەرەوەی عیراقیش بەڵێنیدا خەرجی گواستنەوەی بۆ جەزائیر بگرێتە ئەستۆ دوای چاكبوونەوەی بەتەواوی.

فۆتۆ گه‌له‌ری

چاپکردن چاپکردن