شەنگال؛ خۆپیشاندەران بۆ راگرتنی شەڕ رۆیشتن‌و خۆیان بوونە قوربانی

March 14, 2017 at 6:51 pm

شەنگال، 14-3-2017، بارگرژی لەنێوان هێزی چەكدار‌و خۆپیشاندەران روویدا فۆتۆ: رێناس رامان

فەرمان سادق
دروشمێكی سەرەكی خۆپیشاندەران داوای راگرتنی شەڕ بوو، بەڵام بارگرژییەكە ئەوانیشی گرتەوە‌و ژمارەیەكیان بوونە قوربانی، لە كاتێكدا دوو هێزە ركابەرەكەی شەنگال یەكتری بە تەقەكردن لە خەڵك تۆمەتباردەكەن.

ئەمڕۆ سێشەممە 14-3، جارێكی تر نائارامی لە قەزای شەنگال لە نێوان لەشكری رۆژو هێزەكانی بەرخودانی شەنگال دروستبووەوە‌و بەهۆیەوە، هاوڵاتییەك كوژراو ژمارەیەكی دیكەش برینداربوون.

بارگرژییەكە كاتێك روویدا، ژمارەیەك هاوڵاتی لەنێویاندا خەڵكی رۆژئاوای كوردستان (سوریا)ش هەبوون، هەوڵیاندا بەخۆپیشاندان لە سنوری خانەسۆرەوە بچنە سنونێ‌ لە قەزای شەنگال دژی پێكدادانەكانی ئەو دوو هێزە، بەڵام روبەڕوی تەقە بوونەوە.

مەحمود حاجۆ، یەكێكە لە بەشداربوانی خۆپیشاندانەكە‌و بە (كەركوك ناو)ی وت “هێزەكانی لەشكری رۆژ روبەڕومان بوونەوە بەگازی فرمێسك رێژ، دواتریش تەقەیان لەخۆپیشاندەران كرد”.

ئەوەش لەكاتێكدا بووە وەكو ئەو هاوڵاتییە دەڵێت، خۆپیشاندەرانە ویستوویانە لە خانەسۆر بەرەو سنونێ‌ بچن.

بەهۆی تەقەكردنەوە لە خۆپیشاندەران، ئەندامێكی تەڤگەری ژنانی ئێزدی بەناوی (نازێ نایف) كوژراوەو 10 كەسی تریش برینداربوون، كە لەنێویاندا دوو رۆژنامەنووس هەبوون بەناوەكانی ژیندا ئاسمان‌و دەلیلا ئاخین.

شەنگال، 14-3-2017، خۆپیشاندەرێك كوژراو ژمارەیەكی تر برینداربوون فۆتۆ: رێناس رامان

بەرپرسانی لە شكری رۆژ، رەتیدەكەنەوە ئەوان راستەوخۆ تەقەیان لە خۆپیشاندەران كردبێت‌و بۆ ئەوەش، تۆمەت روبەروی شەڕڤانانی یەبەشە دەكەنەوە.

عەقید قادر شێخ مەمی، فەرماندەی لەشكری رۆژ بە (كەركوك ناو)ی وت “تەنانەت لەشكری رۆژ هەر لەوێ نەبوونە، بەڵكو پۆلیسی بەرەنگاربوونەوەی توندوتیژی گازی فرمێسك رێژییان بەكارهێناوە‌و تەقەیان نەكردووە”.

لەبارەی بوونی كوژراو و بریندارەوە شێخی مەمی دەڵێت “بەپێی زانیارییەكانی ئێمە هێزی یەپەژە لە پشتەوە تەقەی لەخۆپیشاندەران كردووە نەك ئێمە”.

ئەوەش لەكاتێكدایە بە وتەی عەقید محەمەد لە لەشكری رۆژ بۆ (كەركوك ناو)، ئەوان تەنیا تەقەیان بە ئاسماندا كردووە چونكە وەكو ئەو وتی “خۆپیشاندەران بە گازی فرمێسكرێژ پاشاكشەیان نەكرد‌و هاتبوونە سەر ساترەكانمان”.

ناحیەی سنونێ‌و خانەسورێ‌، لە شەنگال، زێدی مێژوویی ئێزدییەكانە، لەئێستادا بەشێك لەئاوارە گەڕاوەكانی دەستی داعش لێی نیشتەجێن.

سەردەشت شەنگالی، فەرماندەی هێزەكانی بەرخودانی شەنگال (یەبەشە) لە لێدوانێكدا بە (كەركوك ناو)ی وت “ئەو خەڵكانەی هاتبوون داوایان دەكرد شەڕ روونەدات، بەڵام لەلایەن لەشكری رۆژەوە تەقەیان لێكرا”.

خۆپیشاندانەكە دوای ئەوەهات، دوو هەفتە لەمەوبەر شەر‌و پێكدادان لە نێوان ئەو دوو هێزە ركابەرەی شەنگال روویدا‌و بەهۆیەوە، دەیان خێزان جارێكیتر لەو ناوچانە ئاوارەبوونەوە.

شەنگال، 14-3-2017، خۆپیشاندەران داوایاندەكرد هێزەكان لەبری شەڕی یەكتری روبەڕوی داعش ببنەوە فۆتۆ: چیا شەنگالی

مەلیس، بەشداربوویەكی خۆپیشاندانەكەیە‌و وەكو خۆی باسیكرد تەنیا دوو مەتر لەو كەسەوە دووربووە كە بەهۆی تەقەوە كوژراوە.

“نازێ نایف تەنیا دوو مەتر لەمن دوور بوو، كە لەشكری رۆژ بەگوللە روبەڕوی داواكاری خۆپیشاندەران بوونەوە، بەهۆیەوە گوللەیەك بەر سنگی كەوت‌و لەلایەكی تریەوە هاتە دەرەوە”.

مەلیس دەڵێت هەرچەندە زۆر هەوڵیانداوە خوێنەكەی بوەستێنن‌و برینەكەی دابخەن، بەڵام سودی نەبووە‌و لەنێو دەستیاندا گیانی لەدەستداوە.

نازێ نایف، خەڵكی گوندی زومانێ‌-یە‌و ساڵی 2014 بەهۆی هێرشی داعشەوە لەگەڵ خانەوادەكەی ئاوارەی سەر چیای شنگال بوون‌و هەرلەوێ‌ ماونەتەوە.

وەكو مەلیس باسیكرد پێشتریش برایەكی نازێ‌ بەهۆی بۆمبی چێنراوی داعشەوە گیانی لەدەستداوە.

“وەك خۆپیشاندەران دروشممان كۆتایی پێهێنانی شەڕی براكوژی بوو… داوامان لە شكری رۆژ كرد لەجیاتی ئەوە ژنان و كچانی ئێزیدی دەست داعش رزگار بكەن… كاتێك نزیكی هێزەكە بووینەوە سەرەتا گازی فرمێسك رێژییان پێداكردین‌و دواتریش تەقەیان بەئاسمانەوە نا، پاشان بەبی كەی سی تەقەیان لەخۆپیشاندەران كرد”.

بەوتەی مەلیس دوای رووداوەكەش، رێگەیان پێنەدراوە بریندارەكان ببنە هەولێر‌و دهۆك بۆیە رەوانەی قامیشلۆیان كردوون، لە رۆژئاوای كوردستان (سوریا).

شەنگال، 14-3-2017، رێگری لە خۆپیشاندەران كرا لە خانەسۆرەوە بچنە سنونێ‌ فۆتۆ: رێناس رامان

هەرچەندە خۆپیشاندەران لەشكری رۆژ بە تەقەكردن تۆمەتباردەكەن، بەڵام ئەوان رەتیدەكەنەوە‌و لەگەڵ یەبەشەدا كەوتوونەتە تۆمەتباركردنی یەكتری، هیچ لایەكیشیان ئامادەنیە بەرپرسیارێتی قوربانییەكان لە ئەستۆ بگرێت.

عەقید قادر شێخ مەمی، خۆپیشاندانەكە بە رێكخراو دژ بە لەشكری رۆژ ناودەبات‌و دەڵێت “پەكەكە خەڵكیان لەدێرەلوك‌و رۆژئاوای كوردستانەوە هێناوە بۆ خانەسۆر بۆ دەركردنی لەشكری رۆژ بەناوی خۆپیشاندانەوە”.

لە 3-3ی ئەمساڵ شەڕ لەنێوان پێشمەرگەكانی رۆژئاوای كوردستان (لەشكری رۆژ) كە لەلایەن حكومەتی هەرێمی كوردستانەوە مەشقیان پێكراوەو پڕچەككراون، لەگەڵ یەكینەكانی بەرخودانی شەنگال (یەبەشە) كە لەئێزدییەكان پێكهێنراون‌و نزیكن لە پارتی كرێكارانی كوردستان (پەكەكە) روویدا.

شەڕەكە بەپێی هەردوو لایەنەكە كاتێك دروستبووە، پێشمەرگەكانی لەشكری رۆژ ویستویانە بچنە ناو ناحیەی سنونێ، بەڵام چەكدارانی یەبەشە رێگریان كردووەو بەهۆیەوە نزیكەی پێنج كاتژمێر شەڕو پێكدادان بەردەوامبوو و بەهۆیەوە ژمارەیەك كەس لە هەردولا كوژران.

4 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری