سەوڵە گەمارۆكەی داعشی تێكشكاند

March 15, 2017 at 9:59 am

كەركوك/ سەوڵە كەریم (54 ساڵ)، لەسەر بانی خانووەكەیان چەند رۆژێك دوای هێرشی داعش بۆ ناو كەركوك لە 21-10ی 2016 فۆتۆ: عیماد جەباری

عیماد جەباری
تا دەهات دەنگی گولـلەو ئاگری شەڕ زیاتر بەرزدەبووەوە، خەڵك ماڵەكانی خۆیان بەرەو گەڕەكە زۆرینە كوردنشینەكان بەجێدەهێشت، بەڵام سەوڵە كەریم (54 ساڵ) بڕیاریدا چەك بكاتە شانی‌و بەزوویی چەند كونێكی كردە ستارەی خانووەكەیان‌و سەنگەری لە چەكدارانی داعش گرت.

“هێرشەكان لە دوو قۆڵەوە بوون، دوو لە چەكدارەكان لەناو گەڕەكەكە كوژران، ئیدی چەكدارەكانی تر دەیانویست تۆڵەمان لێبستێننەوە”، سەوڵە وای وت. هەروەها نەیهێشت نەكچەكانی‌و نەخەڵكی گەڕەكەكەی پریشكی ئاگری داعشیان بەركەوێت لەهێرشە لە ناكاوەكەی سەر كەركوك.

لە دوای كاتژمێر 3:30 خولەكی بەرەبەیانی ڕۆژی 21ی تشرینی یەكەمی ساڵی ڕابردوو، سەوڵە گوێبیستی هاواری چەكدارەكانی داعش بوو، لەبڵندگۆی مزگەوتەكانەوە “جیهادیان”، لەدژی هێزە ئەمنییەكانی كەركوك ڕاگەیاند.

سەوڵە_لە نەتەوەی‌ كوردە_‌ خۆی‌و دوو كچ ‌و بووكێكی‌و سێ كوڕی بە ناوەكانی (كامەران، كاوەو هاوكار) لەماڵەوەبوون، كوڕێكیشی كە كارمەندی ئاسایشە لە دەوام ئێشكگر بووە.

دوای بیستنی دەنگی هاواری چەكدارەكان بۆ “جیهاد” لە گەڕەكی ئەسراو مەفقودین، دانیشتووانەكەی دەشڵەژێن، دەیان چەكدار لە كۆڵان‌و لە سەربانە بەرزەكانی نزیك ماڵی سەوڵە جێگیردەبن.

كاتێك گوزەرەكە پڕدەبێت لە دەنگی تەقە، سەوڵە بڕیاردەدات بەرگری بكات‌و خانووەكەی چۆڵنەكات، ئەوەش دەبێتە هاندەر بۆ ئەوەی خەڵكێكی زۆر لە دانیشتووانی گەڕەكەكە لەگەڵیدا بمێننەوەو لە سەربانەكەیانەوە بەرگری بكەن.

سەوڵە، پێیوایە دوو هۆكار هەبوون بۆ ئەوەی چەكدارەكان هێرشی چڕبكەنە سەر خانووەكەیان، “ئەویش هەڵكەوتەی جوگرافیای خانووەكەیە كە لەنزیك چەمی خاسە بوو (بەشێك لەچەكدارانی داعش چووبونە ناو چەمی خاسە)، دواتریش زانیمان كە لەڕێگای شانە نووستووەكانیانەوە پێیان ڕاگەیەندرابوو كە كوڕەكانم كارمەندی ئاسایش‌و پێشمەرگەن”.

وتیشی “بۆیە دەیانویست بەهەر نرخێك بێت دەستبەسەرمان بكەن”.

21ی تشرینی یەكەمی 2016، زیاتر لە 100 چەكداری داعش دزەیان كردە ناو شاری كەركوك‌و هێرشیانكردە سەر چەند گەڕەكێكی زۆرینە عەرەبنشین‌و دەزگای حكومی‌و ئەمنی.

كاروان تۆفیق، كوڕی سەوڵە هێشتا ئەو تۆمارە دەنگییەی دایكی پاراستووە كە لەكاتی هێرشەكەدا تكا لەدایكی دەكات گەڕەكە چۆڵبكات نەوەكو بكەونە دەستی داعش.

“داوام گەڕەكەكە بەجێبهێڵێت‌و خوشكانم ڕزگاربكات، نەوەك خوانەخواستە چەكدارەكان بچنە سەریان، دایكم وتی لەئێوە زیاتر نیم‌و ئێرە بەجێ ناهێڵم، ئەم قسانە ئەوەندەی دیكە ورەیان پێبەخشیم”، كاروان وای وت، كە خۆیشی لە شوێنی كارەكەی لەشەڕدا بووە لەگەڵ چەكدارەكانی داعش.

لە پەلامارەكەی ئەو رۆژەی چەكدارانی داعشدا بۆ سەر كەركوك، زیاتر لە 90 شەهیدو 250 بریندار لە ڕیزی پێشمەرگەو هێزە ئەمنییەكان‌و هاوڵاتیان هەبوون.

كوشتنی دوو چەكداری داعش لە نزیك ماڵی سەوڵە، لەلایەن ئەو كەسانەی لەسەربانەكەوەتەقەیان دەكرد، داعشەكان زیاتر تووڕە دەكات‌و هێرشەكانیان چڕتر دەكەنەوە.

كەركوك/ كوڕەكانی سەوڵەو دراوسێیەكانی، دوای بەشداریكردنیان لە روبەڕوبونەوەی چەكدارانی داعش لەناو شارەكە لە 21-1-ی 2016 فۆتۆ: عیماد جەباری

لەشەڕی دژی داعش‌و بەتایبەت دوای داگیركردنی شنگال‌و ڕفاندنی سەدان كچ و ژنی ئێزدی، ژنانی كورد بەهەمان شێوەی پیاوان چەكیان كردە شانیان ‌و ڕووەوە سەنگەرەكان ڕۆیشتن.

لە هێزی ژنانی سەر بە وەزارەتی پێشمەرگە، زیاتر لە 500 ژنە پێشمەرگە هەن، بەشێكیان لە سەنگەرەكاندا جێگیربوون، بەشێكی تریشیان لەبەڕێوەبردنی دوو شەڵتەری داڵدەدانی ژنان‌و نەخۆشخانەی شۆڕشدا ئەركەكانیان بەجێدەگەیەنن.

عەقید ناهیدە ئەحمەد، فەرماندەی هێزی ژنان، وتی “زیاتر لە 60 ژن وەك خۆبەخش ناوی خۆیان تۆمار كردووە، پڕۆسەكەش بەردەوامە، ژمارەیەكیان هاتوونەتە بەرەكانی شەڕو بەچەند مانگ لەگەڵماندا ماونەتەوە”.

״ئێستاش كاتێك دەیهێنمە پێش چاوی خۆم كە چۆن فیشەكەكان لە دەوروبەری دایكمی دەداو ئەویش بەبێ گوێدانە ڕۆحی خۆی سەرقاڵی بەرزكردنەوەی ورەی ئێمە بوو، شۆك دەبم‌و سەرم سووڕ دەمێنێت”، كامەران تۆفیق كوڕێكی تری سەوڵە وای وت، كە هاوشانی دایكی بەرگریی كردووەو روبەڕوی چەكدارانی داعش بووەتەوە.

وتیشی “دایكم دەیزانی لەلایەكی دیكەوە چەكدارەكان هەوڵی هێرشكردن دەدەن، خێرا دەچووە شوێنێكی تری سەربانەكەی كون دەكرد، هەركاتێكیش یەكێكمان ماندوو بوایە دەستبەجێ چەكەكەی لێ دەسەندو خۆی بەرگری دەكرد‌و بەردەوامیش خەمی خوشكەكانم‌و براكەی ترمی دەخوارد”.

لە شەڕی روبەڕوبونەوە لەگەڵ چەكدارانی داعشدا هێزكانی ژنان خاوەن شەهیدێك‌و دوو بریندارن، نەقیب ڕەنگین جێگری فەرماندەی فەوجی هێزی ژنان لە سەرەتای تشرینی یەكەمی ساڵی 2014 لە نزیك داقووق شەهید بوو.

ئاڵا ئەمین محەمەد (32 ساڵ) كچە خۆبەخشێكی پێشمەرگەیە‌و بەشداریی لەزۆربەی شەڕەكانی داقوق‌و  مەكتەب خالیدو مەلا عەبدوڵڵا و دەوروبەری موسڵدا كردووە.

ئاڵا كوردێكی ڕۆژهەڵاتی كوردستانە ‌و باوك‌و دایكی شەهیدن، ״بەهۆی كوردپەروەریی خانەوادەكەم‌و قوربانیدانەكانمان ماوەی 13 ساڵە لە دووریی زێدی خۆم ژیان بەسەر دەبەم، بەڵام كە داعش هات ئیتر بووم بە پێشمەرگە”، ئاڵا بە پێویستیشی زانی كچ‌و كوڕ لەخەباتی چەكداریدا بەشداربن تاوەكو “نیشتیمان پارێزراوبێت”، لەهەموو مەترسییەك.

دوای تێپەڕبوونی چەند مانگێك بەسەر هێرشە تێكشكێنراوەكەی داعشدا، هێشتا دیكۆری دەرەوەی خانووەكەی سەوڵە بە شوێنەواری گولـلە نەخشێنراوە، ئەو ژنە چاوەڕوانیی هیچ دەستخۆشی ‌و خەڵاتێك نییە ״ئەوەی كردوومە لەپێناو پاراستنی گیان‌و ماڵی خۆمان‌و شارەكەماندا بووە”.

بەرگرییە سەختەكەی سەوڵە و دراوسێكانی لە بەرەبەیانی ڕۆژی 21ی تشرینەوە تاوەكو ئێوارەی هەمان ڕۆژ بەردەوام بوو، هەرچەندە تا 4 ڕۆژی دواتریش لەگەڵ كەسوكارەكەیدا ئێشكگرییان كردووە و تا بە تەواوەتی مەترسیی داعش لە سەر كەركوك نەما.

ئەم راپۆرتە، خەڵاتی دووەم باشترین راپۆرتی گۆڤاری ژن-ی پێدرا، لە پێشبڕكێی (٨ی مارس)ی ئەمساڵدا، (كەركوك ناو) بەڕێككەوتن لەگەڵ  گۆڤاری ژن، راپۆرتە براوەكان بڵاودەكاتەوە، لەپێناو هاندانی رۆژنامەنووسان بۆ روماڵكردنی پرسەكانی ژنان.

1 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری