لەمعان لە تانكییەكدا بەجێهێڵرابوو
ژنان لە سەرشەقام دژی توندوتیژییەكان دەنگیان بەرزدەكردەوە

March 17, 2017 at 2:22 pm

ساڵی 2016، ژنان لەرێپێوانێكدا داواكارییەكانیان دەدەنە سەرۆكی ئەنجومەنی پارێزگای كەركوك فۆتۆ: كەركوك ناو

كەركوك ناو
لەكاتێكدا ژنانی كەركوك لەڕۆژی 8ی مارسدا، هوتافیان دژی پێشێلكارییەكانی بەرامبەر بەژنان دەكێشا و داوای پاراستنی ژیانیان دەكرد، ژمارەیەك چەكدار تەرمی كچێكیان بەدەست بەستراوی لەناو تانكییەكی نێو خانوویەكی تەواونەكراودا فڕێدا.

ئەو چەكدارانە 6-3، لەمعان خواد (39ساڵ)یان لە بەردەم ماڵەكەی خۆی لە گەڕەكی عەرەفەی كەركوك رفاند و دوو رۆژ دواتر لە رۆژی جیهانی ئافرەتاندا كەسوكارییان ئاگاداركردەوە كە “بچن تەرمی كچەكەیان هەڵگرنەوە”، ئەوەش دوای ئەوە هات كە بۆ ئازادكردنی داوای 100 هەزار دۆلاریان كرد، ئیسماعیل ئیبراهیم  زاوای ماڵی كچەكە و كەسی نزیكیان وای وت.

“بە ناوی خۆشەویستییەوە رفێنرا”

بەپێی لێكۆڵینەوەی دەزگا ئەمنییەكانی كەركوك، رفاندنی لەمعان خواد، پیلان بۆ داڕێژراو بووە، بەهۆی ئەوەی پێشتر تۆمەتباری سەرەكی كە ئێستا بڕیاری دەستگیركردنی بۆ دەرچووە، چەندجارێك لەڕێی تۆڕی كۆمەڵایەتی فەسبوكەوە قسەی لەگەڵ لەمعان كردووە و داوای پەیوەندی خۆشەویستی لێكردووە.

پێیانوتین بۆ ئازادكردنی 100 هەزار دۆلارمان دەوێت

ماوەیەك لەمعان و ئەو كوڕەی بڕیاری دەستگیركردنی هەیە، لەڕێی فەیسبوك و تەلەفۆنەوە قسەیان كردووە و دواجار بڕیاریانداوە یەكترببینن.

عەقید فەرهاد فازڵ، بەڕێوەبەری بنكەی ئاسایشی گەڕەكی كوردستان كە بەشداربووە لە لێكۆڵینەوەكان لە كەیسی رفاندن ‌و دواتر كوشتنی لەمعان خواد بە (كەركوك ناو)ی وت “دوای نیوەڕۆی رۆژی 6-3، كوڕەكە تەلەفۆنی بۆ لەمعان كردووە و پێیوتووە پێكەوە دەچنەدەرەوە، كچەكەش لەبەردەم ماڵی خۆیان چاوەڕێی دەكات، لەناكاو ئۆتۆمبێلێكی جامڕەش كە كوڕەكە و چەند كەسێكی تیابووە و چەكیان پێبووە، كچەكەیان رفاندووە”.

ئیسماعیل ئیبراهیم، زاوای ماڵی لەمعان، وتی “كاتژمێر پێنجی ئێوارەی 6-3، لەڕێی ژمارەیەكی نەناسراوەوە نامەیەكمان پێگەیشت و بۆ ئازادكردنی لەمعان داوای ١٠٠ هەزار دۆلاریان لێكردین”، زیاتر وتی “ئێمە سكاڵامان تۆماركرد بەڵام مۆبایلەكە داخرابوو”.

باری دارایی ئەو خێزانە باش نییە، بۆیە رۆژی دواتر هەر لەڕێی تەلەفۆنەوە رفێنەرەكان ئاگاداردەكەنەوە، كە ئەو پارەیەیان نییە.

بەمۆبایل نامەیەكیان بۆ ناردین كە تیایدا نووسرابوو: بچن تەرمی كچەكەتان ببەنەوە

مۆبایلی چەكدارەكان دادەخرێتەوە، تا رۆژی 8ی مارس جارێكی تر تەلەفۆنێك بۆ كەسوكاری كچەكە دەكەنەوە و داوای 50 هەزار دۆلار دەكەن لەبەرامبەر ئازادكردنیدا، ئەوەش هەر بەوتەی ئیسماعیل.

“وتمان ئەو پارەیەمان نییە و پاڕاینەوە، دواتر نامەیەكیان بۆ ناردین كە ناونیشانێكی تیابوو نووسرابوو: بچن تەرمی كچەكەتان هەڵگرنەوە”، ئیسماعیل ئیبراهیم وای وت.

كەسوكارەكەی هەر ئەوكات دەچنە گەڕەكی پەنجا عەلی، لە باشوری رۆژهەڵاتی كەركوك، ئیسماعیل وتی “دەستەكانی لەمعان بەسترابونەوە و بە لەچكەكەی خۆی خنكێنرابوو، پاشان خرابووە ناو تانكییەكەوە و لەخانوویەكی تەواونەكراودا فڕێدرابوو”.

بەپێی لێكۆڵینەوەكانی پۆلیس، ئەوانەی ئەو كچەیان رفاندووە پێشتر “زۆر” كاریان بۆ سەركەوتنی پیلانەكە كردووە، بەشێوەیەك لەپێناو قایلكردنی لەمعان تا لەگەڵ تۆمەتباری سەرەكی بچێتە دەرەوە و بڕوای پێبكات، “لەدراوسێكانی هەواڵی ئەو كچەیان پرسیووە”، بەڕێوەبەری بنكەی ئاسایشی گەڕەكی كوردستان وای وت.

بڕیاری دەستگیركردن بۆ تۆمەتباری سەرەكی دەردەچێت

دادگای كەركوك بڕیاری دەستگیركردنی بۆ ئەو كەسە دەركردووە كە لەمعانی قایلكردووە لەگەڵی بچێتەدەرەوە.

ئەو كەسە لە پۆلیسی كەركوك دەوامی كردووە، دواتر بڕیاری فەسڵكردنی دراوە.

عەقید فەرهاد فازڵ، بە (كەركوك ناو)ی وت “لێكۆڵینەوە لە كوشتنی لەمعان بەردەوامە، زانیاری زۆر ووردمان دەستكەوتووە و ئەنجامدەرانی ئەو كارەمان بۆ دەركەوتووە، بۆیە تەواوی دەروازەكانی كەركوك و شارەكانی كوردستانمان لە ناو و وێنەی تۆمەتبارەكە ئاگاداركردووەتەوە”.

شاری كەركوك، 8ی ئازاری 2017، مەراسیمی رۆژی جیهانی ژنان فۆتۆ: سۆران محەمەد

ژنان رەخنەیان هەیە

كوشتنی لەمعان هێشتا ناڕوونی زۆری تیادایە، ئەمەش هاوشێوەی زۆرێك لە كەیسەكانی تری ژنان، كە رێكخراوەكان پێیانوایە بەلاڕێدا دەبرێت.

ماڵی لەمعان لە گەڕەكی عەرەفەیە لە باكوری كەركوك، كە ماڵی پارێزگار و كۆمەڵێك بەرپرسی ئەمنی لێیە و دوو دەروازەی دەرچوونی هەیە كە پۆلیسی لێجێگیركراوە.

ماوەی هەشت ساڵ زیاترە كردەوەی چەكداری لەو گەڕەكە ئەنجامنەدراوە، ئەوەش جێی گومانی رێكخراوەكانی ژنانە كە چۆن بەو ئاسانییە لەمعان رفێنراوە.

رووداوەكە لەكاتێكدابوو هەمان رۆژ  ژمارەیەك رێكخراو بە بۆنەی رۆژی جیهانی ژنانەوە مەراسیمێكیان رێكخست‌و تێیدا جەختیانكردەوە، لە نەهێشتنی توندوتیژییەكان دژی ژنان‌و فەراهەمكردنی مافەكانیان.

لەكاتی پرسەكەشیدا هەڕەشەیان لەكەسوكاری كچەكە كردووە

جوان حەسەن، سەرۆكی لیژنەی مافەكانی مرۆڤ‌و كاروباری ژنان لە ئەنجومەنی پارێزگای كەركوك بە (كەركوك ناو)ی وت “جێگای داخە لە رۆژی ژناندا ژنێك بەو شێوەیە دەكوژرێت”، بەبڕوای ئەو هۆكاری ئەو توندوتیژییانە نەبونی ئارامگەیەكە بۆ ژنان ‌و داڵدەدانیان.

عەقید فەرهاد دەڵێت كە ئەوانەی لەمعان-یان كوشتووە “لەكاتی پرسەی كچكەدا، بە ژمارەیەكی تەلەفون هەڕەشەیان لە خانەوادەی لەمعان كردووە ئەگەر ئەو پارەیەی داوایان كردووە پێیان نەدەن ئەو بە ئاسانی لەكۆڵیان نابنەوە، ئەمەش نیشانەی ئەوەیە پێدەچێت زیاتر لە گروپێك ئەو كارەیان كردبێت”.

ناجێگری دۆخی ئابووری، داب‌ونەریت، هەوڵدان بۆ هێنانەوەی ژنی دووەم ‌و بەزۆر بەشوودان، بەهۆكارە دیارەكانی توندوتیژی دژی ژنان دادەنرێن لە كەركوك.

لە 11 مانگی یەكەمی ساڵی 2016دا 793 حاڵەتی توندوتیژی دژ بە ژنان لەكەركوك تۆماركراوە، ئەوەش بەپێی ئامارێكی لیژنەی مافەكانی مرۆڤ‌ و ژنان لە ئەنجومەنی پارێزگای كەركوك.

1 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری