“تاسەر ئێسقان پەشیمانم”

March 17, 2017 at 7:16 pm

كەركوك/مانگی سێی 2017/ ئەو مادە هۆشبەرانەی لەلایەن پۆلیسی كەركوكەوە دەستیان بەسەرداگیراوە فۆتۆ: راگەیاندنی هۆبەی نەهێشتنی مادەهۆشبەرەكان

شڤان محەمەد
“پەشیمانم تاسەر ئێسقان، هەرگیز نەمدەزانی مادەی هۆشبەر وام بەسەردەهێنێت”، لەنێو گرتوخانەی گرتن‌و گواستنەوەی كەركوك، حەیدەر عەلی وای وت، دوای ئەوەی بەتۆمەتی بەكارهێنانی مادەهۆشبەرەكان دەستگیركراو كەیسەكەی رەوانەی دادگا كرا.

حەیدەر وتی “ئەوكاتەی بۆیەكەمجار ئەو مادەیەم تاقیكردەوە بێكاربووم‌و هەستم بە دڵتەنگی دەكرد، بۆیە لەڕێی چەند هاوڕێیەكمەوە فێربووم”.

حەیدەر كە ناوی خوازراوی بەكارهێنەرێكی مادە هۆشبەرەكانە لە كەركوك، یەكێكە لەو 23 كەسەی كە لەلایەن پۆلیسەوە دەستگیركراون‌و كەیسەكانیان رەوانەی دادگا كراوە.

بەپێی ئامارەكانی بەڕێوەبەرایەتی هۆبەی نەهێشتنی ماددە هۆشبەرەكانی كەركوك، لە سەرەتای ساڵی 2016ەوە كەیسی 23 كەس بەتۆمەتی بەكارهێنان‌و بازرگانیكردن بە مادەی هۆشبەرەوە رەوانەی دادگا كراوە.

عەقید فاروق عەبدولكەریم، بەڕێوەبەری هۆبەی نەهێشتنی مادەهۆشبەرەكانی كەركوك، بە (كەركوك ناو)ی وت “لەو 23 كەسە هیچ كەسێك بەبێ حوكمدانی دادوەر دەرناچێت، ئەگەر دەركەوت بەكاریدەهێنێت یان بازرگانی پێوەدەكات”.

ئەوانەی دەستگیركراون تەمەنیان لە نێوان 18 بۆ 40 ساڵی دەبێت، هەندێكیان تووشبوون‌و هەندێكی تریان بازرگانی پێوەدەكەن.

دەستگیركردنی ئەو كەسانە بۆ پۆلیسی كەركوك سەلمێنەری ئەوەیە لە شارەكە لەپاڵ بەكارهێنانی ماددەی هۆشبەر بازرگانیشی پێوەدەكرێت.

عەقید فاروق عەبدولكەریم، بەڕێوەبەری هۆبەی نەهێشتنی مادەهۆشبەرەكانی كەركوك فۆتۆ: شڤان محەمەد

تلیاك، هیرۆین‌و حەشیش، زۆرترین ئەو ماددە هۆشبەرانە پێكدەهێنن كە لە كەركوك دەستی بەسەردادەگیرێت، عەقید فاروق وتی “هەندێك لە بەكارهێنەران لەنێو جگەرەو هەندێكی تریشیان لەنێو نێرگەلەدا دەیكێشن”.

هەفتانە هۆبەی نەهێشتنی مادەهۆشبەرەكانی كەركوك گەڕان‌و پشكنین ئەنجامدەدات، ئەو ماددانەی دەستیبەسەردادەگرن، بەهاوبەشی لەگەڵ فەرمانگەی تەندروستی كەركوك‌و ئیدارەی شارەكە دەیسوتێنن.

كەركوك جگە لەشەڕ، روبەڕوی بێكاریی‌و قەیرانی دارایی بووەتەوە، وەك هەر پارێزگایەكی تری عیراق، ئەوەش بەهۆكاری زیادبوونی توشبووان دادەنرێت.

عەقید فاروق وتی كە بەپێی وتەی ئەو كەسانەی دەستگیردەكرێن، “زۆرینەی تووشبووان هاوڕێیەكانیان فێریان دەكەن، بەڵام كەسانی ئاسایین”.

دكتۆر عەبدوڵا سامدار، شارەزا لەبواری مادەهۆشبەرەكان، بە (كەركوك ناو)ی وت “مادەهۆشبەرەكان رێگای ئەو كەسانە نزیكدەكاتەوە كە دەیانەوێت تووشی نەخۆشی شێرپەنجە ببن، چونكە مەترسیدارترین رێگایە بۆ تووشبوون بەو نەخۆشییە”.

جگە لەوەش وتی “ئەو كەسانەی كە ئەو ماددانە بەكاردەهێنن، سەد لە سەد لەكۆمەڵگە دووردەكەونەوە”، بۆیە بەپێویستیزانی كە هەمووان پێكەوە هەڵی دووبارە گەڕانەوەیان بدەن بۆ ناو كۆمەڵگە.

تووشبووان پەشیمانن لەو رێگایەی گرتوویانەتەبەر، حەیدەر وتی “رێگایەكی زۆر خراپم گرتەبەرو هیوادارم كەس  ئەو رێگایە نەگرێتەبەر… من تا سەر ئێسقان پەشیمان”.

تێبینی: ناوی حەیدەر عەلی كە لەڕاپۆرتەكەدا هاتووە خوازراوە

2 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری