ئاسایشی كەركوك: دوو كەس بە تۆمەتی كوشتنی لەمعان دەستگیركران

March 19, 2017 at 6:33 pm

كەركوك، 19ی ئازاری 2017، راگەیاندنی دەستگیركردنی دوو تۆمەتبار بە كوشتنی كچێك فۆتۆ: كاروان ساڵحی

كاروان ساڵحی
بەرێوەبەرایەتی ئاسایش لە شاری كەركوك، دەستگیركردنی دوو كەسی راگەیاند بە تۆمەتی كوشتنی لەمعان خواد، ئەو كچەی لە رۆژی جیهانی ژناندا تەرمەكەی دۆزرایەوە.

نەقیب فەرهاد حەمەعەلی، بەرپرسی راگەیاندنی ئاسایش لە كەركوك ئەمڕۆ یەكشەممە لەكۆنگرەیەكی رۆژنامەوانی ئاشكرایكرد، دوو كەس بە تۆمەتی رفاندن‌و كوشتنی ئەو كچە لەلایەن هێزەكانیانەوە دەستگیركراوە‌و بەوتەی ئەو “دانیان بە تاوانەكەدا ناوە”.

تۆمەتباری یەكەم بە پێی ئەو زانیارییانەی هێزەكانی ئاسایش خستیانەڕوو، لە دایكبووی ساڵی 1988ــەو دانیشتووی گەڕەكی عەسكەری شاری كەركوك بووە، لە ساڵی 2006دا بۆ ماوەی 11 مانگ زیندانی بووە‌و دواتر ئازادكراوە.

یەكێكی تر لە دەستگیركراوەكان، لە تەواوی رووداوەكەدا هاوكاری تۆمەتباری یەكەم بووە‌و بەشدرایكردووە، ئەویش دانیشتووی گەڕەكی قۆریاتی كەركوكە.

نەقیب فەرهاد ئاماژەی بەوەشدا كە لەكاتی رفاندنیدا ئاڵتونی كچەكەیان بردووە‌و فرۆشتوویانە،
دواتریش لەرێی تەلەفۆنەوە داوای پارەیان لە ماڵی لەمعان كردووە.

لەمعان خواد (39ساڵ)، 6-3ی ئەمساڵ لە بەردەم ماڵەكەی خۆی لە گەڕەكی عەرەفەی كەركوك رفێندرا‌و دوو رۆژ دواتر لە رۆژی جیهانی ژناندا (8ی مارس) تەرمەكە بەدەست بەستراوی لەناو تانكییەكی نێو خانوویەكی تەواونەكراودا دۆزرایەوە.

رووداوەكە لەكاتێكدابوو هەمان رۆژ ژمارەیەك رێكخراو بە بۆنەی رۆژی جیهانی ژنانەوە مەراسیمێكیان رێكخست‌و تێیدا جەختیانكردەوە، لە نەهێشتنی توندوتیژییەكان دژی ژنان‌و فەراهەمكردنی مافەكانیان.

ناجێگری دۆخی ئابووری، داب‌ونەریت، هەوڵدان بۆ هێنانەوەی ژنی دووەم ‌و بەزۆر بەشوودان، بەهۆكارە دیارەكانی توندوتیژی دژی ژنان دادەنرێن لە كەركوك.

لە 11 مانگی یەكەمی ساڵی 2016دا 793 حاڵەتی توندوتیژی دژ بە ژنان لەكەركوك تۆماركراوە، ئەوەش بەپێی ئامارێكی لیژنەی مافەكانی مرۆڤ‌ و ژنان لە ئەنجومەنی پارێزگای كەركوك.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری