ژنانی ئاوارە روبەڕوی توندوتیژی دەبنەوە
لەشەش مانگدا زیاتر لە 60 حاڵەت لە كەمپی بەحركە تۆماركراون

April 12, 2017 at 9:56 pm

رۆژهەڵاتی موسڵ، 7ی نۆڤەمبەری 2016، هەڵهاتنی ژنێك بەهۆی شەڕەوە لەگەڕەكی ئینتسار فۆتۆ: رۆیتەرز

فەرمان سادق
لە كەمپی ئاوارەكان، ژنان‌و كچان روبەروی چەندین جۆر توندوتیژی دەبنەوە‌و زۆربەی حاڵەكاتەكانیش بەبێدەنگی دەمێننەوە، بەهۆی زاڵبونی دابونەریت‌و چارەسەركردنیان لەرێی سوڵحی عەشایەرییەوە.

تەنیا لە شەش مانگی كۆتایی ساڵی رابردوودا لە كەمپی ئاوارەكانی بەحركە، زیاتر لە 60 حاڵەتی توندوتیژی جۆراجۆر لەنێویاندا دەستدرێژی سێكسی تۆماركراون، ئەوەش بەپێی راپۆرتێكی دەستەی مافەكانی مرۆڤ بەهاوكاری بەڕێوەبەرایەتی بەرەنگاربوونەوەی توندوتیژی دژی ئافرەتان‌و رێكخراوی پاوو یوئێن دی پی.

ئەو راپۆرتە ئەمڕۆ چوارشەممە 12-4، لە كۆبونەوەیەكدا لە هۆتێل چوارچرا لە شاری هەولێر ئاشكراكرا‌و تێیدا بە شەش لاپەڕە، بە دواداچون‌و ئامارەكانی شەش مانگی كۆتایی 2016ی تایبەت بە رەوشی ژنان لە كەمپی بەحركە، خراونەتەڕوو.

دلێر تارق، ئامادەكاری راپۆرتی رەوشی ژنان‌و ئافرەتانی ئاوارە لەكەمپەكانی سنووری پارێزگای هەولێر دەڵێت ئەوان لە پاڵ توندوتیژیەكاندا، چاودێری پێشێلكارییەكانی دژ بە مافەكانی مرۆڤیش دەكەن.

ئەوەشی بە (كەركوك ناو) وت “ئەركی دەستەی مافەكانی مرۆڤ دروستكردنی هەماهەنگییە لەنێوان رێكخراوەكان و بنكەكانی ناو كەمپەكان تا ژنان‌و ئافرەتان پەنای بۆ ببەن بۆ تۆماركردنی سكاڵا لەسەر حاڵەتەكانی توندوتیژی”.

هەولێر، 12-4-2017، لە سیمینارێكدا ناوەڕۆكی راپۆرتەكە و رەوشی ژنان تاوتوێكران فۆتۆ: فەرمان سادق

بەپێی رایۆرتەكەدا لە ماوەی ئەو شەش مانگەدا، حەوت حاڵەتی گێچەڵی سێكسی‌و دوو حاڵەتی “لاقەكردنی ژنان” تۆمار كراوە، لەگەڵ 11 حاڵەتی توندوتیژی جەستەیی‌و 13 حاڵەتی توندوتیژی دەروونی.

هەروەها شەش حاڵەتی توندوتیژی ئابووری تۆماركراون كە خۆی دەبینێتەوە لەبێبەشیكردن لەكار، رێگریكردن لەچوونەوە دەرەوەی كەمپ، دەستبەسەرداگرتنی پارەی ژنان لەلایەن هاوسەرەكانیانەوە.

ئامادەكاری راپۆرتی رەوشی ژنان‌و ئافرەتانی ئاوارە دەڵێت “ژنان رەوشیان زۆر خراپە، هۆیەكەشی پێكهاتەی كۆمەڵایەتی خەڵكەكەیە كە ژنان بەپلەی دوو تەماشا دەكەن، جگە لەمەش بەشێك لەخێزانەكان پیاوەكانیان لەگەڵدا نین، ئەمانەش بۆ خۆیان كێشەن”.

دلێر تارق ئاماژەی بەوەشدا كە هیچ سكاڵایەك لەسەر دەستدرێژی سێكسی‌و گێچەڵی سێكسی تۆمار نەكراوە، ئەو كێشانە لەدەرەوەی دادگا چارەسەر كراون.

راپۆرتەكە بەشێكی تایبەتە بە توندوتیژی كۆمەڵایەتی‌و نەریتی، لەوانە چوار حاڵەتی هاوسەرگیری پێشوەخت، دوو بەزۆر جیابوونەوە، دوو فرەژنی‌و 16 حاڵەتی جێهێشتنی خوێندن.

پەرێز ستار لەرێكخراوی پاو، یەكێكە لەئامادەكاری راپۆرتەكە‌و بە (كەركوك ناو)ی وت “بەهۆی پابەندبوونی توندیان بە نەریتە كۆمەڵایەتییەكانەوە، بەئاسانی لەناوەرۆكی قانونەكان تێناگەن لەپاراستنی مافی ژنان”.

وتیشی ئەگەرچی سكاڵا تۆمار دەكرێت، بەڵام بەشی زۆریان بەهۆی پابەندییان بەنەریتەوە پەنا دەبنە بەر چارەسەری عەشایەری.

كەمپی بەحركە، بە دوری 10كم ساڵی 2014 لە باكوری رۆژئاوای هەولێر بنیاتنراوە‌و زیاتر لە چوار هەزار ئاوارەی تێدایە، زۆرینەیان خەڵكی موسڵ‌و دیالە‌و ئەنبارن، لەسەدا 49یان لە ژن پێكهاتوون‌و لەنێویاندا، 157 ئافرەت خۆیان سەرۆك خێزانن، بەڵام هیچ ژنێك لە ئیدارەدانی كەمپەكەدا بەشدارنیە.

هەولێر، 12-4-2017، ئامانجی راپۆرتەكە‌و گفتوگۆكان بۆ ئەوەبوو ژنان هانبدەن لەرێی دادگاوە مافەكانی خۆیان وەربگرنەوە فۆتۆ: فەرمان سادق

نەقیبی مافپەروەر لانە شێخ مەموندی، سەرپەرشتیاری یەكەی بەرەنگاربوونەوەی توندتیژی دژی ژنان لەكەمپی كەورگۆسك بۆ (كەركوك ناو) جەختیكردەوە كە بە گشتی رەوشی ژنانی ئاوارە لەروی ئایینی، دەروونی، كۆمەڵگاو توندوتیژی جەستەییەوە “زۆر خراپە”.

“لەناو ئەم كەمپانە بەردەوام لێدان هەیە، هەڕەشەی سێكسی و دووژنی هەیە”.

هەروەها وتی “ئەگەرچی بەردەوام سیمنارو ۆركشۆپیان بۆ دەكرێتەوە بەڵام هێشتا نەگەیشتۆتە ئاستی پێویست كە توندوتیژی نەمێنێت”.

لانە دەڵێت هەرچەندە سكاڵا تۆماركردن هەیە بەڵام رێگریش زۆرە، بە تایبەت لەلایەن كەسوكاری قوربانیەكانەوە، بۆیە “ئاماری سكاڵای تۆماركراو بەراورد بە رووداوە توندوتیژییەكان زۆر كەمترە”.

راپۆرتەكە ئاستەنگ‌و رێگرییەكانی باشبوونی رەوشی ژنانی باسكردووە، لەوانە كلتووری كۆمەڵگە‌و هۆكارە یاساییەكان، ئامانجیشی ئەوەیە لەروی یاسایی‌و دەروونی‌و كۆمەڵایەتییەوە هاوكاری قوربانیەكان بكرێت.

دلیر تارق، ئامادەكاری راپۆرتی رەوشی ژنانی ئاوارە دەڵێت “هەوڵدەدەین ئەو لەمپەڕانە لابدەین كە دەبێتە هۆی دروستكردنی كێشە بۆ ژنان‌و ئافرەتان لەناو كەمپەكان”.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری