حەوت هەزار پزیشك و كارمەند‌ی تەندروستی بۆ موسڵ گەڕاونەتەوە

April 14, 2017 at 11:48 am

موسڵ، 22-3-2017، چارەسەری منداڵێك كە بەهۆی بۆردومانی داعشەوە برینداربووە فۆتۆ: پۆلیسی فیدراڵی

فەرمان سادق
خزر ئەلیاس، سەرۆكی لیژنەی تەندروستی لە ئەنجومەنی پارێزگای نەینەوا ئاشكرایدەكات كە نۆژەنكردنەوەی كەرتی تەندروستی موسڵ پێویستی بە 50 ملیار دینار هەیە، هەرچەندە لە ئێستادا زۆرێك لە نەخۆشخانەو بنكە تەندورستییەكان بەڕوی هاوڵاتیاندا كراونەتەوە‌و 7000 هەزار پزیشك‌و كارمەندی تەندروستی كە ئاوارەی هەرێمی كوردستان بوون گەڕاونەتەوە سەر كارەكانیان.

كەركوك ناو: هیچ ئامارێكتان لایە لەبارەی زیانەكانی ژێرخانی كەرتی تەندروستی موسڵ؟
خزر ئەلیاس: بەدیاریكراوی هیچ دیراسەیەك نییە بەهۆی ئەوەی هێشتا لای راستی موسڵ بەتەواوی ئازادنەكراوەو بەشی زۆری نەخۆشخانە گەورەكانیش كەوتوونەتە لای راست، بۆیە پێویستدەكات دوای ئازادكردنی ئەو ناوچانە لەدەستی داعش دیراسەیەكی سەرتاسەری بۆ ژێرخانی كەرتی تەندروستی بكرێت، ئینجا تێدەگەین قەبارەی زیانەكان چەندن. بەڵام بەگوێرەی بەدواداچوونمان لەبارەی لای چەپی موسڵ‌و ناوچە ئازادكراوەكان دەبینین زیانی گەورە بەر نەخۆشخانەكان كەوتووە نەك بنكە تەندروستییەكان، چونكە وەك دەزانن بنكە تەندروستییەكان ئامێری گرنگ‌و سەرەكی پزیشكی تێدا نییە، بەڵام ئەگەر باسی نەخۆشخانەی سەلام بكەین كە یەكێكە لەگرنگترین نەخۆشخانەكانی نەینەوا، ئەوا 80%ی وێران كراوە.

“نەخۆشخانەی سەلام كە گرنگترین نەخۆشخانەی موسڵە لە سەدا 80ی وێران بووە”

كەركوك ناو: لەسەر بنەمای ناوچە ئازادكراوەكان، دەتوانن بەڕێژەیی بڵێن قەبارەی زیانەكان چەندن؟
خزر ئەلیاس: بێگومان قەبارەی زیانەكان زیاتر لە سەدا 50.

كەركوك ناو: چیتان كردووە بۆ دووبارە چاككردنەوەی بنكە تەندروستی‌و نەخۆشخانەكان لە ناوچە كۆنترۆڵكراوەكان؟
خزر ئەلیاس: لەئێستادا لەكۆی 21 بنكەی تەندروستی لەلای چەپی موسڵ، دوانزە بنكەیان نۆژەنكراونەتەوەو خزمەتگوزاری پزیشكی تێیدا پێشكەشی هاوڵاتیان دەكرێت. جگە لەوە لە جێگەی نەخۆشخانەی سەلام، نەخۆشخانەی شیفا نۆژەنكراوەتەوەو هەموو بەشەكانی تێدایە بۆ پێشوازی لەنەخۆشە جۆر بەجۆرەكان، تەنانەت نەشتەرگەریی‌و بەشی لەدایكبووانیشی تێدایە، هەروەها نەخۆشخانەی ئیبن ئەسیری تایبەت بە نەخۆشییەكانی خوێن ئەویش پێشوازی لەنەخۆش دەكات، جگە لەویش نەخۆشخانەی خەمسا-ش پێشوازی لەنەخۆش دەكات.

كەركوك ناو: ئەی لەبارەی قەزاو ناحییەكان؟
خزر ئەلیاس: بنكە تەندروستییەكانی قەزاو ناحییەكان پێشوازی لە نەخۆش دەكەن، جگە لەمە نەخۆشخانەیەك لە حەمام عەلیل‌و گەیارە هەیە پێشوازی لە نەخۆش دەكەن، هەروەها نەخۆشخانەیەكی سەربازی ئەمریكیش لە حەمدانییە هەیە كە تایبەتە بەسوپا.

خزر ئەلیاس، سەرۆكی لیژنەی تەندروستی لە ئەنجومەنی پارێزگای نەینەوا فۆتۆ: كەركوك ناو

كەركوك ناو: هەوڵەكانی حكومەتی خۆجێی نەینەوا بۆ دووبارە نۆژەنكردنەوەی ژێرخانی تەندروستی شارەكە چی بووە؟ هیچ میزانیەكی تایبەتی بۆ تەرخانكراوە؟
خزر ئەلیاس: بۆ ساڵی 2016 میزانیەی حكومەتی خۆجێی نەینەوا 132 ملیار دینارە، بەڵام تائێستا تەنها سەدا 8ی بەدەست حكومەتی خۆجێی گەیشتووە كە بە نزیكەیی دەگاتە دە ملیار دینار، 10ی ئەم مانگە ئەنجومەنی پارێزگای نەینەوا لەدانیشتنی ئاسایی خۆیدا میزانیەی پێشنیاركراوی پەسندكرد كە 52 ملیار دینار بوو، بۆیە دووبارە ئاوەدانكردنەوەی ژێرخانی كەرتە گشتییەكانی پارێزگای نەینەوا بەو میزانیە ناكرێت، تەنانەت حكومەتی عێراقیش لەتوانایدا نییە، بۆیە ئەگەر پشتگیری سندوقی هاوكارییە نێودەوڵەتییەكان نەبێت ئەوا ناتوانرێت هیچ بكرێت.

“7000 پزیشك‌و كارمەندی تەندروستی بۆ موسڵ گەڕاونەتەوە”

كەركوك ناو: ئەی لەبارەی دەرمان‌و پێداویستی تری پزیشكی؟
خزر ئەلیاس: بەڕێوەبەرایەتی تەندروستی نەینەواو حكومەتی عیراق هاوكات رێكخراوەكانی نێودەوڵەتی توانیویانە دەرمان‌و پێداویستی پزیشكی دابین بكەن، بەڵام لەگەڵ ئەمەش كەموكوڕی هەیە بەتایبەت لەناو كەمپەكاندا هەموو جۆرە دەرمانێك دەستناكەوێت.

كەركوك ناو: ئەی لەبارەی كارمەندو پزیشكی تەندروستی، كێشەتان لەمەدا هەیە؟
خزر ئەلیاس: 7000 پزیشك‌و كارمەندی پزیشكی سەر پارێزگای نەینەوا كە هەموویان ئاوارەی هەرێمی كوردستان بوون، ئێستا گەڕاونەتەوە سەر كار، لە بنكە تەندروستییەكان‌و نەخۆشخانەكانی ناوچە ئازادكراوەكان دەوامی خۆیان دەكەن. جگە لەمەش ئەو كارمەندانەی لەناو موسڵدا مابوون ئێستا ئەوانیش گەڕاونەتەوە سەر كار، بەڵام هێشتا موچەكانیان بۆ خەرج نەكراوە.

كەركوك ناو: لەئێستادا گرنگترین كارێك بۆ كەرتی تەندروستی بكرێت چییە؟
خزر ئەلیاس: وەك دیارە دەبێت پەلەبكرێت لە نۆژەنكردنەوەی ژێرخانی كەرتی تەندروستی نەینەوا، جگە لەمەش چارەسەری ئەو كارمەندو پزیشكانەش بكرێت كە لەكاتی هاتنی داعش بۆ موسڵ نەیانتوانی شارەكە جێبهێڵێن بەهەر هۆكارێك هەبێت، ئەوان ئەگەر لە فلتەری دەزگای ئەمنی دەرچوون‌و هاوكاری داعشیان نەكردووە ئەوا دەبێت تەواوی موچەكانیان بۆ خەرجبكرێت كە ماوەی پێنج مانگە بێ موچە دەوامدەكەن.

فۆتۆ گه‌له‌ری

چاپکردن چاپکردن