هۆشداری دەدرێت لەسەرهەڵدانی قەیرانی ئاو لەبەری چەپی موسڵ

April 20, 2017 at 6:42 pm

موسڵ، 17-4-2017، رۆژانە لەرێی تانكەرەوە ئاو بۆ هاوڵاتیان دابیندەكرێت فۆتۆ: فەرمان سادق

فەرمان سادق، موسڵ
لە بەری چەپی موسڵ، تائێستا هێڵەكانی گواستنەوەی ئاو چاكنەكراونەتەوە‌و بە تانكەر ئاو بەسەر هاوڵاتیاندا دابەشدەكرێت، بۆیە هۆشداری دەدرێت ئەگەر تواناكان زیاتر نەكرێن لە هاویندا خەڵك تووشی گرفت دەبن.

هەرچەندە بەری چەپی موسڵ لە 24-1ی ئەمساڵەوە كۆنتڕۆڵكراوەتەوە، بەڵام وێرانكارییەكان شەڕ زۆربەی خزمەتگوزارییەكان‌و كەرتەكانی تری پەكخستووە‌و تائێستاش، بە تانكەر ئاوی بۆ خەڵك دەگوازرێتەوە.

ئەحمەد مەحمود، فەمانبەرە لەبەڕێوەبەرایەتی ئاوی نەینەوا‌و لەرێی (كەركوك ناو)وە هۆشداریدا “ئەگەر رێكخراوەكانی كۆمەڵگەی مەدەنی تواناكانیان زیاتر نەكەن ئەوا لەوەرزی هاویندا رووبەڕووی كێشەی كەمی ئاو دەبینەوە”.

چوار رێكخراوی مەدەنی، چەند مانگێكە بە هەماهەنگی لەگەڵ بەرێوەبەرایەتی ئاوی نەینەوا بە تانكەر دابەشكردنی ئاوی خواردنەوەیان بەسەر هاوڵاتیانی بەری چەپی موسڵ دەستپێكردووە، بەڵام ئەوەش نەیتوانیووە پێداویستی هاوڵاتیانی پڕبكاتەوە.

ئەحمەد دەڵێت رەنگە ئەو هەوڵانەی هەیە بۆ وەرزی زستان باش بێت بەڵام “بۆ وەرزی هاوین وەك دەزانرێت ئاو زیاتر سەرف دەكرێت‌و پێویستدەكات ئاوی زیاتر دابین بكرێت، بۆیە ئەگەر ئەوە نەكرێت مەترسی كەمی ئاو لەلای چەپی موسڵ سەرهەڵدەدات”.

ئەو ئاوەی بۆ خەڵك دەگوازرێتەوە، پێشتر پشكنینی بۆ دەكرێت‌و بۆ دابەشكردنەكەیشی، بەری چەپی موسڵ كراوە بە چوار ناوچەوە تا هەموو خەڵكی لێی سودمەندبن‌و ئاویان پێبگات.

فەرمانبەرەكەی بەرێوەبەرایەتی ئاو داوا لە حكومەتی خۆجێیی نەینەواو حكومەتی عێراق دەكات هەوڵەكانیان چڕتر بكەنەوە بۆ چاككردنەوەی وێستگەكانی پاڵاوتن‌و دابەشكردنی ئاو.

هەرچەندە سەدان خێزان گەڕاونەتەوە بۆ بەری چەپی موسڵ، بەڵام هێشتا هەزاران هاوڵاتیتر لە ئاوارەییدا دەژین‌و بەهۆی نەبوونی خزمەتگوزارییە سەرەتاییەكانەوە، ناتوانن بگەڕێنەوە.

شێروان دوپردانی، سەرۆكی رێكخراوی ئەلفاف كە بەشداری دابینكردنی ئاو بۆ هاوڵاتیانی موسڵ دەكەن لەرێی تانكەرەوە بە (كەركوك ناو)ی وت “ئیدارەی خۆجێیی نەینەوا لەبری كارئاسانی بۆ رێكخراوەكان، ئاستەنگ و رۆتین دەخەنە بەردەممان”.

لەبارەی وەرزی گەرما‌و مەترسی كەمی ئاو لەموسڵ وتی “بێگومان پلانی هاوینە دەخەینە بەردەم رێكخراوە نێودەوڵەتییەكان بۆ زیادكردنی توانای دابینكردنی ئاو”.

لە موسڵ، هێشتا شەڕ كۆتایی نەهاتووە‌و ماوەی دوو مانگیشە، ئۆپەراسیۆنی كۆنتڕۆڵكردنەوەی بەری راستی شارەكەش بەردەوامی هەیە.

موسڵ، 17-4-2017، هێشتا خزمەتگوزارییەكان بۆ بەری چەپی شارەكە نەگەڕاوەتەوە فۆتۆ: فەرمان سادق

2 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری