رووداوەكانی كەركوك لە هەفتەیەكدا؛ سێ‌ كەس گیانیان لەدەستدا‌و ژمارەیەكی تر برینداربوون

April 21, 2017 at 1:57 pm

كەركوك، لایەنە كوردیەكان هەوڵەكانیان چڕكردۆتەوە بۆ رازیكردنی پێكهاتەكان دەربارەی ریفراندۆم فۆتۆ: كەركوك ناو

كەركوك ناو
سێ‌ كەس گیانیان لە دەستدا، ژمارەیەكی تر برینداربوون‌و چەند حاڵەتێكی توندوتیژی تۆماركراون، ئەوەش تەنیا لە ماوەی چەند رۆژی رابردوودا لە شاری كەركوك، بەهۆی چەندین رووداوێكی جیاوازەوە.

بەپێی سەرچاوەیەكی ئەمنی دوێنێ‌ پێنجشەممە 20-4، گەنجێكی تەمەن 17 ساڵ لە ناحیەی ئاڵتون كۆپری لە باكوری كەركوك، “خۆی هەڵواسیووە”‌و گیانی لە دەستداوە، تائێستاش لێكۆڵینەوە لە رووداوەكە بەردەوامە.

لە رووداوێكی تردا چوارشەممە 19-4، منداڵێكی تازە لە دایكبووی كوڕی تەمەن چوار بۆ پێنج رۆژ لە شەقامی پزیشكان لە كەركوك لەلایەن هێزە ئەمنییەكانەوە دۆزرایەوە، بەپێی بەیاننامەیەكی نەخۆشخانەی منداڵان.

منداڵەكە، لە نەخۆشخانە تەواوی پشكنینە پزیشكییەكانی بۆ كراوە‌و لە ژێر چاودێری تەندروستیدایە، بە پێی بەیاننامەكە كێشە لەقاچەكانیدا هەیە بەڵام دەتوانرێت چارەسەر بكرێت‌و چاكبكرێتەوە.

هەروەها بەپێی بەیاننامەیەكی بەرێوەبەرایەتی هاتوچۆی كەركوك، چوارشەممە 19-4 ئۆتۆمبێلێكی بارهەڵگر لە نزیك پردی هەولێر كەركوك وەرگەڕاوە‌و بەهۆیەوە، شۆفێرەكە گیانی لە دەستداوە.

لە روداوێكی تری هاتوچۆشدا 14ی ئەم مانگە، ئۆتۆمبێلێكی ترێلە خۆی كێشاوە بە ئۆتۆمبێلێكی جۆری ئۆپترا‌و لە ئەنجامدا، چوار كەس برینداربوون.

شەممە 15-4 منداڵێكی تەمەن چوار ساڵ، دوای گەیاندنی بۆ نەخۆشخانەی گشتی شاری كەركوك بەهۆی “بێتاقەتی‌و تەنگەنەفەسییەوە”، لەكاتی وەرگرتنی چارەسەری پزیشكیدا گیانی لەدەستدا‌و كەسوكاریشی سكاڵای یاساییان تۆماركرد.

بەپێی سەرچاوەیەكی ئەمنی لە كەركوك، دوێنێ‌ پێنجشەممە 20-4 چوار منداڵ بە سوكی برینداربوون، بەهۆی بۆردومانی گوندی بەشیر لە سنوری ناحیەی تازە بە هاوەن لەلایەن چەكدارانی داعشەوە.

دووشەممە 17-4یش منداڵێكی تەمەن 10 ساڵان لە گەڕەكی واستی شاری كەركوك، بە وتەی كەسوكاری لە لایەن باوك‌و برایەكیەوە روبەڕوی لێدان بووەوە‌و تەواوی جەستەی برینداربوو، بەهۆی درەنگ گەڕانەوە لە یاریەوە بۆ ماڵەوە، بۆیە لەلایەن هێزە ئەمنییەكانەوە باوكی دەستگیركرا.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری