خانەقین بێ‌ كەنیسەیە
تاكە شوێنی ئاینی كریستیانەكان ئاوارەی تێدایە

December 24, 2017 at 8:15 pm

دیالە، ئایاری 2017، كەنیسەی بەشارە لە خانەقین دەیان ساڵە ئاوارەی تێدایە فۆتۆ: هاورێ‌ ئازاد

هاوڕێ ئازاد
تاكە كەنیسەی كریستیانەكانی خانەقین، دەیان ساڵە ئاوارەی تێدا نیشتەجێیە‌و هاوڵاتی ئەو پێكهاتەیە لە بۆنە‌و مەراسیمەكانیاندا، بە ناچاری روو لە ناوچەكانی تری هەرێمی كوردستان دەكەن.

كەنیسەی بەشارە، دەكەوێتە گەڕەكی پاشا كۆپری لە شاری خانەقین‌و پاش كۆچی كریستیانەكان، لە سەرەتای هەشتاكانی سەدەی رابردووەوە چەند خێزانێكی كەمدەرامەتی موسڵمانی تێدا نیشتەجێ‌ بووە.

ماریا میخائیل، ئافرەتێكی تەمەن 57 ساڵی پێكهاتەی كریستیانی دانیشتووی خانەقینە‌و بۆ (كەركوك ناو) باسی لەوەكرد پێش ئەوەی زۆرینەی پێكهاتەكەیان كۆچ بكەن، لە یاد‌و بۆنەكانیاندا وەك جەژنی قیامەت‌و مەراسیمی هاوسەرگیری، نزیكەی 50 خێزان لەو كەنیسەیەدا كۆدەبوونەوە.

لەئێستاشدا ژمارەیەكی كەم خێزانی ئەو پێكهاتەیە لە خانەقین ماونەتەوە، بەهۆی بوونی ئاوارە لە كەنیسەكە، لە بۆنە‌و مەراسیمە تایبەتییەكاندا سەردانی شوێنە ئاینییەكانی ناوچەكانی تری هەرێمی كوردستان دەكەن.

“بەهۆی نەبونی كەنیسە لە خانەقین، مەسیحیەكان لە بۆنە و مەراسیمە ئاینییەكان ناچارن سەردانی ناوچەكانی تری هەرێمی كوردستان كە كەنیسەی تێدا هەیە‌و لەوێ بەشداری دەكەین لە جەژن و بۆنەكان وەك جەژنی قیامەت و كریسمس دەكەین” ماریا وادەڵێت.

دیالە، ئایاری 2017، كریستیانەكان دەیانەوێت كەنیسەی خانەقین نۆژەنبكرێتەوە یان بكرێتە مۆزەخانە فۆتۆ: هاورێ‌ ئازاد

قەزای خانەقین، سەر بەپارێزگای دیالە‌و بەشێكە لە “ناوچەی جێناكۆك”ی نێوان هەردوو حكومەتی عیراق‌و هەرێمی كوردستان بەپێی ماددەی 140ی دەستور، دانیشتوانەكەی لە كورد‌و عەرەب‌و كریستیان پێكهاتوون.

ئەو خێزانانەی لە كەنیسەكەدا نیشتەجێن، زیاتر لە 30 ساڵە وەكو ئاوارە ژیان بەسەردەبەن‌و ئامادەی بەجێهشتنی ئەو شوێنەن، ئەگەر حكومەت هاوكارییان بكات.

شێروان رەفعەت، هاوڵاتیەكی نیشتەجێی كەنیسەكە‌و بە (كەركوك ناو)ی وت “داواكارم حكومەت هاوكاریم بكات بۆ ئەوەی خانوویەك بكڕم یان دروستی بكەم‌و كەنیسەكە چۆڵبكەم، چونكە هیچ توانایەكی داراییم نییە”.

بەو پێیەی كەنیسەی بەشارە مێژوویەكی دێرینی هەیە، هاوڵاتیانی كریستیانی خانەقین لەگەڵ ئەوەدان دوای گواستنەوەی ئاوارەكان وەكو مۆزەخانەیەك یان ناوەندێكی رۆشنبیری سود لەو شوێنە ببینرێت.

ماریا میخائیل دەڵێت “هیوادارین كەنیسەكە بكرێتە ناوەندێكی رۆشنبیری‌و مۆزەخانە، بۆ ئەوەی هونەرمەندان‌و رۆشنبیرانی خانەقینی سودی لێوەربگرن بۆ ئەنجامدانی چالاكییەكان، هەروەها مێژووی شارەكەمان بپارێزرێت”.

دیالە، ئایاری 2017، كەنیسەی بەشارە لە خانەقین ساڵی 1950 بەفەرمی كراوەتەوە فۆتۆ: هاوڕێ‌ ئازاد

بۆ ئەو داواكارییە‌و چۆڵكردنی كەنیسەكە، هاوڵاتیانی پێكهاتەی كریستیان چەندینجار سەردانی ئیدارەی خانەقین-یان كردووە، بەڵام وەكو ماریا میخائیل ئاماژەی پێدا، هەوڵەكانیان تائێستا هیچ سودێكی نەبووە.

ئەوەش لەكاتێكدایە، بەرپرسانی ئیداری خانەقین ئامادەیی هاوكاری دەردەبڕن ئەگەر لایەنێك شوێنەكە لە ئەستۆبگرێت بە پێچەوانەوە، هۆشداری لەناوچوونی كەنیسەكە دەدەن.

سەمیر محەمەد نور، سەرۆكی ئەنجومەنی شارەوانی خانەقین بە (كەركوك ناو)ی وت “هەر لایەنێك بە فەرمی داوا بكات‌و بڵێت ئێمە بەرپرسیارێتی كەنیسەكە لە ئەستۆ دەگرین‌و نۆژەنی دەكەین‌و دەیگەڕێنینەوە، ئێمە ئامادەی هەموو ئاسانكاری‌و هاوكارییەكین،چونكە پێمانباشە كەنیسەی بەشارە وەكو شوێنەوارێكی دیاری خانەقین بپارێزرێت”.

هەروەها هۆشداریدا ئەگەر ئەو خێزانانەی ئێستا لەنێو كەنیسەكە نیشتەجێن دەربكرێن، پێش ئەوەی لایەنێك بەرپرسیارێتی شوێنەكە وەربگرێت، ئەوا كەنیسەكە چۆڵ دەبێت‌و لەناودەچێت.

كەنیسەی بەشارە، لەسەر روبەری 430 مەتردوجا لەناوەندی قەزای خانەقین، ساڵی 1948 دەست بە دروستكردنی كراوە‌و لە ساڵی 1950دا، بەفەرمی كراوەتەوە.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری