ژنانی دوگیان‌و منداڵی تێدایە
تەندروستی 180 هەزار هاوڵاتی موسڵ لە مەترسیدایە

June 2, 2017 at 8:08 pm

موسڵ، ئایاری 2017، ژنێكی بە تەمەن لەكاتی هەڵاتنیدا لە شەڕی رۆژئاوای شارەكە پشوو دەدات فۆتۆ: رۆیتەرز

كەركوك ناو
رێكخراوی تەندروستی جیهانی، مەترسییەكانی خۆی لەبارەی تەندروستی 180 هەزار هاوڵاتی ناوچەكانی شەڕ لە موسڵ ئاشكرادەكات، لە نێویاندا سەدان ژنی دووگیان‌و هەزاران منداڵ، بۆیە ئامادەكاری پێویست بۆ كاتی ئاوارەبوونیان دەكرێت.

بەپێی راپۆرتێكی رێكخراوی تەندروستی جیهانی‌و سندوقی نەتەوە یەكگرتووەكان بۆ دانیشتوان دەوروبەری 180 هەزار لە پیاو، ژنان‌و منداڵان هێشتا لە بەری راستی موسڵ ماونەتەوە‌و چاودێری تەندروستییان پێناگات، لەكاتێكدا روبەڕوی چەندین نەخۆشی دەبنەوە.

نیگەرانی رێكخراوەكان بۆ ئەوەیە، سەدان كەس بەهۆی شەڕ‌و پێكدادانەكانەوە برینداردەبن، جگە لەوانەی تووشی نەخۆشیە گوزراوەكان دەبن بەهۆی ئاوەوە، لەگەڵ سكچوونی توند‌و وشكبوونەوە‌و بەدخۆراكی.

ئەلتاف موسانی، نوێنەری رێكخراوی تەندروستی جیهانی لە عیراق دەڵێت بەهاناوەچوونی خێرا‌و چارەسەری سەدمە‌و نەخۆشییە هەناوییەكان، لە پێشەنگی كارەكانیاندایە‌و ئامادەكارییان بۆ ئاوارەبونی خەڵكەكە كردووە.

موسڵ، ئایاری 2017، چەندین نەخۆشخانە‌و عیادەی گەڕەك چارەسەری بریندار‌و هەڵاتوانی شەڕ دەكەن فۆتۆ: WHO

رێكخراوە مرۆییەكان، هۆشداری دەدەن لەوەی ژمارەی قوربانیانی نەخۆشی‌و برینداری زیاتر بن، چونكە تائێستا لە نێو ئاوارەكانی بەری راستی موسڵ (لە شوباتەوە بۆ كۆتایی ئایاری ئەمساڵ) نزیكەی حەوت هەزار حاڵەت تۆماركراون.

وەكو ئامادەكارییەك، رێكخراوەكان بۆ پاڵپشتی وەزارەتی تەندروستی عیراق سنوری كارەكانیان فراوانتر كردووە، چەندین ئۆتۆمبێلی فریاكەوتن‌و نەخۆشخانەی گەڕەك‌و كاتی، بە پێویستییە پزیشكییەكانەوە بۆ پێشوازی لە نەخۆش تەرخانكراون.

بەپێی پێشبینییەكان، لە نێو ئەو هاوڵاتییانەی هێشتا لە ناوچەكانی شەڕ ماونەتەوە پێدەچێت هەزاران ژنی دووگیانی تێدابێت، لەكاتێكدا هیچ چاودێرییەكی پزیشكییان نەبووە‌و رەنگە كاتی منداڵبوون، ژیانیان بەوهۆیەوە بكەوێتە مەترسییەوە.

راماناسان بالاكریشان، نوێنەری سندوقی نەتەوە یەكگرتووەكان بۆ دانیشتوان دەڵێت لەبارێكی باشدان بۆ پێشكەشكردنی خزمەتگوزاری تەندروستی‌و چاودێری منداڵبوون لە بەرەكانی پێشەوەی شەڕ، هاوكاری پێویست دابینكراون.

بۆ ژنانی دووگیان‌و منداڵبوون، لەرێی پێنج نەخۆشخانەی منداڵبوون‌و 14 ژوری تایبەت‌و چەندین كلینیكی جێگیر‌و گەڕۆكەوە، لە موسڵ‌و دەوروبەری دەتوانرێت چاودێری‌و خزمەتی پزیشكی پێشكەش بكرێت.

هه‌واڵی دیكه‌..

فۆتۆ گه‌له‌ری

چاپکردن چاپکردن