پارێزگاری هەولێر: مانەوەی خواردنەكە هۆكاری ژەهراویبوونی ئاوارەكانی موسڵ بووە

June 19, 2017 at 12:08 pm

كەمپی خازر، 13-6-2017، بەهۆی خواردنەوە زیاتر لە 800 ئاوارەی موسڵ ژەهراویبوون كە زۆرینەیان ژن‌و منداڵن فۆتۆ: تایبەت بە كەركوك ناو

كەركوك ناو
نەوزاد هادی، پارێزگاری هەولێر، ئاشكرایدەكات كە هیچ دەستێك لە پشت ژەهراویبوونی ئاوارەكانی موسڵەوە نەبووە لە كەمپی خازر، بەڵكو هۆكارەكەی بەهۆی “مانەوەی خواردنەكە بووە بۆ كاتێكی زۆر”.

ئەو وتانەی پارێزگاری هەولێر، لە كۆنگرەیەكی رۆژنامەوانیدا هات كە پێشنیوەڕۆی ئەمڕۆ دووشەممە 19-6 لە هەولێر سازیكرد، سەبارەت بە ئەنجامی بە دواداچوونەكانیان بۆ دۆسیەی ژەهراویبوونی ئاوارەكانی موسڵ.

نەوزاد هادی وتی “بەپێی بەدواداچوونەكانمان بۆ رووداوەكە دەركەوتووە بە ئەنقەست نەبووەو هیچ دەستێكیش لە پشت ژەهراویبوونی ئاوارەكانەوە نییە، بەڵكو پەیوەندی بە مانەوەی زۆری خواردنەكەوە هەبووە كە دراوە بە ئاوارەكان”.

بۆ ئەو مەبەستەش لیژنەكەی پارێزگاری هەولێر راپۆرتی خۆیان ئاراستەی دادوەری لێكۆڵینەوە كردووە، دوای ئەوەی كەیسەكە رەوانەی دادگا كرا.

شەوی 12-6 زیاتر لە 800 كەس لە ئاوارەكانی كەمپی خازر ژەهراویبوون كە زۆرینەیان ژن‌و منداڵ بوون، ئەوەش دوای ئەوەی لەلایەن رێكخراوی ئەعن محتاجینەوە ژەمە خواردنی ئێوارەیان لە رێستۆرانتێكی هەولێر بۆ ئامادەكراو لە كەمپەكی خازر بەسەریاندا دابەشكرا.

نەوزاد هادی، پارێزگاری هەولێر، فۆتۆ: پەیجی رەسمی نەوزاد هادی لە تۆڕی كۆمەڵایەتی فەیسبوك

بەپێی بەدواداچوونەكان “خواردنەكە ماوەیەكی زۆر” ماوەتەوە، كاتژمێر چواری بەیانی دووشەممە 12-6 چێشتلێنەرەكان بۆ دروستكردنی خواردنەكە دەستبەكاربوون‌و كاتژمێر 9 ئامادەبووە، دواتر كاتژمێر یەكی نیوەڕۆ خواردنەكە لە هەولێرەوە بەرەو كەمپەكان بەڕێكراوە كە زیاتر لە كاتژمێرێك دوورە، بۆ ئەوەی فریای خواردنی ئێوارە بكەوێت.

خواردنەكە پێكهاتبوو لە مریشك، برنج‌و فاسولیا، بۆ 2000 ئاوارەی كەمپی خازر ئامادەكرابوو.

بە بڕیاری دادوەر، رۆژی دوای رووداوەكە حەوت كەس لە رێكخراوەكەو رێستۆرانەتەكە دەستگیركران‌و لێكۆڵینەوەیان لەگەڵدا كرا.

كەمپی خازر، لە خۆرئاوای هەولێر، ئاوارەكانی شاری موسڵ لە خۆدەگرێت یەكێكە لە گەورەترین كەمپی ئاوارەكان لەعیراق‌و لەلایەن رێكخراوی خێرخوازی بارزانییەوە سەرپەرشتی دەكرێت.

شەوی ژەهراویبوونەكە، رزگار عوبێد، بەڕێوەبەری كەمپی خازر، بە (كەركوك ناو)ی وت “دوای بەربانگ بە نیو كاتژمێر بەشێكی زۆر لە ئاوارەكان تووشی رشانەوەو سكچوون بوون‌و حاڵیان خراپ بوو، بۆیە بە پەلە دەستكرا بە گواستنەوەیان بۆ نەخۆشخانەی خۆرئاوای هەولێر”.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری