بەغدا حزبێكی كوردی بە دەستبەسەراگرتنی كارگەی چیمەنتۆی كەركوك تۆمەتباردەكات

June 19, 2017 at 2:30 pm

كارگەی چیمەنتۆی كەركوك لە ناحیەی لەیلان لە باشوری خۆرهەڵاتی شارەكە فۆتۆ: راگەیاندنی كارگەی چیمەنتۆی كەركوك

کەرکوک ناو
دادگای رەسافەی بەغدا، بڕیاری دەستگیرکردن بۆ بەڕێوەبەرو سێ کارمەندی کارگەی چیمەنتۆی کەرکوک دەردەکات، بەتۆمەتی دەستبەسەراگرتنی کارگەکە لەڕێی هێزو بە پاڵپشتی حزبێکی سیاسی کوردی، ئەوەش دوای ئەوەی وەبەرهێنەری کارگەکە لە دادگای رەسافەی بەغدا سکاڵا تۆماردەکات.

سکاڵاکە بەپێی چەند نوسراوێکی دادگاو وەزارەتی پیشەسازیی و کانزاکان کە دەست (کەرکوک ناو)، کەوتووە، دوای ئەوە هاتووە، کە وەبەرهێنەرەکە کارمەندێکی کارگەکەی بە ناوی (دانا سەعدوڵڵا سەعید)، بە بەڕێوەبەرو سەرپەرشتیاری کارگەکە دیاریکردووە، بەڵام دواتر دانا سەعدوڵڵا “بە هاوکاری حزبێکی سیاسی کوردی خۆسەپێن هەستاوە بە دەرکردنی وەبەرهێنەری کارگەکەو کارمەندەکان لە کارگەی چیمەنتۆی کەرکوک و خۆیشی لەڕێی ئەو حزبەوە داوایلێکراو بۆ بەڕێوەبردنی کارگەکە”، ئەوەش بەپێی نووسراوێکی وەزارەتی پیشەسازیی و کانزاکانی عیراق کە لە مانگی ئاداری ئەمساڵ ئاڕاستەی پارێزگاری کەرکوک کراوە.

سەرچاوەیەک کە ئاگاداری کێشەکانی کارگەی چیمەنتۆی کەرکوکە، بە (کەرکوک ناو)ی وت “ئەو نووسراوەی وەزارەتی پیشەسازیی و کانزاکانی عیراق، بۆ پارێزگاری کەرکوک دوای ئەوە هاتووە کە لەڕێی هێزەوە رێگریی لەوەبەرهێنەرکە کراوە بچێتە کارگەکەی و هەوڵەکانیشی بۆ چارەسەرکردنی کێشەکە بێسوود بووە، بۆیە لە بەغدا سکاڵای تۆمارکردووە”.

بەپێی نووسراوێکی دادگای لێکۆڵینەوەی کەرادە لە بەغدا، کە لە 6-6ی ئاڕاستەی دادگای تێهەڵچوونەوەی کەرکوک کراوەو کۆپییەکی لای (کەرکوک ناو)ە، تیایدا جەختدەکاتەوە لە بوونی فەرمانی دەستگیرکردن بۆ هەریەک لە دانا سەعدوڵڵا سەعید، غازی عەلی حەمەد، سەباح رەحیم شوكر، وەحید رەمەزان حەمەعەلی بەپێی مادەی 452 سزادانی عیراق.

ئەو مادە یاساییە تایبەتە بە دەستبەسەراگرتنی موڵک و پارە لەڕێی بەکارهێنانی هێزەوە.

سەرچاوەیەک لە پۆلیسی کەرکوک بە (کەرکوک ناو)ی وت “لە 7-6 بنکەی پۆلیسی رەحیماوا، یەکێک لە کارمەندەکانی بە ناوی وەحید رەمەزان حەمە عەلی دەستگیرکردووە… “.

وتیشی “ئەو کەیسە راستەوخۆ لەلایەن بەغداوە سەرپەرشتی دەکرێت، کاری ئێمە تەنها جێبەجێکردنی فەرمانەکانی دادگای کەرکوکە، بەڵام بەڕێوەبەرو دوو کارمەندەکەی تر دەستگیرنەکراون”.

وەزارەتی پیشەسازیی و کانزاکان لە نووسراوەکەیدا نەجمەدین کەریم، پارێزگاری کەرکوک ئاگاداردەکاتەوە لە بوونی ئەو حاڵەتە لە کارگەی چیمەنتۆی کەرکوک، بێ ئەوەی ناوی ئەو حزبە ئاشکرابکات کە بە “خۆسەپێن” وەسفی کردووە.

کارگەی چیمەنتۆی کەرکوک، لە ساڵی 1984 لە ناحیەی لەیلانی سەر بە پارێزگای کەرکوک دروستکراوە، لە ساڵی 2008 بە گرێبەستی 15 ساڵ دراوە بە وەبەرهێنەرێک، بەڵام سەرەتای ئەمساڵ لەڕێی حزبێکی کوردییەوە دەست بەسەر کارگەکەدا دەگیرێت.

کارگەکە لە توانایدایە لە ساڵکێدا دوو ملیۆن تۆن چیمەنتۆ بەرهەمبهێنێت.

3 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری