69 پێشنوێژ‌و وتارخوێن كوژراون
وەقفی سونی لە موسڵ: داعش 160 مزگەوتی خاپور كردووە

July 15, 2017 at 9:01 pm

موسڵ، 2017، یەكێك لەو مزگەوتانەی بەهۆی شەڕ‌و پێكدادانەوە زیانی زۆری بەركەوتووە فۆتۆ: تایبەت بە كەركوك ناو

كاروان ساڵحی
لە بەری چەپی شاری موسڵ‌و قەزا‌و ناحیەكانی ئەو پارێزگایە، 160 مزگەوت خاپور كراون بە دەستی داعش‌و زیاتر 60 مامۆستای ئاینییش كوژراون، بەپێی ئامارەكانی وەقفی سونی.

ئەبوبەكر كەنعان، بەرێوەبەری وەقفی سونی پارێزگای موسڵ، لە چاوپێكەوتنێكدا لەگەڵ (كەركوك ناو) ئاماژە بە زیانەكانی داعش‌و شەڕی دەركردنی ئەو رێكخراوە دەكات، بە تایبەت بۆ سەر شوێنە ئایینەكانی ئیسلام.

“لەسەرتاسەری پارێزگاكە بەقەزاو ناحیەكانیەوە دوو هەزار‌و 795 مزگەوت هەیە، لەو ژمارەیە تەنیا لەبەری چەپی موسڵ بەقەزاو ناحیەكانیەوە 155 بۆ 160 مزگەوت لەسەدا 100 خاپووركراون لەلایەن داعشەوە”.

بەرێوەبەری وەقفی سونی دەڵێت، هێشتا ئاماری وردی ناوچەكانی تر بە تایبەت بەری راستی موسڵ لەبەردەستدا نییە‌و لەوێش، ژمارەیەك زۆر مزگەوت خاپوركراون.

بەری راستی موسڵ، نزیكەی پێنج مانگ شەڕ‌و پێكدادانی زۆر توندی تێدابوو، بەراورد بە بەری چەپ زیانی زۆر زیاتر بەر ژێرخانی گشتی‌و دام‌و دەزگا‌و خانووەكان كەوتووە، لەنێویاندا تەقاندنەوەی مزگەوتی گەورەی نوری‌و مناری مێژوویی حەدبا لە حوزەیرانی ئەمساڵدا.

وەكو ئەبوبەكر كەنعان وتی “تائێستا 69 كەس لە پیاوانی ئاینی‌و پێشنوێژ‌و وتارخوێن شەهیدكراون لەلایەن تیرۆریستانی داعشەوە”.

ئەبوبەكر كەنعان، بەریوەبەری وەقفی سونی لە پارێزگای موسڵ فۆتۆ: تایبەت بە كەركوك ناو

داعش لەگەڵ دەستبەسەرداگرتنی موسڵ‌و راگەیاندنی خەلافەت، رێنمایی‌و یاسای تایبەت بەخۆی دەركرد دەربارەی پرسە ئاینییەكان‌و هەركەسێك پێوەی پابەند نەبوایە، روبەڕوی سزای توند دەبووەوە.

وەقفی سونی لە موسڵ، پێش سەرهەڵدانی داعش سێ‌ هەزار فەرمانبەری هەبووە لە پێشنوێژ‌و وتارخوێن‌و قورئانخوێن‌و كارگوزار‌و بەشەكانی تر، بەوتەی بەرپرسانی وەقفەكە تەنیا نزیكەی 15 كەس پەیوەندییان بەرێكخراوەكەوە كردووە لە سێ‌ ساڵی رابردوودا.

ئەبوبەكر كەنعان جەختیكردەوە “لەلایەن ئێمەوە لێكۆڵینەوە كراوە‌و ئەوانەی پەیوەندییان بە داعشەوە هەبووە دەركراون”، ئەوەشی رونكردەوە كە داعش دەستبەجێ‌ هەموو فەرمانبەرانی دەركردوە‌و كەسانی خۆیان لە جێگایان داناوە.

لەئێستادا وەقفی سونی داوای گەرانەوەی فەرمانبەرەكانی دەكات تا ژیانی ئاسایی لەشارەكە دەستپێبكاتەوە، بۆ ئەوەش هۆشداریدەدەن “تا یەكشەممە 16-7 دوامۆڵەتە پێشنوێژ‌و وتارخوێن‌و فەرمانبەران بگەڕێنەوە سەر كارەكانیان بەپێچەوانەوەی ئەوەی ئامادەنەبێت فەسڵ دەكرێت”.

ئەركی سەرەكی پیاوانی ئاینی وەكو بەرێوەبەری وەقفی سونی باسیكرد، بۆ قۆناغی ئێشتا گەڕانەوەی ئاشتی‌و پێكەوەژیانە، بۆیە هەوڵدەدەن وتاری یەكگرتوو بە نوێژی هەینی ئامادەبكەن‌و تائێستاش 24 جار ئەو هەنگاوە جێبەجێكراوە.

ئەبوبەكر كەنعان وتی “بەردەوام كۆبونەوەمان هەیە لەگەڵ پێشنوێژ‌و وتارخوێنەكان دەربارەی ووتارەكانیان، لەبەرئەوەی نابێت لەچوارچێوەی یاسا‌و رێسای وەقف دەربچێت، چونكە ئێمە ئامانجمان ئەوەیە هەموو هاوڵاتیەك وەكو براو ئازیزی یەك بژین لەم شارە‌و بەدووربن لەململانێ‌و تۆڵەسەندنەوە”.

پارێزگای موسڵ، ناوچەی نیشتەجێی فرەپێكهاتە‌و نەتەوەیە، بەهۆی حوكمڕانی داعش‌و بەربڵاوی توندوتیژی بۆ سێ‌ ساڵ، هەوڵەكان چڕكراونەتەوە پێكەوەژیانی ئاشتییانە لەقۆناغی نوێدا جێگەی ململانێكانی رابردوو بگرێتەوە.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری