سبەی تاقیكردنەوەكانی موسڵ دەستپێدەكات
23 هەزار قوتابی سێی ناوەندی‌و شەشی ئامادەیی بەشدارن

July 17, 2017 at 8:28 pm

موسڵ، تەمموزی 2017، تاقیكردنەوەكانی قۆناغی سەرەتایی لە بەری چەپی شارەكە فۆتۆ: وەزارەتی پەروەردە

كاروان ساڵحی
بڕیارەی سبەینێ‌ سێشەممە، تاقیكردنەوەكانی كۆتایی ساڵ بۆ هەردوو قۆناغی سێیی ناوەندی‌و شەشی ئامادەیی لە بەری چەپی موسڵ دەستپێبكات‌و بەپێی ئامارەكانی پەروەردە، 23 هەزار قوتابی بەشداری دەكەن.

ئەنجامدانی كۆتایی ساڵی تاقیكردنەوەكان لە موسڵ، هەفتەیەك دوای كۆنتڕۆڵكردنەوەی تەواوەتی شارەكە دێت بەڵام بەری راست ناگرێتەوە، بەوپێیەی هێشتا پرۆسەی خوێندن لەوێ‌ كۆتایی نەهاتووە.

لەمیس ئەحمەد، بەرێوەبەری پەروەردەی موسڵ بە (كەركوك ناو)ی وت “سبەینێ سێشەممە 18-7 بە بەشداری 23 هەزار قوتابی تاقیكردنەوەكانی كۆتایی ساڵ بۆ سێی ناوەندی‌و شەشی ئامادەیی دەستپێدەكات”.

بۆ ئەنجامدانی تاقیكردنەوەكان، 320 هۆڵ ئامادەكراون‌و ئەو پرۆسەیەش تەنیا بۆ بەری چەپی موسڵە، بەوتەی بەرێوەبەری پەروەردە بەری راستی شارەكە تائێستا خوێندنیان تەواو نەكردووە‌و هەركاتێك تەواو بوون، وەزارەتی پەروەردە كاتەكەی دیاریدەكات.

موسڵ، تەمموزی 2017، تاقیكردنەوەكانی قۆناغی سەرەتایی لە بەری چەپی شارەكە فۆتۆ: وەزارەتی پەروەردە

ئەوەش لەكاتێكدایە ئەمڕۆ دووشەممە 17-7، تاقیكردنەوەكانی قۆناغی سەرەتایی بە بەشداری 80 هەزار قوتابی لە بەری چەپی موسڵ، كۆتاییهات.

رەعد رەمەزان جبوری، سكرتێری لقی موسڵی یەكێتی مامۆستایان بە (كەركوك ناو)ی وت “لەئێستادا ژمارەیەك مامۆستا وەكو چاودێری هۆڵەكانی تاقیكردنەوە بۆ سبەینێ ئامادەكراون، بەڵام كێشەیەك هەیە‌و بەشێك لەو مامۆستایانەی ناویان وەكو چاودێر دەرچوە تائێستا (تسریح ئەمنی) پشكنین‌و رێگەپێدانی ئەمنییان بۆ نەگەڕاوەتەوە”.

داواشیكرد بەزوترین كات چارەسەری ئەو كێشەیە بكرێت‌و موچەكانیان بۆ بگەڕێتەوە.

هەزاران مامۆستا‌و فەرمانبەری دامودەزگاكانی موسڵ، بەهۆی سەرهەڵدانی داعش‌و ئەگەری پەیوەندی بەو رێكخراوەوە خرانە هەڵمەتی بەدواداچونی ئەمنی‌و مانگانە، سەدان كەسیان دوای رێكارەكان موچەكانیان بۆ دەگەڕێندرێتەوە.

شەڕی داعش، زیانی زۆری لە كەرتی گشتی بە تایبەت قوتابخانەكان داوە‌و جگە لەوە، خزمەتگوزارییەكانی وەكو ئاو و كارەبا كەمن یان نییە، ئەوەش كێشەیەكی تری هۆڵەكانی تاقیكردنەوەیە.

سكرتێری لقی موسڵی یەكێتی مامۆستایان وتی “تاقیكردنەوەكانی قۆناغی سەرەتای كێشەی نەبونی كارەبا هەبوو لە هۆڵەكان، هەروەها ئاوی خواردنەوەش نەبوو، ئەمە كێشەیەكی گەورەیە‌و هیوادارین لەتاقیكردنەوەكانی سبەینێ چارەسەر كرابن”.

بەری چەپی موسڵ، لە مانگی 1ی ئەمساڵەوە كۆنتڕۆڵكراوەتەوە‌و بەشێكی زۆر لە خوێندنگەكان، بەڕوی خوێندكاراندا كراونەتەوە‌و بەری راستی شارەكە، 10ی ئەم مانگە كۆنتڕۆڵكردنەوەی تەواوەتی راگەیەندرا.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری