بەوێنە: دەستپێكردنی گەشتی حەج
لە كەركوكەوە 1400 كەس بە فڕۆكە‌و پاس دەچنە سعودیە

August 1, 2017 at 10:10 pm

كەركوك، 1-8-2017، بەرێكەوتنی یەكەم كاروانی هاوڵاتیان بۆ بەجێهێنانی حەج لە سعودیە فۆتۆ: كاروان ساڵحی

كاروان ساڵحی
لە كەركوكەوە، یەكەم كاروانی هاوڵاتیان بۆ بەجێهێنانی حەج بەرەو سعودیە بەرێكەوتن‌و بۆ ئەمساڵ، هەزار‌و 400 دانیشتوی شارەكە لەو رێوڕەسمە ئایینەدا بەشداری دەكەن.

یەكەم كاروانی ئەوانەی ناویان بۆ حەج گەڕاوەتەوە، ئێوارەی ئەمڕۆ سێشەممە بە ئۆتۆمبێلی نەفەرهەڵگر (پاس) بەرەو بەغدا بەرێكەوتن، تاوەكو لەوێیەوە بچنە ناو خاكی سعودیە، دواتر بگەنە شاری مەككە.

عەلی مەردان حەیدەر، بەرێوەبەری دەستەی حەج‌و عەمرەی كەركوك بە (كەركوك ناو)ی وت “رێژەی گشتی حاجیانی كەركوك بۆ ئەمساڵ 1400 كەس دەبێت لە هەردوو رەگەز”، لەكاتێكدا ساڵانی رابردوو تەنیا 930 كەس بووە بەهۆی كەمكردنەوەی سەدا 20ی پشكی حاجیانی عیراق بە بڕیاری سعودییە كە پەیوەندی بە نۆژەنكردنەوەی بەشێكی كەعبەوە هەبووە.

لەكۆی ژمارەی حاجیانی كەركوك، 1200یان ناویان بەتیروپشك دیاریكراوە، هەروەها 47 حاجی سەر بە زیندانیانی سیاسیە‌و 150 كەسیش لە كەسوكاری شەهیدان دانراون.

زۆرینەی حاجیانی كەركوك، لە رێی فرۆكەوە گەشت دەكەن‌و ئەوانیتر بەپاس دەچنە عەرعەر، تا بپەڕنەوە خاكی سعودیە، بە وتەی بەرپرسەكەی دەستەی حەج.

وتیشی ئەوانەی بە فڕۆكە‌و لەڕێی فڕۆكەخانەی سلێمانییەوە گەشت دەكەن بڕی چوار ملیۆن‌و 600 هەزار دیناریان لێوەردەگیرێت، ئەوانەی بە ئۆتۆمبێلیش دەچن دەبێت سێ ملیۆن‌و 900 هەزار دینار بدەن.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری