زبڵ خەریكە سیمای شار دەشێوێنێت
هاوڵاتیانی كەركوك لە كەڵەكەبونی خۆڵ‌و خاشاك نیگەرانن

August 12, 2017 at 2:04 pm

كەركوك، ئابی 2017، كەڵەكەبوونی خۆڵ‌و خاشاك هاوڵاتیان بێزاردەكات فۆتۆ: سۆران محەمەد

سۆران محەمەد
كەڵەكەبوونی خۆڵ‌و خاشاك، خەریكە شەقامەكانی كەركوك دادەپۆشێت‌و سیمای شار تێكدەدات، جگە لەو بۆنە ناخۆشەی بۆتە هۆی بێزای هاوڵاتیان‌و نیگەرانی لێكەوتۆتەوە.

بەپێی بەدواداچونی مەیدانی (كەركوك ناو)، لە زۆربەی گەڕەك‌و تەنانەت شەقامە گشتیەكانی كەركوك، خۆڵ‌و خاشاك بە قەبارەیەكی زۆر كۆبوونەتەوە‌و فڕێنەدراون، بەوتەی هاوڵاتیان ئەو حاڵەتانە چەندینجار دوبارە بونەتەوە‌و شارەوانیش، هۆكاری جیاواز دەخاتەڕوو.

سیروان محەمەد، هاوڵاتیەكی نیشتەجێی گەڕەكە كوردستانە‌و بە (كەركوك ناو)ی وت “بەهۆی زۆربوونی خۆڵ‌و خاشاك لە شەقامەكان، بەشێكی زۆری هاوڵاتیان‌و بەتایبەت منداڵان توشبی نەخۆشی بوون”.

جگە لەو بۆنە ناخۆشەی بڵاویكردۆتەوە، خۆڵ‌و خاشاكی گەڕەكەكان سیاسی شاری تێكدا‌و بە مەترسییەكی جددیش، لەسەر تەندروستی هاوڵاتیان دادەنرێت.

“بەهۆی بۆنی زبڵەكەوە ناتوانین هەناسە هەڵمژین، ئۆتۆمبێلی شارەوانی 15 ڕۆژ جارێك زبڵ هەڵدەگرنەوە، ماوەیەك شەقامەكان‌و شوێنی فڕێدانی زبڵ پاك دەكەنەوە بەڵام دواتر بۆ ماوەی 10 تا 15 ڕۆژ نایەنەوە”، ئەو هاوڵاتییە وای وت.

كەركوك، ئابی 2017، شارەوانی پشوو و لەكاركەوتنی ئامێرەكان بە هۆكارێكی كۆبونەوەی زبڵ دادەنێن فۆتۆ: سۆران محەمەد

بەپێی بە دواداچونەكانی (كەركوك ناو)، لە چەندین شوێن حاوییە (شوێنی تایبەت بە زبڵ) پڕبوون‌و لە چواردەوریدا خۆڵ‌و خاشاكی تر فرێدراوە، لە هەندێك گەڕەكیش شوێنێكی تایبەت نییە‌و لە شۆستەكاندا یان بەردەم باخ‌و شوێنە گشتییەكان، خۆڵ‌وخاشاك بڵاوبونەتەوە.

سەردار عەلی، سەرۆكی شارەوانی كەركوك بە (كەركوك ناو)ی وت “كۆبونەوەی زبڵ‌و خاشاك بە بەردەوامی بوونی نیە، بەڵكو چەند جارێك لە مانگێكدا ڕوودەدن، لە ڕۆژانی پشوو یاخود تێكچوونی ئامێرەی هەڵگردنەوەی زبڵ، لەو حاڵەتانە زبڵێكی زۆر لە گەڕەكەكان كۆدەبێتەوە”.

لەگەڵ ئەوەشدا، سەرۆكی شارەوانی دەڵێت، رۆژانە هاوڵاتیان گلەیی دەكەن لە پیس بوونی گەڕەكەكانیان.

شارەوانی هێشتا قەرزاری كۆمپانیای تایبەت بە هەڵگرتنەوەی خۆڵ‌و خاشاكە، لە ئێستاشدا لەرێی مۆلیدە ئەهلییەكانەوە، مانگانە بڕی سێ‌ هەزار دینار بۆ پاككردنەوەی شار‌و هەڵگرتنی زبڵ، لە هاوڵاتیان وەردەگرێت.

سیروان محەمەد، هاوڵاتیەكەی گەڕەكی كوردستان دەڵێت “ئەو كاتانەی دێن بۆ پاكردنەوە یاخود هەڵگردنەوەی زبڵ، پێویستە پارە بدەین بەو كارمەندانەشی كە زبڵ كۆدەكەنەوە، ئەگەر ئێمە پارەیان بۆ كۆنەكەینەوە نایانە گەڕەكە‌و زبڵ كۆناكەنەوە، هەندێ كۆڵان هەیە بە دوومانگ ئۆتۆمبیلی شارەوانی زبڵەكەكان كۆناكاتەوە”.

كەركوك، ئابی 2017، لەچەندین شەقامدا حاوییەی تایبەت بەخۆڵ‌و خاشاك پڕبون‌و بەتاڵ نەكراون فۆتۆ: سۆران محەمەد

بەشێك لە هاوڵاتیان، خۆڵ‌و خاشاكی خۆیان یاخود گەڕەكەكە، بە ئۆتۆمبێلی تایبەتی خۆیان دەبنە دەرەوەی شار‌و لە شوێنێكی تردا، فرێی دەدەن تا لە نزیك شوێنی نیشتەجێبون‌و ژیانیان كەڵەكە نەبێت.

عەلی سدیق، دانشتووی گەڕەكی ڕەحیماوایە‌و دادوبێدایەتی لەدەست خۆڵ‌و خاشاكی زۆر، چونكە وەكو ئەو دەڵێت لە زۆر گەڕەكی ترەوە زبڵ دەهێنرێتە نزیكی ئەوان فڕێدەدرێت.

“ئۆتۆمبێلی شارەوانی زبڵی كۆڵانەكان پاكناكاتەوە، بۆیە هاوڵاتیانیش بە ناچاری لە شوێنكی تر هاوڵاتیان زبڵ لێرە فڕێدەدەن”، عەلی بۆ (كەركوك ناو) وای وت.

بەوتەی ئەو هاوڵاتییە، بەرپرسیارێتی‌و كەمتەرخەمی تەنیا لە ئەستۆی شارەوانی‌و ئیدارەدا نییە، بەڵكو هاوڵاتیانیش دەگرێتەوە چونكە گرنگی بە پاك‌وخاوێنی گەڕەكەكانیان نادەن.

نیگەرانی هاوڵاتیان بەهۆی كەڵەكەبونی خۆڵ‌و خاشاك، رۆژانە دوبارە دەبێتەوە‌و تەنیا داوایان لە ئیدارەی كەركوك ئەوەیە، لە بۆنی ناخۆش رزگاربكرێن.

سەرۆكی شارەوانی كەركوك، داوا لەهاوڵاتیان دەكات لە پاڵ كارمەندانی پاككەرەوەدا، ئەوانیش رۆڵیان هەبێت‌و لانیكەم، خۆڵ‌و خاشاك لە شوێنی تایبەت یان حاوییەكاندا دابنێن.

سەردار عەلی وتی “لەگەڵ كۆمپانیایەكی تایبەت بە بواری پاككردنەوە گرێبەستمان هەیە‌و لەئەگەری پشتگوێخستنی كارەكانیان سزادەدرێن، بەڵام هاوڵاتیانیش هاوكارمان نین‌و زبڵەكە ناخەنەوە ناو حاوییەكەوە”.

كەركوك، ئابی 2017، شارەوانی داوای هاوكاری لەهاوڵاتیان دەكات بۆ پاكڕاگرتنی شار فۆتۆ: سۆران محەمەد

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری