“ئەمە حەزی منە”
گەنجان بۆ تاتۆكردن گوێ‌ بە رێگرییەكان نادەن

August 12, 2017 at 9:02 pm

كەركوك، تەمموزی 2017، گەنجان وەكو حەزی خۆیان تاتۆ لەسەر جەستەیان دەنەخشێنن فۆتۆ: دیار تاڵیب

دیار تاڵیب
سارا بڕە پارەیەكی زۆری دا بۆ یەك تاتۆ لەسەر جەستەی، بەبێ‌ ئەوەی گوێ بە تانەی كۆمەڵگا‌و رێگرییەكان بدات، چونكە دەڵێت دواجار ئەوە حەز‌و ئارەزووی خۆیەتی.

تانە‌و بە عەیبە سەیركردنی تاتۆ لەلایەن بەشێك لە كۆمەڵگا، وای لەو كچە كەركوكییە كردووە نەیەوێت ناوی راستەقینەی بنوسرێت، بۆیە سارا-ی وەكو ناوێكی خوازراو هەڵبژارد.

“ئەو تاتۆیەی من كردومە، تاتۆیەكی سادەیەو 200 هەزار دیناری تێچووە، بەڕای من شتێكی جوانە ئەگەر بەجوانی بەكاربهێنرێ، ئەمەش حەزو ئارەزوی خۆم بووە”، سارا بۆ (كەركوك ناو) وای وت.

گەنجانی هاوشێوەی سارا، لە شاری كەركوك روو لە زیادبوونە‌و رۆژانە چەندین كەس، سەردانی شوێنی تایبەت بە تاتۆ دەكەن‌و ئەوەی دەیانەوێت، لەسەر بەشێكی جەستەیان دەینەخشێنن.

تەها محەمەد، خۆی وەكو وەستای تاتۆ ناساند‌و دەڵێت پێنج ساڵە وەكو حەزێكی تایبەت سەرقاڵی ئەو كارەیە، دوای ئەوەی بەشی شێوەكاری هونەرەجوانەكانی تەواو كردووە، بە (كەركوك ناو)ی وت “مۆڵەتی تەندروسیمان هەیە، كەرەستەكانمان پاك‌وخاوێن رادەگرین‌و بۆهەر كەسێك دەرزی تایبەت بەكاردەێنین كە جارێكیتر بەكارنایاتەوە”.

ئەو ئامێرە‌و كەرەستانەی لە دروستكردنی تاتۆدا بەكاردەهێنرێن

چەندین بۆیەی جیاواز، دەرزی بە چەندین قەبارە‌و ئامێرێكی نەخشاندن كەرەستە سەرەكییەكانی كاری تاتۆیە، دوای ئەوەی لەرێی كۆمپیوتەرەوە نەخشە‌و وێنەی تاتۆكە دیاریدەكرێت‌و لەسەر كاغەزێك چاپ دەكرێت، ئەو كاغەزە دەخرێتە سەر جەستەی كەسەكە‌و بەو ئامێرە كە دەرزی پێوەدەكرێن، تاتۆكە دروستدەكرێت.

محەمەد عیماد، گەنجێكی كەركوك‌و لە سەر جەستەی چەند تاتۆیەك هەیە، بە (كەركوك ناو)ی وت “هیوایەت‌و حەزی خۆمە، زۆرجار كێشەم بۆ دروستبوە، تانەوتەشەرم لێدەدرێت‌و بەچاوێكی تر سەیر دەكرێم، چونكە كۆمەڵگەی ئێمە تێنەگەیشتون لە حەز‌و كاری تایبەتی”.

“هیوادارم مرۆڤەكان لە دڵەوە بنرخێنرێن نەك جەستە‌و پێست‌و روخسار”، ئەو گەنجە لە حەزی خۆی بەردەوامە‌و دوایین تاتۆی بە 45 هەزار دینار، لە سەر جەستەی نەخشاندووە.

نرخەكانی تاتۆ جیاواز، هەر یەكێك لە پێنج هەزار دینار تا زیاتر لە 700 هەزار دینار دەڕوات، هەندێكات تاتۆ هەیە زۆر زیاتر لەو نرخەشی تێدەچێت.

رێنماییە تەندروستییەكان، زۆربەجار دژ بە ئەنجامدانی تاتۆیە، بە تایبەت لەو شوێنانەی مۆڵەتیان نییە‌و گوماندەكرێت لە پیسی، كەرەستە‌و ئامێرە بەكارهاتووەكانیان.

كەركوك، تەمموزی 2017، نرخی هەر تاتۆیەك لە نێوان پێنج هەزار بۆ 700 هەزار دیناردایە فۆتۆ: دیار تاڵیب

دكتۆر سەدام مەحەمەد خەڵەف، پسپۆڕی پێست بە (كەركوك ناو)ی وت “تاتۆ دیاردەیەكی ناسروشتیەو هەندێجار پەیوەندی هەیە بەلایەنی دەروونی كەسەكەوە،.. بەهیچ شێوەیەك ئەو ئامێرانە لەلایەنی تەندروستیەوە پاكژنین‌و چەندین نەخۆشی دەگوازێتەوە، وەك هەوكردنی جگەر‌و ئایدز‌و نەخۆشی سفلس لەگەڵ نەخۆشیەكانی پێست”.

دروستكردنی تاتۆ، پرۆسەیەكی بە ئازارە‌و ئەو نەخشاندنە بۆ هەمیشەیی دەمێنێتەوە، بۆیە لابردنیشی هاوشێوەی تاتۆ پێویستی بە ئامێر‌و رێگای تایبەت هەیە، كە بەشێكیان لە سەنتەری لێزەر‌و جوانكاری ئەنجامدەدرێن.

وەستا گەنجەكە دروستكردنی تاتۆ لە كەركوك، دەڵێت ئەوان رێوشوێنی تایبەت بە خۆیان هەیە‌و نمونەی ئەوەی هێنایەوە “ئەو كەسانەی دێنە لای ئێمە دەبێ تەمەنیان سەروو 18 ساڵ بێت، خوار ئەو تەمەنە بەهیچ شێوەیەك رێگەی پێنادەین تاتۆ دروستبكات”.

لە نێو كۆمەڵگەدا، بە تایبەت بۆ كچان تاتۆ‌و جوانكارییەكانی هاوشێوەی، پەیوەست بە ئاینەوە كراون‌و بەشێك لە هاوڵاتیان لەو روانگەیەوە، بە رێگەپێنەدراوی دەزانن.

سارا، كاتێك بیری لە دروستكردنی تاتۆكەی كردۆتەوە هەموو رێگرییەكانی لێكداوەتەوە، “كۆمەڵگای ئێمە زۆر شت هەیە قبوڵی ناكەن، یاخود بەراستی نازانن‌و پێیانوایە ئەگەر كەسێك تاتۆی كردبێت لەڕوی رەوشتەوە كەسێكی باش نیە‌و هەم لەڕوی ئاینی قبوڵ نەكراوە”.

ئەو كچە دەڵێت، بڕیاریداوە رێگەی جیاوازی هەبێت‌و بە هێنانەدی حەزەكانی خۆی، هەنگاو بۆ داهاتوو بنێت.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری