هاوپەیمانان داعش لە كەركوك دەكەنە ئامانج
هێرشەكانی ئەو رێكخراوە دژ بە پێشمەرگە زیادیكردووە

August 13, 2017 at 7:22 pm

كەركوك، 12-8-2017، بەسەركردنی شوێنی هێرشەكانی داعش لە داقوق لەلایەن پێشمەرگەوە فۆتۆ: محەمەد ئەڵماس

كەركوك ناو
فرۆكە جەنگییەكانی هاوپەیمانی نێودەوڵەتی، زنجیرەیەك هێرشی ئاسمانی دژ داعش لە ناوچە جیاوازەكانی سنوری كەركوك ئەنجامدەدەن، ئەوەش هاوكاتە لەگەڵ زیادبونی هێرشەكانی ئەو رێكخراوە بۆ سەنگەرەكانی پێشمەرگە.

هاوپەیمانی نێودەوڵەتی دژ بە داعش ئەمڕۆ یەكشەممە 13-8 لە بەیاننامەیەكدا بڵاویكردەوە، فرۆكە جەنگییەكانیان حەوت هێرشی ئاسمانییان لە عیراق ئەنجامداوە‌و بەشێكیان لە سنوری پارێزگای كەركوك، مۆڵگەكانی ئەو رێكخراوەی كردۆتە ئامانج.

بەپێی بەیاننامەكە یەكێك لە هێرشەكان لە قەزای حەویجە بووە‌و باڵەخانەیەكی سەركردایەتی داعشی خاپور كردووە، بۆردومانێكی دیكەش لە گوندی بەشیر بووە، كە پێنج كەرتی كەرەستە‌و پێویستیەكانی نەوتی ئەو رێكخراوەی لەناوبردووە.

هێرشێكی دیكەی فرۆكە جەنگیەكانی عیراق، لە سنوری دوزخورماتوو بووە‌و بەهۆیەوە، حەفارەیەكی داعش‌و كۆگایەكی چەك‌و تەقەمەنی لەناوبراون، هێرشەكانی دیكەش لە سنوری موسڵ‌و ئەنبار‌و سەڵاحەدین بوون.

چڕكردنەوەی هێرشە ئاسمانیەكان دژ بە داعش لە كەركوك لەكاتێكدایە، چەكدارانی داعش لە یەك مانگی رابردوودا چەندینجار هێرشیانكردۆتە سەر سەنگەرەكانی پێشمەرگە.

دوایین هێرشی داعش بۆ سەنگەرەكانی پێشمەرگە، ئەمڕۆ یەكشەممە بووە‌و بە توندی بەرپەرچی دراوەتەوە.

عەمید ئاراز عەبدولقادر، فەرماندەی لیوای 9ی هێزەكانی پێشمەرگە بە (كەركوك ناو)ی وت “ژمارەیەك چەكدار بە قەناس‌و بیكەیسی هێرشیانكردە سەر فەوجی كاكەییەكان لە سنوری داقوق، لەلایەن پێشمەرگەوە وەڵامدرانەوە”.

كەركوك، 13-8-2017، سەردانی نەجمەدین كەریم بۆ سەنگەرەكانی پێشمەرگە فۆتۆ: راگەیاندنی پارێزگار

ئەو هێرشە، دوابەدوای سەردانی پارێزگاری كەركوك هات بۆ سەنگەرەكانی پێشمەرگە، لە سنوری داقوق.

نەجمەدین كەریم لەو سەردانەدا جەختیكردەوە “هێزی پێشمەرگە ڕێگەی نەداوە داعش بستێك لە كەركوك نزیك ببنەوە”، داواشیكرد هەماهەنگی زیاتر هەبێت لە نێوان پێشمەرگە‌و ئاسایش‌و پۆلیس.

كاتژمێر 10ی شەوی 11-8یش، لە دوو گوندی سنوری قەزای داقوقی پارێزگای كەركوكەوە چەكدارانی داعش، بە چەكی قورس‌و خۆكوژەوە هێرشێكی فراوانیان لە دوو قۆڵەوە كردە سەر فەوجی كاكەكییەكان‌و لە ئەنجامدا، زیاتر لە كاتژمێرێك شەڕ‌و روبەڕبوونەوەی توند روویدا.

لە تەمموزی رابردووشدا، چەكدارانی داعش چەند جارێك هێرشیانكردۆتە سەر ناوچە جیاوازەكانی سنوری قەزای داقوق بە دووری 44كم لە باشوری كەركوك، بە تایبەتیش لەگەڵ پێشمەرگەی كاكەیی، روبەڕوبوونەتەوە.

فەوجی كاكەیی سەر بە لیوای 9ی هێزەكانی پێشمەرگەیە، لە چەند ناوچەیەكی باشوری داقوق كە بە “ناوچەی پڕمەترسی دادەنرێن”، جێگیركراون.

26ی مانگی رابردووش، ژمارەیەك چەكداری نەناسراو هەڵیانكوتایە سەر ماڵی خێزانێك لە گوندی تەپەی دووسەر لە خۆرئاوای قەزای داقوق لە پارێزگای كەركوك، چوار كەسیان كوشت‌و چوار كەسی دیكەشیان لەگەڵ خۆیاندا برد.

هۆكارەی سەرەكی هێرشەكەكان، دەگەڕێندرێتە بۆ مانەوەی داعش لە حەویجە‌و ناحیەكانی دەوروبەری، ئەوەش وایكردووە مەترسی بەردەوام لەسەر ناوچەكانی تری كەركوك، هەروەها پارێزگا هاوسنورەكانی وەكو سەڵاحەدین‌و دیالە دروستبكات.

2 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری