مەروان بەكرێكاری یەكەمی زانكۆ بوو
چیرۆكی ئەو گەنجەی بەردەوام لە بەشەناوخۆیی دەژی

August 26, 2017 at 9:09 pm

كەركوك، ئابی 2017، مەروان دوای جێهێشتنی موسڵ بە یەكجاری لە بەشی ناوخۆیی مایەوە فۆتۆ: دیار تاڵب

دیار تاڵب
هێشتا دنیا روناك نەبووەوە مەروان لەخەو هەستا، خواردنی بەیانی بۆ خۆی ئامادەكرد تا بەپەلە بەشە ناوخۆییەكە بەجێبهێڵێت، بەڵام لەبەر چوونە زانكۆ نا، بەڵكو خەمی بوو ئەگەر دوابكەوێت ئەو رۆژە كرێكاریشی دەستنەكەوێت.

ئەو گەنجە تەمەن 24 ساڵە، بەشە ناوخۆییەكانی زانكۆی كەركوك ماڵی بەردەوامێتی دوای بەجێهێشتنی موسڵ-ی زێدی خۆی، لەگەڵ ئەوەی بژێوی ژیانی لە كرێكاریدایە بەڵام لە خوێندنەكەیشیدا هەموو ساڵێك یەكەمی بەشەكەی بووە.

مەروان حسێن، خەڵكی شاری موسڵ‌و بەهۆی ئاوارەییەوە، سەرباری تەواوكردنی زانكۆ بەڵام هێشتا لە بەشە ناوخۆیی دەمێنێتەوە.

كاتژمێر ٤:٣٠ی بەرەبەیان بوو، لە ژورێكی بچوكی بەشە ناوخۆیەكانی كەركوكەوە مەروان بەرەو چێشتخانەكە دەرۆیشت، بەهۆی چاوەڕوانی رۆژێكی زەحمەت‌و دورودرێژ، دەبوو نانێكی باش بخوات، دواتر وەكو هەموو رۆژێك لەگەڵ وەستاكەی بە پاس بەرەو مەیدانی كۆبونەوەی كرێكارەكان بەرێكەوت.

“تائێستا دانەمەزراوم لە هیچ شوێنێك، بەناچاری لە بەشە ناوخۆییەكە دەمێنمەوە‌و كرێكاری دەكەم، لەو رێگەیەوە پارە دەنێرم بۆ خێزانەكەم لە نەینەوا”.

كەركوك، ئابی 2017، مەروان‌و هاورێكانی خواردن دروستدەكەن‌و هەموو كارێكی بەشە ناوخۆیی لە ئەستۆی خۆیانە فۆتۆ: دیار تاڵب

مەروان بە تەنیایە لە كەركوك، دوای ئەوەی لە ناوەڕاستی 2014 موسڵی بەهۆی هێرشەكانی داعشەوە بەجێهێشت، بەڵام كەسوكار‌و خێزانەكەی لەوێ‌ مانەوە.

ئەو گەنجە دەڵێت “بەهەمان شێوەی ساڵانی تر توانیم هاوسەنگی بكەم لەنێوان خوێندنەكەم‌و ئیشكردن، ئەمساڵیش بەهەمان شێوە پلەی یەكەمم بەدەستهێنا لە قۆناغی چوارەم‌و زانكۆم تەواوكرد”.

مەروان لە كولێژی پەروەردە بەشی مێژوو بووە لە زانكۆی كەركوك، وەكو خۆی باسیكرد سەرباری قورسی باری ژیان‌و بژێویی، هەموو قۆناغەكانی یەكەم‌و دووەم‌و سێیەمیشی بە پلەی یەكەمی سەر ئاستی بەشەكە، تەواو كردووە.

بەرلەوەی داعش بگاتە موسڵ، مەروان خوێندكاری زانكۆی كەركوك بوو، بەڵام دوای هێرشەكانی ئەو رێكخراوە بە یەكجاری بوو بەنیشتەجێی بەشە ناوخۆیی‌و سێ‌ ساڵە، جێی نەهێشتووە.

“لەگەڵ هاتنی تیرۆریستانی داعش هەموو شتێك پێچەوانە بووەوە لە نەینەوا، دوكان‌و سەرتاشخانە‌و ئارایشتگایەكان دادەخران، مۆزەخانەكان دەشكێنران، پێشنوێژی مزگەوتەكان دەگۆڕدران، زانیم ژیان لێرە ئەستەمە بۆیە ناچار خێزان‌و كەسوكارم لە نەینەوا جێهێشت” مەروان وای وت.

كەركوك، ئابی 2017، ئەوەی زۆر مەروانی بێتاقەتكرد دووری بوو لە خێزان و كەسوكاری فۆتۆ: دیار تاڵب

لە بەشە ناوخۆیی، بەرگەی سەرمای زستان‌و گەرمای هاوینی گرت، هەموو كارێك خۆی دەیكرد لە چێشتلێنان‌و جلوبەرگ شتن تا پاككردنەوە، لەپاڵ خوێندنی زانكۆ هەر دەرفەتێك هەبوایە بە تایبەت رۆژانی پشوی هەینی‌و شەممە، ئەو لە كرێكاری بوو.

ئەو ماوەیەی لە بەشە ناوخۆیی ماوەتەوە، زۆر كاری تاقیكردۆتەوە‌و جگە لە كرێكاری بیناسازی، شاگردی چێشتخانە بووە یان لە پاركەكان كاریكردووە.

مەروان وتی “لە پاركێك كارم دەستكەوت، عەسری هەموو رۆژێك دەچووم‌و كاتژمێر ٤ی بەیانی دەگەڕامەوە بۆ بەشە ناوخۆیی، دوای سێ‌ كاتژمێر‌و لە 7ی بەیانی دەچووم بۆ دەوامی كۆلێژ، جاری واهەبوو دوای دوو كاتژمێر دەچوومەوە سەر كارێكی تر یان كرێكاریم دەكرد”.

ئەوەی زۆر ئەو گەنجەی بێتاقەت كرد، دوری لە كەسوكاری بوو بۆ ماوەی زیاتر لە سێ‌ ساڵ، هەرچەندە شاری موسڵ كۆنتڕۆڵكراوەتەوە بەڵام هێشتا كەركوك ماڵی ئەوە.

مەروان بە زەحمەتییەكی زۆر خوێندنی بە سەركەوتوویی‌و پلەی یەكەم تەواو كرد، بەڵام ژیانی وەكو خۆیەتی‌و ئومێدی زۆری نیە ئەوە داهاتویەكی باشی بۆ بەدەستبهێنێت، بۆیە جارێكیتر قەڵەمەكەی دانایەوە‌و كەرەستەكانی كرێكاری بەدەستەوە گرت.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری