دوو منداڵ له‌ 16ی ئۆكتۆبه‌ردا له‌ كه‌ركوك به‌ گوله‌ كوژراون

December 6, 2017 at 12:58 pm

كه‌ركوك/ محه‌مه‌د (9 ساڵ)و ئه‌ڤینی (8 ساڵ)، له‌روداوه‌كانی 16ی تشرینی یه‌كه‌مدا به‌ گوله‌ كوژران فۆتۆ: ئه‌رشیفی خانه‌واده‌كه‌

كەركوك – كەركوك ناو

سیروان شامل پۆلیسە لە نەخۆشخانەی گشتی كەركوك، لە كاتی بارگرژییەكانی 16ی ئۆكتۆبەر پێشوازی لە بریندارەكان دەكرد، له‌پڕ و له‌نێو نه‌خۆشخانه‌ هاوسەرەكەی به‌رچاوكه‌وت كه‌ به‌كوڵ ده‌گریا، لەوێ‌ زانی كچ ‌و كوڕەكەی له‌ قوربانییه‌كانی روداوه‌كه‌ن.

بەرەبەیانی ئەو رۆژە شار خرۆشابوو، لەگەڵ پێشڕەوی هێزە عیراقییەكان ‌بۆ “سه‌پاندنی یاسا” له‌ شاره‌كه‌ و كشانەوەی پێشمەرگەدا، هەزاران هاوڵاتی بەرەو هەرێمی كوردستان دەرۆیشتن‌ و ژمارەیەكی زۆر چەكداریش، وەكو خۆبەخش بە شەقامەكاندا بڵاوبوبونەوە، ته‌قه‌ی كوێرانه‌ به‌شێكی زۆری گه‌ڕه‌كه‌كانی گرتبوه‌وه‌.

هاوسەر ‌و منداڵەكانی سیروان، لەگەڵ ماڵی دراوسێیەكیان بە ئۆتۆمبێل بۆ گەیشتن بە شوێنێكی ئارام ماڵی خۆیان بەجێدەهێڵن، هاوشانی هه‌زاران خێزانی تر، بەڵام لە رێگاداو له‌ ناوه‌ندی شار دەستڕێژی گوله‌ ‌له‌ ئۆتۆمبێله‌كه‌یان ده‌كرێت و بەهۆیەوە، كچێكی سیروان دەستبەجێ‌ گیانیان لەدەستدەدات‌ و كوڕێكی بە سەختی بریندار دەبێت.

كه‌ركوك/ 18-10-2017/ محه‌مه‌د سیروان له‌ نه‌خۆشخانه‌ی ئازادی كه‌ركوك رۆژێك به‌ر له‌گیانله‌ده‌ستدانی به‌هۆی كاریگه‌ری گوله‌وه‌ فۆتۆ: خانه‌واده‌كه‌ی

“لە نەخۆشخانەی گشتی كەركوك بووم ‌و پێشوازیمان لە بریندارەكان دەكرد، خێزانەكەم بینی دەگریا، ئەوە بوو لەوێ‌ زانیم فیشەكیان بەركەوتووە”، سیروان بۆ (كەركوك ناو) وای وت.

سیروان باوكی سێ‌ منداڵە، دوو كچ و كوڕێك، ئەڤین-ی تەمەن هه‌شت ساڵ لە شوێنی روداوەكە كۆتایی بە ژیانی دێت ‌و محەمەدی كوڕیشی كە تەمەنی نۆ ساڵه و فیشه‌ك به‌ر سه‌ری كه‌وتووه‌،‌ دوای گەیاندنی بە نەخۆشخانە ‌و سێ‌ رۆژ مانەوەی لەژێر چاودێری پزیشك، (19ی ئۆكتۆبەر) گیانیلەدەستدا.

هێشتا ئامارێكی ورد‌و فەرمی لە بارەی زیانە گیانییه‌كانی 16ی ئۆكتۆبەری ئەمساڵەوە نییە، كاتێك هێزە عیراقیەكان لە ئۆپەراسیۆنێكدا بەناوی سەپاندنی یاسا گەڕانەوە بۆ كەركوك‌ و ناوچەكانی جێناكۆك، كه‌ ئاوارەبونی هه‌زاران خێزانی لێكه‌وته‌وه‌.

ماڵی سیروان شامل لە گەڕەكی كوردستان (فەیلەقی كۆن)ـــە، دەكەوێتە نزیك سەربازگەی كەیوان كە ئامانجێكی سەرەكی هێزە عیراقیەكان بوو، كەمتر لە دوو كیلۆمەتر لەو گەڕەكە دوركەوتونەتەوە‌ و لە سەر شەقامی سەرەكی نێوان هەولێر-كەركوك، لە نزیك گەڕەكی عەرەفە بەر دەستڕێژی گوله‌ كەوتوون.

یاسین (باوكی ئلیاس)، دراوسێی ئەو ماڵەیە ‌و خێزانەكەی سیروان لە ئۆتۆمبێلەكەی ئەودا بوون كاتی رووداوەكە، بە (كەركوك ناو)ی وت “كاتێك تەقە دەستیپێكرد ‌و بارودۆخەكە تێكچوو، دراوسێكان هه‌مویان رۆیشتن ‌و گەڕەكەكەیان بەجێهێشت، پەیوەندیم بە باوكی هەردوو شەهیدەوە كرد‌و وتم منداڵەكانی خۆم دەبەم ئەگەر پێتباشە منداڵەكانی تۆش دەبەم، وتی منداڵەكانی منیش لەگەڵ خۆت ببە”.

كه‌ركوك/19-11-2017/ سیروان شامل له‌سه‌ر گۆڕی هه‌ردوو منداڵه‌كه‌ی محه‌مه‌د و ئه‌ڤین فۆتۆ: كه‌ركوك ناو

“گەیشتینە دووسایدی بەرامبەر گەڕەكی عەرەفە ‌و چەند فیشەكێك بەر جامی دواوەی ئۆتۆمبێلەكە كەوت، ئەڤین دەستبەجێ شەهید بوو، .. بەپەلە گەیاندیانمە نەخۆشخانەی شۆڕش لە گەڕەكی شۆراو، محەمەد گیانی لە دەستنەدابوو، لەوێوە بە ئەمبوڵانس گەیاندرایە نەخۆشخانەی كەركوك”، یاسین دەڵێت گیانلەدەستدانی ئەو منداڵانە لەئۆتۆمبێلەكەیدا رۆژێكی زۆر ناخۆش بووە بۆ ئەو.

پێشێلكاریی‌و روداوەكانی 16ی ئۆكتۆبەر، چەندین بەڵێنی لەبارەوە دراوە بۆ بەدواداچون‌و قەرەبوكردنەوە‌و سزادانی ئەنجامدەرانی تاوانەكان، لە نێویاندا ئامادەیی نیشاندانی هەردوو كۆمسیۆنی باڵای سەربەخۆی مافەكانی مرۆڤ لە عیراق‌و هەرێمی كوردستان، بەڵام دەرەنجامی ئەو هەوڵانە دیارنین.

سەرچاوەیەك لە پۆلیسی كەركوك دەربارەی دۆسیەی كوژرانی ئەڤین‌ و محەمەد بە (كەركوك ناو)ی وت “باوكی هەردوو منداڵەكە لە بنكەی پۆلیس سكاڵای تۆماركردووه‌ دوابەدوای رووداوەكە‌و لێكۆڵینەوەمان دەستپێكردووە”.

ئاڵۆزی بارودۆخی كەركوك، گرفتی بۆ بەخاكسپاردنی تەرمی منداڵەكانیش دروستكرد، ئەڤین هەمان رۆژی روداوەكە برایە سەرقەبران‌ و محەمەدیش دوای سێ‌ رۆژ، لە گۆڕێكدا بە تەنیشت خوشكەكەیەوە سپاردەی خاك كرا.

كه‌ركوك/محه‌مه‌د و ئه‌ڤین له‌گه‌ڵ خوشكه‌ بچوكه‌كه‌یان له‌ ئه‌رشیفی خانه‌واده‌ی ئه‌و قوربانیانیه‌وه‌

 

بەڵێن غالب، پورزای سیروانە باسی رۆژی روداوەكە دەكات كاتێك دوای چەند كاتژمێرێك تەرمی ئەڤینیان وەرگرتۆتەوە لە هۆبەی پزیشكی دادوەری نەخۆشخانەی ئازادی، بەهۆی قەرەباڵغی‌ و داخستنی رێگاكان ناچار دوای كفنكردنی، دوبارە گەراندویانەتەوە بۆ پزیشكی دادوەری.

“دوای چەند كاتژمێرێك، نزیك بانگی ئێوارە (مەغرب) توانیمان لە گۆڕستانی گەڕەكی رەحیماوا بە خاكی بسپێرین”، بەڵێن وای وت.

ماڵی سیروان‌و كەسوكاری لە كەركوك مانەوە‌و نەرۆیشتن، پرسەی دوو منداڵەكەیان لە گەڕەكی شۆریجە دانا.

دوا قسەی سیروان بۆ منداڵەكانی بەرلەوەی بگەڕێتەوە بۆ دەوام، ئەوەبوو تا دەتوانن ئاگاداری خۆیان بن، بەڵام لەرێگەی رۆیشتنیان بۆ شوێنێكی ئارام كۆتایی بە ژیانیان هات‌و ئەوەی بۆ باوكیان مایەوە، تەنیا دوو گۆڕە بە تەنیشتنی یەكترییەوە.

5 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری