تەرمی ژنێك لە ناحیەی شوان دۆزرایەوە
پۆلیس: ئاسەواری فیشەك بە جەستەیەوە هەبووە

December 7, 2017 at 7:19 pm

كەركوك/2016/نەخۆشخانەی ئازادی كەركوك فۆتۆ: كەركوك ناو

سۆران محەمەد _ كەركوك ناو
تەرمی ژنێك لە ناحیەی شوان لە پارێزگای كەركوك دۆزرایەوە، بە وتەی لێپرسراوێكی هێزەكانیش پۆلیسیش ئاسەواری فیشەك بە جەستەیەوە هەبووە.

تەرمی ئەو ژنە، نیوەڕۆی ئەمڕۆ پێنجشەممە 7-12 لە نزیك گوندی تۆمار لە سنوری ناحیەی شوان دۆزراوەتەوە، بەپێی لێكۆڵینەوە سەرەتاییەكانی پۆلیس یەك رۆژ بەسەر كوژراندا تێپەڕ بووە.

عەقید شوان مەجید، بەڕێوەبەری بنكەی پۆلیسی شوان بە (كەركوك ناو)ی وت “لە ڕێگەی تەلەفۆنەوە ئاگاداركراینەوە لە هەبوونی تەرمێك لە نزیگ ڕێگای گوندی تۆمار، پاش گەیشتنی تیمی لێكۆڵینەوە بۆ شوێنەكە دەركەوت ژنێك بە دوو فیشەك كوژراوە”.

“ئەو ژنە فیشەكێك لە پشت سەریەوە هەبوو لە ناوچەوانیەوە دەرچوو بوو، هەروەها فیشكەكێك نراوە بە ناو گوێچكەیەوە”.

لێپرسراوەكەی پۆلیس وتیشی “تەرمەكە نەناسراو بووە، هیچ ناسنامەیەك بەكەسی كوژراو نەبووە، بە پێی لێكۆڵینەوە سەرەتاییەكانیش دەركەوتووە شەوی ڕابردوو ئەو ژنە كوژراوە”.

تەرمی ئەو ژنە، رەوانەی پزیشكی دادوەری كراوە‌و ئێوارەی ئەمڕۆش خانەوادەكەی، بنكەی پۆلیسی شوان لە خاوەندارێتی تەرمەكە ئاگاداركردۆتەوە.

لەسەرەتای ئەمساڵەوە، چەندین روداو و تاوانی جیاواز لە كەركوك تۆماركراون لە نێویاندا ئەو دۆسێیانەی دەرهەق بە ژنان بوون.

بەشێك لە ژنانی كەركوك لە دۆخێكی كۆمەڵایەتی ناهەمواردا ژیان دەگوزەرێنن، بەهۆی ئەوەی لەلایەن هاوسەرەكانیانەوە مافەكانیان پێشێلدەكرێت‌و روبەڕوی لێدان‌و چاوسوركردنەوە دەبنەوە.

ناجێگری دۆخی ئابووری، داب‌ونەرێت، هەوڵدان بۆ هێنانەوەی ژنی دووەم‌و بەزۆر بەشوودان، بەهۆكارە دیارەكانی توندوتیژی دژی ژنان دادەنرێت لە كەركوك.

لە 11 مانگی یەكەمی ساڵی 2016دا 793 حاڵەتی توندوتیژی دژ بە ژنان لەكەركوك تۆماركراوە، ئەوەش بەپێی ئامارێكی لیژنەی مافەكانی مرۆڤ‌ ژنان لە ئەنجومەنی پارێزگای كەركوك.

1 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری