نەینەوا؛ كریستیانەكان دوای سێ‌ ساڵ جارێكیتر ئاهەنگ دەگێڕن

December 24, 2017 at 11:06 pm

نەینەوا، كانونی یەكەمی 2017، هەڵمەتی هاوبەشی موسڵمان‌و كریستیانەكان بۆ پاككردنەوەی كەنیسەكان فۆتۆ: عومەر مەجید

عومەر مەجید
“بڕیارماندا لەسەر داروپەردوی كەنیسەدا روخاوەكەدا ئاهەنگی لەدایكبونی حەزرەتی مەسیح بگێڕین، تا بۆ دنیای بسمەلمێنین ئەو كۆمەڵگەیەی حەزی بە خێرە لەبەردەم هێرشی تیرۆریستی تاریكدا نامرێت”.

توبیا بوترسی سێیەم موشی، مەترانی موسڵ كاتێك ئەو قسانەی دەكرد، لە نێو كەنیسەدا روخاوەكەی بەغدیدا، بە دەم زەردەخەنەوە خاچێكی گەورەی لەسەر سەنگی بەرەو ئاسمان بەرزكردەوە‌و بە دەنگی بەرز وتی “سەرلەنوێ‌ گەڕاینەوە بۆ ئەو خاكەی لێی دەرچوون‌و پێش ئێمەش باوباپیرانمان لێی دەرچوون”.

كەنیسەی گەورەی تاهرە، دەكەوێتە ناوەڕاستی بەغدیدا لە قەزای تلكێف بە دوری 32كم لە باشوری خۆرهەڵاتی موسڵ، هێشتا ئاسەواری وێرانە‌و هێرشی داعش پێیەوە دیارە، پیرۆزیی‌و رەمزەكانی روخێنراون، بەڵام سەرباری ئەوەش لەمساڵدا كریستیانەكان ئاهەنگیان تێدا گێڕا.

جەژنی لە دایكبونی حەزرەتی مەسیح، دوەم گەورەترین بۆنەی ئاینی كریستیانەكانە دوای جەژنی قیامە، لەو بۆنەیەدا كە شەوی 24ی مانگی 12 دەستپێدەكات تا رۆژی 25ی هەمان مانگ، هاوڵاتیان بە پێدانی دیاری، دانانی داری لە دایكبون، دەركەوتنی كەسایەتی بابانوئێل، ئێوارەخوان‌و كۆبوونەوەی خێزانی بەڕێدەكرێت.

مەترانی موسڵ بە (كەركوك ناو)ی وت “ئەو زیانانەی بەر كەنیسەكە كەوتووە زۆر گەورەیە، هەموو دەرگا‌و پەنجەرەكان وێران بوون، دیوارەكان شاهیدن لەسەر سوتان‌و تاڵانی، هیچ شتێك نەماوە بەكەڵكی بەكارهێنان بێت”.

نەینەوا، كانونی یەكەمی 2017، كەنیسەی مار بولسی كلدانی لە بەری چەپی موسڵ فۆتۆ: عومەر مەجید

كریستیانەكانی دەشتی نەینەوا، دوای سێ‌ ساڵ لە هێرشەكانی داعش‌و كۆتاییهاتنی ئەو رێكخراوە، جارێكیتر بە ئازادی بۆنە ئاینییەكان لە ناوچەكانی خۆیان بەرێوەدەبەن.

“من دڵخۆشم، چونكە ئەمساڵ لە خاكی خۆمان ئاهەنگ دەگێڕین، لەو شارەی تێیدا گەورەبووم” رامی ئەبیب رەبیع بۆ (كەركوك ناو) وای وت.

ئەو گەنجەی مەسیحییە دوای دوو ساڵ‌و نیو لە دابڕان‌و ئاوارەیی لە هەرێمی كوردستان، جارێكیتر لەگەڵ خێزانەكەی گەڕایەوە بۆ گەڕەكی موهەندسین لە باكوری موسڵ، لە كاتی ئامادەكردنی بۆ جەژنەكانی سەری ساڵ وتی “لە رۆژانی دابڕان لە شارەكەمان هیچ ئاهەنگێك چێژی نەبوو، تەنیا بەجێهێنانی سروتێكی ئایینی بوو، بەڵام ئەمساڵ هەموو شتێك وەكو جارانی لێهاتۆتەوە”.

رامی هاوڕێیەكی موسڵمانی هەیە‌و بە ئۆتۆمبێلەكەی سەردانی بەرتڵەی كردووە تا كاری جەژنی لە دایكبون بكڕێت، ئەو هاوڕێیەی لە دانان‌و رازاندنەوەی دارەكەشدا هاوكاری كردووە، رامی بە دەنگێكی بەرزی بڕوابەخۆبونەوە دەڵێت “ئەو بەڵگەیە لەسەر ئەوەی موسڵ عیراقێكی بچوكە‌و هەموان تێیدا دەژین بە جیاوازییە ئاینی‌و فكریەكانەوە، پەیوەندی نێوان موسڵمان‌و مەسحیەكانیش زۆر بەهێزە”.

چەكدارانی داعش لەگەڵ دەستبەسەرداگرتنی چەندین ناوچە لە عیراق، سێ‌ پێشنیاریان خستە بەردەم كرستیانەكان ئەوانیش بوون بە ئیسلام، پێدانی جزیە یان جێهێشتنی ماڵەكانیان، بۆیە زۆرینەی خەڵك بە ناچاری ئاوارەی ناوچە ئارامەكان‌و دەرەوەی وڵات بوون.

موسڵ، 2017، داعش زۆربەی كەنیسە‌و شوێنە ئاینییەكانی دەشتی نەینەوای وێران كردووە فۆتۆ: رۆیتەرز

مستەفا خەتیب، چالاكوانی مەدەنی موسڵمان لە موسڵ‌و جێگری رێكخەری گشتی رێكخراوی فەزعەی مرۆیی بە (كەركوك ناو)ی وت “جیاوازی لە نێوان موسڵمان‌و مەسیحی نیە، هەموان ئامادەكاری بۆ ئەم بۆنەیە دەكەن‌و خەڵكی موسڵ دڵخۆشن بە گەرانەوەی كریستیانەكان بۆ خاكی خۆیان.. ئەوان بەردەوام پەیامی ئاشتی‌و خۆشەویستی بڵاودەكەنەوە”.

رێكخراوەكەی خەتیب، 250 خۆبەخشی راسپاردوە بۆ هاوكاری كریستیانەكان لە پاككردنەوە‌و ئامادەكردنی كەنیسەكان لە موسڵ، تا تەواو ئامادەبن بۆ بۆنەكانی جەژنی لە دایكبونی حەزرەتی مەسیح.

كریستیانەكان هاوشێوەی پێكهاتەی ئاینییەكانی تر، لەلایەن داعشەوە روبەروی پێشێلكاری بونەوە‌و بەپێی ئامارێكی نەتەوە یەكگرتووەكان، ژمارەی كرستیانەكانی عیراق، لە ملیۆنێك‌و 500 هەزار كەسەوە بۆ 200-300 هەزار كەس كەمبۆتەوە.

عەبدولحسێن دەراجی، لە نزیك كەنیسەی گەورەی بەغدیدا بە جلوبەرگی سەربازی‌و چەكەوە راوەستابوو لە كاتی ئاهەنگی كریستیانەكاندا، بە (كەركوك ناو)ی وت “ئێمە لێرە بیر لەوەناكەینەوە كام نەتەوە و ئاینی‌و پێكهاتە دەپارێزین، ئەوەی دەیپارێزین وابیردەكەینەوە مرۆڤە‌و پێویستە پارێزگاری لە موڵكی تایبەت‌و گشتی بكەین، ژیانیان بپارێزین‌و بەرگرییان لێبكەین”.

لە پاڵ ئامادەكاری هاوڵاتیاندایە، لایەنە ئەمنییەكانیش هەوڵدەدەن بۆنەكانی سەری ساڵی زایینی بەبێ‌ گرفت تێبپەڕێت، عەبدولحسێن ئومێدی خواست سەقامگیری بۆ هەموو عیراق بگەڕێتەوە‌و ئاهەنگ‌و خۆشحاڵی وڵات بگرێتەوە.

فۆتۆ گه‌له‌ری

چاپکردن چاپکردن