منهەل بە تەنیا پەرستگای گەڕەكەكەیان بنیاتدەنێتەوە

December 28, 2017 at 10:11 pm

نەینەوا، 2017، منهەل ئەبانوب لەبەردەم پەیكەری روخاوی مریەم-دا راوەستاوە فۆتۆ: كەركوك ناو

عومەر مەجید – موسڵ
دەگریا‌و ئازاری دەچەشت، بە حەسرەتەوە بە پەنجەكانی دەستی چەپی ئاماژەی بۆ پەرستگای ماركوركیس كرد‌و وتی “لێرە گەورەبووم، لە منداڵییەوە تا تەمەنی 27 ساڵی چاوم لەسەر ئەوە راهاتبوو لەم شوێنە سروتە ئاینیەكانم جێبەجێبكەم، تا داعش هات‌و دواتر، هەموو پەرستگا‌و كەنیسەكانی وێران كرد”.

منهەل ئەبانوب، هاوڵاتی كریستیانی دانیشتووی موسڵ بەو قسانە گەڕایەوە بۆ یادەوەرییەكانی لە گەڕەكی عەرەبی لە بەری چەپی شارەكە، بە تایبەت پەرستگای ماركوركیس سەر بە كەنیسەی كلدانی كاسۆلیكی كە بە دوری 9كم لە باكوری ناوەندی موسڵ‌و دوای هێرشەكانی داعش لە ناوەڕاستی 2014دا، روبەڕوی روخان‌و سوتان‌و تاڵانی بوەوە.

ئەو هاوڵاتیە لە باسی پەرستگاكەدا بە (كەركوك ناو)ی وت، یەكێك بووە لە جوانترین شوێنە ئایینەكانی موسڵ، زۆر پتەو بنیاتنرابوو، جێی 200 كەسی تێدا دەبووە و بنە جیاوازە ئایینەكانی تێدا بەرێوەدەچوو، لە ناوەڕاست باڵەخانە هۆڵێك هەبوو لەگەڵ دوو مینبەری لە بەرد دروستكراو، جگە لە شوێنی كۆرس و چەندین تایبەتمەندی تر.

منهەل چەند خولەكێك لە قسەكردن‌و جوڵە وەستا، چاوەكانی پڕبون لە فرمێسك كاتێك سەیری داروپەردوی پەرستگاكەی دەكرد، چوە شوێنی پەیكەری روخاوی مریم‌و وتی “سەقفی پەرستگاكە دار بوو، ئەوەش وەكو تابلۆیەكی هونەری وابوو لە نەخش، دیوارەكانیش بە تابلۆ و جوانكاری تر داپۆشرابوون”.

ئەو گەنجە كریستیانە، ئەندازیاری بیناسازییە‌و دوای كۆتایی داعش گەرایەوە بۆ ماڵی خۆی لە گەڕەكی عەرەبی لە موسڵ، دەستیكردەوە بە ئاوەدانكردنەوەی خانوەكەیی‌و بە چەند مانگێك هەموو پێداویستیەكانیشی دانایەوە، بەڵام دڵخۆشییەكی تەواو نەبوو، رۆژانە بە ئازارەوە سەیری پەرستگا روخاوەكەی دەكرد، بۆیە بڕیاریدا بنیاتی بنێتەوە.

داعش لە ساڵی 2014دا وێنەی روخاندن و لابردنی رەمزەكانی ناو پەرستگای ماركوركیسی لە موسڵ بڵاوكردەوە

چەكدارانی داعش سێ‌ پێشنیاریان خستە بەردەم كرستیانەكان ئەوانیش بوون بە ئیسلام، پێدانی جزیە یان جێهێشتنی ماڵەكانیان، بۆیە زۆرینەی خەڵك بە ناچاری ئاوارەی ناوچە ئارامەكان‌و دەرەوەی وڵات بوون.

منهەل لەگەڵ ئەو دەستپێشخەرییەیدا، هەڵمەتێكی راگەیاند بۆ كۆكردنەوەی كۆمەك بە ئامانجی كرینەوەی پێداویستی شوێنە ئایینیەكان، تا بگەڕێنەوە بۆ چالاكییەكانیان‌و دەرگاكانیان بە روی نوێژخوێناندا بكرێتەوە.

كارەكانی بنیاتنانەوەی پەرستگاكە هەفتەیەكە دەستیپێكردووە، لە قۆناغی یەكەمدا منهەل دەیەوێت ژیانی بۆ ئەو شوێنە بگەڕێنێتەوە لە رێی لابردنی داروپەردوی پاشماوەی جەنگ، بۆ ئەوەش رۆژانە 10 كاتژمێر كاردەكات.

ئەو دەڵێت لە قۆناغی دووەمی كارەكانیدا، زیاتر تەركیز دەخاتە سەر بنیاتنانەوەی دیوار‌و سەقف، لەگەڵ گەرانەوەی خزمەتگوزارییەكان و گرنگیدان بە باخچە، پاشانیش هەوڵدەدات بۆ كڕینی پێداویستیەكانی ناو پەرستگاكە تا بە تەواوی بۆ پێشوازی لە خەڵك ئامادەبێت.

هەوڵەكانی ئەو گەنجە لەكاتێكدایە كریستیانەكانی دەشتی نەینەوا، دوای سێ‌ ساڵ لە هێرشەكانی داعش‌و كۆتاییهاتنی ئەو رێكخراوە، ئەمساڵ جارێكیتر بە ئازادی بۆنە ئاینییەكان لە ناوچەكانی خۆیان بەرێوەبرد.

سابت حەبیب یوسف، كاهنی كەنیسەی كرملیس لە موسڵ بە (كەركوك ناو)ی وت “ئەو دەستپێشخەرییەكەی منهەل ئەبانوب دەستیپێكردووە، كاریگەری زۆر گەورەی هەبوو لەسەر تێكشكانی ئەو بەربەرستی ترس‌و دودڵییەی داعش لە دەرونی كریستیانەكاندا جێیهێشت‌و بەهۆیەوە، بەشێكیان تائێستا نەگەڕاونەتەوە بۆ ناوچەكانیان‌و بەشداری سروتە ئاینیەكانیان ناكەن”.

كریستیانەكان هاوشێوەی پێكهاتەی ئاینییەكانی تر، لەلایەن داعشەوە روبەروی پێشێلكاری بونەوە‌و بەپێی ئامارێكی نەتەوە یەكگرتووەكان، ژمارەی كرستیانەكانی عیراق، لە ملیۆنێك‌و 500 هەزار كەسەوە بۆ 200-300 هەزار كەس كەمبۆتەوە.

منهەل لە سەرەتای هەوڵەكانیدایە‌و چاوەڕێی ئەوەیە، لە رۆژانی داهاتوی كارەكانیدا خەڵكی پێكهاتە جیاوازەكان لەگەڵ ئەودا ببنە یەك گروپ بۆ كاركردن ‌و پێكەوە، موسڵ بگەڕێننەوە بۆ شاری پێكەوەژیان‌و سەرچاوەی ئاشتی لە عیراق.

92 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری