لە زیندانەوە بۆ زیندان
چیرۆكی فرۆشیارێكی ماددەی هۆشبەر لە خانەقین

December 29, 2017 at 3:12 pm

دەیان كەس بە تۆمەتی بەكارهێنان‌و بازرگانی ماددەی هۆشبەر لە خانەقین دەستگیركراون وێنە: Flickr

خانەقین – كەركوك ناو
ماوەیەكی كەم دوای ئازادكردنی لە زیندان، ئەحمەد دەستی دایە كارێكی تری پڕ مەترسی بۆ خۆیی‌و چواردەوری، رۆژانە ماددەی هۆشبەری بە نێو گەنجانی خانەقیندا بڵاودەكردەوە.

ئەحمەد ناوی خوازراوی گەنجێكی تەمەن 34 ساڵی خانەقینیە، پێشتر‌و بەهۆی بەكارهێنانی ماددەی هۆشبەرەوە لەلایەن دەزگا ئەمنیەكانەوە دەستگیركراوە، بەڵام جارێكیتر وەكو فرۆشیاری ئەو ماددەیە رۆیشتۆتەوە بەردەم دادگا‌و بە پەشیمانییەوە، باسی چەند ساڵێك بە فیرۆدانی ژیانی خۆی دەكات.

“پێشتر تەنیا بەكارهێنەری ماددەی هۆشبەر بوم، لەلایەن ئاسایشەوە دەستگیركرام‌و زیندانی بوم، دوای ئازادكردنم دیسان تێكەڵ بەو كارە بومەوە بەڵام بە جۆرێكی تر”.

وەكو ئەحمەد باسیكرد، ئەو كەسانەی ماددەی هۆشبەریان پێشتر پێدەفرۆشت، هانیانداوە كاریان لەگەڵدا بكات بۆ دابەشكردنی ئەو ماددەیە، بەوپێیەی بەراورد بەوان كەمتر لەژێر چاودێری دەزگا ئەمنیەكاندایە.

“ئەوكاتە من بێكار بووم، ئەو كارەم بە دەرفەتێك زانی بۆیە قبوڵم كرد، ماوەی نزیكەی شەش مانگ كاری گەیاندنی ماددە هۆشبەرەكانم كرد بۆ كڕیارەكان” ئەحمەد وای وت.

كارەكانی ئەو گەنجە زیاتر لە ناوەندی قەزای خانەقین بوون، كە ماوەیەكە لەو سنورە‌و چەند ناوچەیەكی تری پارێزگای دیالە ماددەی هۆشبەر وەكو چالاكوانان‌و لێپرسراوانی ئەمنی دەڵێن لە هەڵكشاندایە.

دیالە، كانونی یەكەمی 2017، شەقامێكی سەرەكی لە ناوەندی قەزای خانەقین فۆتۆ: هاوڕێ‌ ئازاد

سەرچاوەیەكی ئەمنی لە خانەقین كە داوایكرد ناوی بڵاونەكرێتەوە بە (كەركوك ناو)ی وت “لە خانەقین بەشێوەیەكی بەرچاو كڕین و فرۆشتن و بەكار هێنانی مادە هۆشبەرەكان زیادی كردووە”، یەكێك لە هۆكارەكانی ئەوەشی گەراندەوە بۆ كێشە ئەمنیەكانی چەند مانگی رابردوو، بە تایبەت گۆڕانكاری لە مەلەفی ئەمنی قەزاكە دوای گەرانەوەی هێزە عیراقییەكان لە 16ی ئۆكتۆبەری ئەمساڵ.

هەفتەی رابردوو ئاسایشی نیشتمانی‌و پۆلیسی ناوخۆی عیراق، لە خانەقین دوو كەسیان دەستگیركردن بە بڕێكی زۆر لە ماددەی هۆشبەرەوە، ئەوەش لە چوارچێوەی چەند هەڵمەتێكدا بۆ كۆنتڕۆڵكردنی ئەو بازرگانییە لە سنورەكەدا.

بەپێی بەدواداچونێكی پێشتری لقی خانەقینی یەكێتی لاوانی كوردستان، نزیكەی سەدا 70ی ماددە هۆشبەرەكان لە سنوری ئێرانەوە دەگاتە قەزاكە كە پێكەوە نزیكەی 87كم هاوسنورن، هەروەها سەدا 20ی ئەو ماددەیە لە ناوچەكانی خواروی عیراق‌و سەدا 10یش لە ناوچكەكانی هەرێمی كوردستانەوە دەبرێنە خانەقین.

ئەحمەد لەدەرەنجامی چەند ساڵێك بەكارهێنان‌و فرۆشتنی ماددەی هۆشبەرەوە بۆی دەركەوتووە، بەشێكی زۆری ئەو ماددەیە بە قاچاخ لە ئێرانەوە دەچێتە خانەقین، بە تایبەت كریستاڵ، حەشیش، حەب و شروب.

“زۆربەی كڕیارەكانی لای من بۆ ماددەی هۆشبەر گەنج بوون، ئافرەتیشیان تێدا بوو، بەشێك لە كڕیارەكان لە نێو كافتریا وگازینۆكان بوون، بەشێكی تریان لە نێو دوكانەكانی خۆیان لە نێو بازاڕ ماددە هۆشبەرەكانم پێدەدان”.

ئەحمەد دەڵێت زۆرترین ماددەی بەكارهێنراو لە خانەقین كریستاڵ‌و حەشیش بوو، بەڵام كەسانی كەمدەرامەت‌و بێ‌ پارە زیاتر شروب و حەبیان دەكڕی.

بەپێی بەدواداچونەكانی (كەركوك ناو)، لە ساڵانی 2016 و 2017دا یاریدەدەرێتی ئاسایشی خانەقین سەر بە دەزگای ئاسایشی هەرێمی كوردستان 147 كەسی دەستگیركردوە بە تۆمەتی بازرگانی و بەكارهێنانی ماددەی هۆشبەر، لە ساڵی 2015یشدا ئاسایشی گەرمیان 88 كەسی بە هەمان تۆمەت دەستگیركردووە كە 60یان دانیشتوی خانەقین بوون.

سەرچاوە ئەمنییەكەی خانەقین رونیكردەوە، هەرچەندە هێزە عیراقییەكان لە هەوڵی كەمكردنەوەی بەكارهێنان و بازرگانی ماددە هۆشبەرەكاندان، بەڵام وەكو هێزە ئەمنیەكانی پێشتر ئەزمون‌و شارەزاییان نیە لە سنورەكەدا‌و وەكو پێویست، ناتوانن كۆنتڕۆڵی حاڵەتەكە بكەن.

زۆرینەی دەستگیركراوان بە تۆمەتی بەكارهێنان‌و بازرگانی ماددەی هۆشبەر دراونەتە دادگا، بەپێی ئاماری لایەنە ئەمنییەكان بەشێكیان بە سێ‌ تا 7 ساڵ حوكمدراون، بەشێكیش دوای لێكۆڵینەوە دەركەوتووە بێتاوانە‌و ئازادكراوە، بە گشتیش تۆمەتبارەكان تەمەنیان لە 16 ساڵ تا 50 ساڵە، بەڵام زۆرینەیان گەنجن.

سەروەر عەلی، چالاكوانی مەدەنی لە خانەقین بە (كەركوك ناو)ی وت “هۆكارێكی زیادبوونی ئەو ماددانە دەگەڕێتەوە بۆ چاودێرینەكردنی وردی سنورەكانی نێوان عیراق‌و ئێران لەگەڵ بازگەكانی دەرەوەی خانەقین”.

هەروەها رەخنەیشی لە رۆڵی رێكخراوەكانی كۆمەڵی مەدەنی گرت بەوەی چالاك نەبون لە بڵاوكردنەوەی هۆشیاری بەرانبەر مەترسییەكانی ماددەی هۆشبەر.

ئەحمەد دوای شەش مانگ لە فرۆشتنی ماددەی هۆشبەر گەیشتە كۆتایی رێگا، لە رێی كڕیارێكەوە بانگهێشتی گەڕەكێكی خانەقین دەكرێت‌و لە كاتی كارەكەیدا، لەلایەن دەزگا ئەمنیەكانەوە دەستگیردەكرێت.

ئەو گەنجە خانەقینیە دوای بەسەربردنی چەند ساڵێك سزای زیندانی، ئێستا ئازادە و وەكو خۆی دەڵێت بە تەواوی لە ماددەی هۆشبەر دوركەوتۆتەوە‌و بە هیوای ژیانێكی نوێ‌، دەیەوێت وانە لە هەڵەكانی رابردووی وەربگرێت.

85 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری