كەركوك؛ ژنێك و دوو كوڕی كوژران

January 12, 2018 at 3:38 pm

حەویجە، تشرینی یەكەمی 2017، شەڕی كۆنتڕۆڵكردنەوەی قەزاكە وێرانكاری دروستكردووە فۆتۆ: تایبەت بەكەركوك ناو

كەركوك – كەركوك ناو
ژنێك و دوو كوڕی لە گوندێدی سنوری حەویجە كوژران، ئەوەش لە ئەنجامی هێرشی ژمارەیەك چەكداری نەناسراوەوە كە بە وتەی سەرچاوە ئەمنییەكان، پاشماوەی داعش بوون.

سەرچاوەیەكی ئەمنی ئەمڕۆ هەینی 12-1 بۆ (كەركوك ناو) ئاشكرایكرد، ژمارەیەك چەكدار دزەیانكردۆتەوە گوندی فەرحانییە لە نزیك گوندی سەعدییە لە باشوری قەزای حەویجە، پەلاماری خێزانێكیان داوە.

“چەكدارەكان هەستاون بە كوشانی ژنێك بەناوی خەولە عەبدوڵا لەگەڵ دوو كوڕیدا كە یەكێكیان ناوی رەعد فەتاحە”.

سەرچاوەكە جەختیكردەوە “ئەو چەكدارانە لە پاشماوە و شانەی نوستوی داعش بوون، دوای رووداوەكە هەڵاتوون و هۆكاری ئەوەش، رەنگە ئەوەبێت هەردوو براكە سەر بە یەكێك لە رێكخراوەكانی حەشدی شەعبین”.

كەركوك، 4-1-2017، ئۆپەراسیۆنی هێزە عیراقییەكان لە سنوری حەویجە فۆتۆ: حەشدی شەعبی

ماوەیەكە “چەكدارانی داعش” لە قەزای حەویجە‌ لە باشوری خۆرئاوای كەركوك جموجۆڵیان دەستپێكردۆتەوە و مەترسین بۆ سەر گوندنشینان، هەرچەندە دوو مانگە ناوچەكە لەژێر دەستی چەكدارەكانی داعشدا دەرهێنراوە و ناوبەناو ئاوارەكان بۆ زێدی خۆیان بۆ ئەو ناوچەیە دەگەڕێنرێنەوە.

راكان سەعید جبوری، كۆتایی مانگی رابردوو لە بەیاننامەیەكدا دوابەدوای كوشتنی بەڕێوەبەری پۆلیسی شەریعە لە سنوری حەویجە و كوڕێكی لەگەڵ ژمارەیەك هاوڵاتی تر رایگەیاند كە داعش هێشتا لە سنورەكە چالاكیی هەیە و گورز دەوەشێنێت.

لە سەرەتای مانگی 12ی رابردووش، داعش دوو هێرشی جیاوازی كردە سەر گوندنشینان لە ناحیەی ریاز سەر بە ‌قەزای حەویجە و بەهۆیەوە شەش كەس دوای رفاندنیان كوژراون و تەرمەكانیان سوتێنراون، هەشتی تریش لە روبەڕوبونەوەكاندا برینداربون.

هێزە عیراقییەكان سەرەتای ئەم مانگە ئۆپەراسیۆنێكی فراوانیان دەستپێكرد بە مەبەستی “پشكنین و دەستگیركردنی داواكراوان و سەپاندنی ئاسایش و سیستم لە ناوچەكانی حەویجە، ریاز، رەشاد، زەرگە”، پاككردنەوەی دەیان گوندیان لە سنورەكە راگەیاند.

معن سەعدی، لێپرسراوی مەلەفی ئەمنی كەركوك مانگی رابردو لە كۆنگرەیەكی رۆژنامەوانیدا وتی “چەندین شانەی‌ نوستوی داعش لە سنوری كەركوك ماون و چالاكییان هەیە، بۆیە لەڕێی سێ پشتێنی ئەمنییەوە هەوڵی پاراستنی كەركوك دەدەین”.

186 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری