حەویجە؛ ستەملێكراوان چاوەڕێی بەخاكسپاردنن

January 13, 2018 at 2:48 pm

كەركوك، كۆتایی 2017، ئەندامێكی هێزە ئەمنیەكان تەرمی قوربانیەكانی دەشتی جاعش دەردەهێنێت لە زاب فۆتۆ: كەركوك ناو

یاسین سەبعاوی – كەركوك
“دابەزیم بۆ ناو یەكێك لە بیرەكانی ئاو، لە بەر ترسناكی دیمەنەكە، بۆنی تەرمی شی بووەوە ‌و پاشماوەی ئیسك و پروسكی مرۆڤ نەمتوانی خۆم بگرم”، مازن كاتێك وای وت بۆ ماوەیەك بێدەنگ بوو، هەوڵیدەدا دەرونی خۆی بە گریان ئارام بكاتەوە.

مازن عەلی (42 ساڵ)، دوای كەمێك لە هێوربونەوەی كەوتەوە قسەكردن “تەرمەكان لە دۆڵ ‌و دەشتاییەكاندا بون، بەخاك نەسپێردرابون و شی بوبونەوە، ئەوەی چانسی هەبوایە تەرمی كەسوكاری لەو بیرەدا دەدۆزییەوە كە ئاوە سوێرەكە لە شی بوونەوە پاراستبویی بۆیە دەناسرانەوە”.

ئەو مامۆستایە خەڵكی قەزای حەویجەیە (55كم رۆژئاوای كەركوك)، دەربارەی مەینەتی ئەو خێزانانە بۆ (كەركوك ناو) دوا كە ژمارەیەك لە رۆڵەكانیان لەلایەن داعشەوە دەستگیركرابون، لە كاتی هەڵاتنیاندا لە دەسەڵاتی ئەو رێكخراوە لە ناوچەكانی باشور و رۆژئاوای كەركوك.

“براكەم ‌و كوڕی مامەكەم هەوڵیاندا لە توندوتیژی داعش هەڵبێن، بۆ ئەوەش دەبوو پردی شمیت لە حەویجەوە ببڕن بەرەو هێزە ئەمنیەكان كە ئەوكات لە شەرگات بون” مازن لەوكاتەدا وێنەی برا و ئامۆزاكەی بە جلوبەرگی سەربازییەوە نیشاندەدا، وتی “دوای مانگێك لەگەڕان لە ناوچەكە، شوانێك تەئكیدی بۆمان كردەوە كە داعش هەردوكیانی لە نزیك گوندی ئەسدیرە دەستگیركردووە لە باكوری ناحیەی زاب”.

چەكدارانی داعش، لە ناوەڕاستی 2014دا دەستیانگرت بە سەر ناوچەكانی باشور و رۆژئاوای پارێزگای كەركوك ‌و حوكمڕانی سنورەكەیان كرد، تا هێزە عیراقییەكان لە ئەیلولی 2017دا كۆنتڕۆڵیانكردەوە.

حه‌ویجه‌/11-11-2017/ دۆزینه‌وه‌ی گۆڕێكی به‌ كۆمه‌ڵ به‌دوری 10كم له‌ قه‌زای حه‌ویجه‌ له‌ پارێزگای كه‌ركوك فۆتۆ: كاروان ساڵحی

مازن جارێكیتر قسەكانی بڕی و كەوتە سەر ئەژنۆ، دەگریا و داوای رەحمەت و هاوكاری لە خوا دەكرد، دەڵێت “دەمانزانی داعش رێگەنادات بژین، بۆیە لەیەكەم رۆژی كۆنتڕۆڵكردنەوەی حەویجەوە كەوتینە گەڕان بەدوایاندا لە دەشت و دۆڵەكان و بیرەكانی ئاو”.

داعش لە سەردەمی دەسەڵاتیدا، سەدان هاوڵاتی روبەڕوی سزای جۆراوجۆری مەرگ كردەوە، لە نێویاندا كارمەندانی دەزگا ئەمنیەكان و ئەوانەی لە هەڵاتندا دەستگیردەكران.

ئەو رێكخراوە ناوی ویلایەتی دیجلەی بەكاردەهێنا بۆ ناوچەكانی گەیارە و شەرگات (سەر بە نەینەوا و سەڵاحەدین) لەگەڵ زابی خواروو (رۆژئاوای كەركوك)، زۆرینەی دەستگیركراوەكانیشی دەگواستەوە بۆ ناوەندی ناحیەی گەیارە، بۆی روبەرێكی فراوان لە باكوری زابەوە بەرەو كێڵگە دێمییەكان و بیرە بەجێهێڵدراوەكانی گوندەكانی بەری چەپی شەرگات تا نیحەی غەرابی قەزای مەخور ببووە شوێنی لەسێدارەدان و فڕێدانی تەرمی قوربانییەكان.

ئەحمەد مەلاعبیش، جوتیارێكی دانیشتوی گوندی تەلئەغەرە ‌و رۆژانە، دەیان خێزان و دایك دەبینێت كە بە دوای تەرمی رۆڵەكانیاندا دەگەڕێن لە دۆڵ‌و بیرەكانی ئاو، ئەو خەمباری تەواوی دەموچاوی داپۆشیبوو كاتێك بۆ (كەركوك ناو) قسەیكرد “ئەوەی ئازارم دەدا لەم گوندە دورە دەستەدا، بینینی رۆژانەی ئەو كەس و خێزانانەیە بە دوای رۆڵە‌و خۆشەویستانیاندا دەگەڕێن تا تەرمەكانیان بدۆزنەوە ئەگەر بیانناسنەوە”.

كه‌ركوك/11-11-2017/ شوێنه‌واری شه‌ڕ له‌ ناوه‌ندی قه‌زای حه‌ویجه‌ دوای سێ ساڵ له‌ حوكمڕانی داعش فۆتۆ: كاروان ساڵحی

ئەحمەد دەستەكانی بە یەكتریدا دەكێشا، فرمێسك بە چاوەكانیدا هاتە خوارەوە و بەردەوام بوو، وتی “چەند رۆژێك لەمەوبەر لە كێڵگەكەی خۆم چاوم بە ژنێكی بە تەمەن كەوت، سێ‌ منداڵی پێبوو، هاوسەرەكەی بە دوای تاقە كوڕەكەیاندا دەگەڕا كە تەمەنی لە 25 ساڵ تێنەپەڕی بوو كاتێك داعش دەستگیری كردبوو، بەپێی وەسفەكانی دایكی گەنجێكی ئەسمەر بووە‌و باڵای بەرز نەبووە، ئەو ژنە بەكۆڵ دەگریا و دەیكێشا بە دەموچاوی خۆیدا”.

ئەو ناوچانەی تەرمی ستەملێكراوانی تێدایە، لەلایەن خەڵكەوە دیاریكراون و تەرمە بەجێهێڵدراوەكان، چاوەڕێی كەسانێكن بە خاكیان بسپێرن.

كامیل نەجم، ئەندامێكی حەشدی زابە و جەختیكردەوە لە بونی دەیان تەرم لە بیرەكانی ئاو و چەند دۆڵێك، بە (كەركوك ناو)ی وت “لەچوارچێوەی هەڵمەتێكی گەڕاندا لە باكوری زاب بەرەو گوندەكانی بەری چەپی شەرگات دەیان تەرمی ئەو كەسانەمان دۆزییەوە كە داعش لە سێدارەی دابوون، زۆربەی تەرمەكان لە بیرە جێهێڵدراوەكاندا بوون”.

دەربارەی دۆڵەكانیش وتی “ناتوانم بە دیاریكراوی بڵێم بەڵام نزیكەی 30 تەرم لە دەشتەكاندا هەبون و شی بوبونەوە ‌و شێوەیان نەمابوو یان گیانداری دڕندە بەشێك لە جەستەیانی خواردبوو”.

چەند كەسێكی وەكو كامیل، لە رێی هەڵمەتێكەوە لە فەیسبوك داوایان لە حكومەت ‌و ئیدارە‌و لایەنی پەیوەندیداری پارێزگاكە كرد هاوكارییان بكەن، تا تەرمەكان دەربهێنن و بەخاكیان بسپێرن.

كه‌ركوك/4-10-2017/ ساتی گه‌یشتنی ئاوارەكانی حەویجە بۆ سنوری پێشمەرگە فۆتۆ: سۆران محه‌مه‌د

غازی عوبید جبوری، بەرێوەبەری ناحیەی زاب ئاماژەی بەوەدا سنورەكەیان بەدەست بونی تەرمی ستەملێكراوانەوە دەناڵێنێت و بە (كەركوك ناو)ی وت “دوای شەڕی كۆنتڕۆڵكردنەوە خەڵكمان ئاگاداركردەوە لە تەرمی ئەو كەسانەی داعش لەسێدارەیدان و لە بیرە كشتوكاڵیەكاندا جێهێڵدراون بە تایبەت لە باكوری ناحیەكەوە بەرەو قەزای شەرگات”.

“بەشێك لە خەڵك توانییان تەرمی كەسوكاریان بدۆزنەوە و بە هەوڵی تایبەتی ئەوەی لە تەرمەكە مابۆوە دەریانهێنا و بەخاكیان سپارد”.

داوا لە رێكخراوە مرۆییەكان دەكرێت، گرنگی بەو پرسە بدەن‌و هاوكاری خەڵك بن، تا بەهەماهەنگی لەگەڵ لایەنی حكومیدا بتوانن تەرمی كەسوكاریان بدۆزنەوە.

مەحمود عەباس، سەرۆكی رێكخراوی جیل بۆ گەشەپێدانی مرۆیی لە حەویجە بە (كەركوك ناو)ی وت “كێشەی تەرمی ستەملێكراوان گەورەترین تەحەدییە لەبەردەم رێكخراوەكان بەهۆی زۆری ژمارەكە و بڵاوبونەوەیان لە زۆربەی ناوچەكاندا”.

بە پێویستی زانی بە هەوڵی هەموو رێكخراوە نێودەوڵەتی و ناوخۆییەكان، لەگەڵ حكومەتدا كاربكرێت بۆ دەرهێنانەوەی تەرمەكان و پشكنین، دواتر ناسینەوە و بەخاكسپاردنیان، تا ناسنامەی شەهیدانەیان بۆ دەربكرێت و مافی خێزانەكانیان بپارێزرێت.

71 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری