هاوكار میوزیك بۆ دوزخورماتوو دەژەنێت

January 13, 2018 at 7:25 pm

دیالە، كۆتایی 2017، هاوكار فایەق رۆژانە بە ژەنینی سازەكەیەوە كاتەكانی لە ئاوارەییدا بەسەردەبات فۆتۆ: كەركوك ناو

ژینۆ خەلیل – كەركوك ناو
لەسەر راخەرێكی تەنكی سارد‌و سڕ دانیشتبوو، بە سازەكەی دەستی میوزیكێكی زۆر خەمباری دەژەنی، دەیویست نیشانی بدات چەند ئازار دەچێژێت بەهۆی دوری لە زێدی خۆیەوە.

ئاوازی سازەكەی ئەو گەنجەی دوزخورماتوو، رۆژانە بە خێوەتی ئاوارەكانی زنانەدا بڵاودەبێتەوە، هیچ كاتێكیش ئامادەنیە میوزیكی شاد بە گوێی خەڵكدا بدات.

هاوكار فایەق تەمەنی 25 ساڵە، ماندوو و بێزار دیاربوو، لە نێو جێگای خەوەكەیدا بوو لە خێوەتێكی ئاوارەكانی دوزخورماتوو، ژمارەیەك منداڵیش كۆببونەوە بۆ گوێگرتن لە ئاوازی سازەكەی.

“ئەوەتام كە دەمبینی، هەموو رۆژێك سازەكەم بەدەستمەوەیە ‌و تەنها ئەمە ئیشی منە”، هاوكار لە وەڵامی بارودۆخی ژیانی بۆ (كەركوك ناو) وای وت.

ئەو گەنجە هاوشێوەی هەزاران خێزانی تری دوزخورماتوو، لە دوای 16ی ئۆكتۆبەری 2017وە ئاوارە بووە بەهۆی بارگرژییەكانی عیراق و هەرێمی كوردستانەوە، هێشتا هیچ گرەنتییەك بۆ گەڕانەوەیان شك نابەن.

“شەوان لەبەر سەرما ناتوانین بخەوین، لەكاتی باران بارین خێمەكەمان پڕدەبێت لە ئاو و هەمومان نەخۆش كەوتوین”.

هاوكار خوێندكاری زانكۆ بوەە لەبەشی (ئیدارە مواد) لەزانكۆی كەركوك، 2017 كۆتاساڵی تەواوكردنی خوێندنەكەی بووە بەڵام بەهۆی ئاوارەییەوە نەگەراوەتەوە، هەرچەندە زۆر زیریەك و لێهاتوو بووە.

ئەو دەڵێت “بەهۆی خراپی باری ئابوریمەوە ناتوانم كۆتاساڵی خوێندنم تەواو بكەم، پێشتر لەخورماتو دوكان ‌و ماڵم هەبو، باری داراییم زۆر باش بو، هەم ئیشی باشم هەبو هەم خوێندنەكەشم دەكرد، بەڵام ئێستا ماڵ و دوكانم هەموی سوتێنراوە ‌و تەنانەت پێنج هەزار دیناریشم پێ نییە”.

هێرشی هێزەكانی سوپای عیراق بۆ دوزخورماتوو لە چەند مانگی رابردوودا كوژرانی چەند مەدەنییەكی لێكەوتەوە، ماڵ و بازاڕی خێزانە كوردەكانی قەزاكە روبەڕوی سوتان و تاڵانكردن بوونەوە، ئەوەش بەپێی ئەو بەدواداچوونانەی كە تیمی رۆژنامەنووسانی (كەركوك ناو) لە دوای روداوەكانی 16ی ئۆكتۆبەر ئەنجامیاندا.

دیالە، كۆتایی 2017، لە كاتی ژەنینی سازەكەیدا چەندین منداڵ لە هاوكار كۆدەبنەوە فۆتۆ: كەركوك ناو

هاوكار لە بارێكی دەرونی خراپدا دەژی “كە لەخەو هەڵدەستم ‌و خۆم لەناو خێمەیەكی ساردوسڕدا دەبینمەوە وادەزانم خەونم بینیوە، باوەڕناكەم لەپڕێكدا هەمو ژیانم هەڵگەڕایەوە”.

ئەو رۆژانە بە ژەنینی سازەكەیی و دڵخۆشكردنی منداڵانی ئاوارە بەسەردەبات، “منداڵەكانم زۆر خۆشەوێ‌، زۆر دڵتەنگم بۆیان چونكە لەهەمو مافە سەرەتاییەكانیان بێبەشن، هیچ نەبێت هەوڵ دەدەم بەژەنینی سازەكەم كەمێك دڵخۆشیان بكەم”.

دوزخورماتوو لەگەڵ ناوچەكانی تری جێناكۆك، لە دوای 16ی ئۆكتۆبەری ئەمساڵەوە كەوتنە ژێر دەستی هێزە عیراقییەكان دوای كشانەوەی پێشمەرگە، كاتێك پەیوەندییەكانی بەغدا و هەولێر بەهۆی ریفراندۆمەوە گەیشتە ئەوپەڕی ئاڵۆزی.

“بەزۆری ئاوازی خەمگین دەژەنم، چونكە هیچ دڵم خۆش نییە ‌و ناتوانم ئاوازی شاد بژەنم تا نەگەڕێمەوە دۆخی جارانم، زۆر بیری خورماتوەكەم دەكەم، كۆڵانەكەمان، دوكانەكەم، زانكۆكەكەم، هاوڕێكانم، هەمو ئەمانەم لەدەستچوو” هاوكار وای وت.

185 بینین

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری