به‌وێنه‌: یانه‌ی خاك ده‌یه‌وێت “میسی” تر پێبگه‌یه‌نێت

February 4, 2018 at 10:53 am

كه‌ركوك/4-2-2018/ مه‌شق و راهێنانی فێرگه‌ی یانه‌ی وه‌رزشی خاك بۆ تۆپی پێ فۆتۆ: كاروان ساڵحی

کاروان ساڵحی – کەركوك

یانه‌ی خاكی وه‌رزشی له‌ كه‌ركوك به‌رده‌وامی ده‌دات به‌ فێرگەى تۆپی پێی یانه‌كه‌یی و له‌ ئێستادا مه‌شق به‌ زیاتر له‌ 100 فێرخواز ده‌كه‌ن، ئه‌وه‌ش به‌ ئامانجی پێگه‌یاندنی “میسی” تر وه‌ك میسی كه‌ركوك.

جەمال محه‌مەد، سەرپەشتیارى فێرگەى تۆپی پێی یانەكه‌ به‌ (كه‌ركوك ناو)ی وت “ئه‌و فێرخوازانه‌ی لێره‌ن و مه‌شقده‌كه‌ن ته‌مه‌نیان له‌ نێوان 10 بۆ 18 ساڵانه‌، له‌كاتی ده‌وامی قوتابخانه‌ ته‌نیا رۆژانی هه‌ینی و شه‌ممه‌ مه‌شق هه‌یه‌، به‌ڵام كاتی پشوی خوێندن هه‌موو رۆژێك”.

فێرگه‌ی یانه‌ی خاك له‌ 20-7-2014 دامه‌زراوه‌، له‌وكاته‌وه‌ 500 فێرخواز چونه‌ته‌ فێرگه‌كه‌ و سودیان وه‌رگرتووه‌، “میسی”یه‌كه‌ی كه‌ركوك (یار سه‌عید) كه‌ ئێستا له‌ یانه‌یه‌كی ئیتاڵی-یه‌ له‌و فێرگه‌یه‌وه‌ ده‌ستیپێكرد.

یار سه‌عید ناسراو به‌ “میسی”یه‌كه‌ی كه‌ركوك یه‌كێك بوو له‌ فێرخوازانی فێرگه‌ی یانه‌ی وه‌رزشی خاك

فێرخوازێكی تر به‌ ناوی ئه‌حمه‌د له‌لایه‌ن تیمێكی دۆزه‌ره‌وه‌ی یانه‌ی به‌رشلۆنه‌ بانگهێشتى ئه‌رده‌ن كرا بۆ چاوپێكه‌وتن له‌گه‌لی، شڤان دلێر هه‌ر له‌و فێرگه‌یه‌وه‌ بانگهێشتى هەڵبژاردەى عیراق کراوە بۆ ئاستى تازەپێگەیشتوان، ئه‌وه‌ش هه‌ر به‌ وته‌ی جەمال محه‌مەد.

له‌ ئێستادا زیاتر له‌ 100 فێرخواز له‌ فێرگه‌كه‌ن و دابه‌شی چه‌ند ئاستێك كراون و له‌لایه‌ن پێنج راهێنەره‌وه‌ مه‌شقیان پێده‌كرێت.

جه‌مال وتی “ئامانجی ئێستامان ئامادەکردنى تیمێکه‌ لە ئاستى تازەپێگەیشتوان بۆ بەشدارىکردن لە خولى کوردستان”.

عەبدوڵا سلێمان، سکرتێری یانەی وەرزشی خاک به‌ (كه‌ركوك ناو)ی وت “لە سۆنگەی بایەخی یانەکە بە دابینکردنی بناغەیەکی پتەو لەسەر بنەمایەکی تەندروست بۆ تیپی تۆپی پێی یانەکەمان ئه‌م فێرگه‌یه‌مان كرده‌وه‌”.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری