فریشته‌ و ئاوات
دوو باوەشی میهرەبان بۆ ئاژه‌ڵانی سەرشەقام

February 6, 2018 at 1:14 pm

سلێمانی/ كانونی دووه‌م/ ئاوات ده‌ریا یه‌كێك له‌و ئاژه‌ڵانه‌ی له‌ باوه‌ش گرتووه‌‌ كه‌ له‌ ماڵه‌كه‌یدا به‌خێویانده‌كات فۆتۆ: نارین رۆسته‌م

نارین رۆسته‌م

سیسی چیتر له‌ كۆڵان به‌ردباران ناكرێت و ئازار ناچێژێت، ئێستا له‌ ماڵی خانمێكی میهره‌باندا یاریی ده‌كات و ده‌خه‌وێت.

پیشیله‌یه‌كی گورج و گۆڵه‌، ئه‌وكاته‌ی ته‌مه‌نی بوو به‌ سێ هه‌فته‌ ئیتر كۆتایی بەنه‌هامه‌تییه‌كانی هات، برسێتیی و ئازاردانی له‌بیركرد و بوو به‌ ئه‌ندامێكی نوێی ماڵی ئاوات ده‌ریا له‌ سلێمانی.

“سیسی ئه‌ندامێكی تازه‌ی خێزانه‌كه‌مانه به‌ یارییه‌كانی سه‌رساممان ده‌كات و خۆشمانده‌وێت‌”، ئاوات ده‌ریا (28ساڵ) به‌مشێوه‌یه‌ ده‌ستیكرد به‌ گێڕانه‌وه‌ی چیرۆكی به‌خێوكردنی ده‌یان پشیله‌ و سه‌گ له‌ ماڵه‌كه‌یدا.

ئاوات وتی “ئەم پشیلەیە ئه‌وكاته‌ی له ‌كۆڵان هه‌ڵمگرته‌وه‌ ته‌مه‌نی ته‌نیا سێ هەفتە بوو، نەخۆش بوو بردم بۆ لای پزیشک و چاره‌سه‌رم بۆ وه‌ر‌گرت، ئێمه‌ خۆشمانده‌وێت”.

ئاوات له‌ ماڵه‌كه‌یدا شوێنێكی تایبه‌تی بۆ نزیكه‌ی 20 پشیله‌ و سه‌گ كردۆته‌وه‌ كه‌ پێشتر له‌ كۆڵان و سه‌ر شۆسته‌كانی ناو شار، یان له‌ ده‌ره‌وه‌ی شار بێ خاوه‌ن بون.

“ده‌بێت ئێمه‌ به‌زه‌ییمان هه‌بێت، ئه‌م سه‌گ و پشیلانه‌ بپارێزین، له‌ وڵاتانی ده‌ره‌وه‌ پاره‌یه‌كی زۆریان تیا سه‌رفده‌كه‌ن با ئێمه‌ش خۆشه‌ویستیمان بۆیان هه‌بێت”، ئاوات وای وت.

سلێمانی/ كانونی دووه‌م/ به‌شێك له‌و ئاژه‌ڵانه‌ی فریشته‌ نه‌جات له‌ ماڵه‌كه‌یدا به‌خێویان ده‌كات و جێی بۆ كردونه‌ته‌وه‌ فۆتۆ: نارین رۆسته‌م

فریشتە نەجات (37ساڵ) خاتونێكی تری شاری سلێمانییه ‌و هه‌شت ساڵه‌ وه‌ك ئاوات خۆبه‌خشانه كار بۆ پاراستنی ئاژەڵانی کۆڵان دەکات.

کاتێک لە دەرگای ماڵی فریشتە دەچیتە ژورەوە، ده‌یان سەگ و پشیلە دەبینیت، فریشته‌ش له‌ نێویاندایە و خواردنیان پێده‌دات و ده‌ست به‌سه‌ریاندا ده‌هێنێت.

له‌ هه‌رێمی كوردستان و شاره‌كانی تری عیراق، رۆژانه‌ سه‌گ و پشیله‌ی سەرشەقام ده‌بنه‌ قوربانی و ناپارێزرێن، ئه‌مه‌ش وای له‌ ئاوات و فرشیته‌ كردوه‌ به‌پێی توانای خۆیان هه‌ندێكیان بپارێزن و داواش له‌ هاوڵاتیان ده‌كه‌ن به‌شێوازی جۆراوجۆر هه‌مان رێگه‌ بگرنه‌به‌ر.

لوقمان شێروانی، وته‌بێژی ده‌سته‌ی ژینگه‌ی هه‌رێم ده‌ڵێت به‌پێی رێنماییه‌كانی ژمارە یەکی ساڵی 2016ی ده‌سته‌كه‌یان، ئه‌و كه‌سانه‌ سزاده‌درێن  كه‌ ئازاری ئه‌و گیانله‌به‌رانه‌ ده‌ده‌ن، داواشیكرد ئه‌و كه‌سانه‌ پاداشت بكرێن كه‌ ئاژەڵەکانی کۆڵان دەبەنە ماڵەوە و چاودێرییان دەکەن. 

شێروانی وتی “بەڵام لێرە کلتور رێگرە له‌ به‌خێوكردنی ئه‌و ئاژه‌ڵانه‌ بە تایبەت بۆ ئەو کەسانەی ماڵەکانیان لە نێو شاردایە”.

سلێمانی/ كانونی دووه‌م/ ئاوات ده‌ریا له‌ نێو ئه‌و ئاژه‌ڵانه‌ی كه‌ له‌ ماڵه‌كه‌یدا ده‌یانپارێزێت فۆتۆ: نارین رۆسته‌م 

به‌ڵام هه‌رچۆنێك بێت، به‌شێك له‌ خێزانه‌كان گرنگی به‌و جۆره‌ ئاژه‌ڵانه‌ ده‌ده‌ن و به‌خێویان ده‌كه‌ن، بۆ ئه‌و مه‌به‌سته‌ش هه‌ندێكیان سه‌ردانی نۆرینگه‌كانی تایبه‌ت به‌ ئاژه‌ڵان ده‌كه‌ن. 

سەروەت نەجمەدین، ماوه‌ی دوو ساڵە خوێندنی پەرستاری تەواوکردوە و ئێستا لە یەکێک لە بازاڕەکانی شاری هەولێر نۆرینگەیەکی تایبەتی بۆ چارەسەرکردنی نەخۆشییەکانی ئاژەڵانی داناوه‌، به‌ (كه‌ركوك ناو)ی وت “ئه‌وانه‌ی بۆ وه‌رگرتنی چارسه‌ری پشیله‌ و سه‌گی كۆڵان دێنه‌ لامان ژماره‌یان زۆر كه‌مه‌، بەشی زۆری ئەوانەی دێن ئاژەڵەکانیان لە سەرەمەرگدان”.

داوایكرد ئه‌وانه‌ی ئه‌و ئاژه‌ڵانه‌ به‌خێوده‌كه‌ن، گرنگی به‌ پاكوخاوێنی ئاژه‌ڵه‌كانیان بده‌ن به‌تایبه‌ت بەکارهێنانی شامپۆ و کەرەستەکانی تیماركردن.

به‌ڵام فریشته‌ نه‌جات ره‌خنه‌ی هه‌یه‌ و ده‌ڵێت “كێشه‌كه‌ ئه‌وه‌یه‌ میدیاش وه‌ك پێویست گرنگی به‌ ژیانی ئه‌و جۆر ئاژه‌ڵانه‌ نادات، بۆیە هیچ لامان سەیر نییە رۆژانە بەدیار لاشەی چەندان ئاژەڵەوە تێپەڕبین و هیچ نەڵێین“.

 

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری