دوای 16ی ئۆكتۆبەر دانراون
دوو لافیتە لە زانكۆی كەركوك مشتومڕ دەنێتەوە

February 9, 2018 at 4:03 pm

كەركوك، 2018، جیاوازی نێوان لافیتەی عەرەبی و هاوشێوەكەی بە چوار زمان لەسەر بڵەخانەی كولێژی ئاداب فۆتۆ: كەركوك ناو

فراس حەمدانی – كەركوك
“زانكۆی جێی خوێندنی خوێندكارانی نەتەوە جیاوازەكانە، باشترە لافیتەكان بە زمانی هەر چوار پێكهاتەكەی كەركوك دابنرێت، پێویستە بەیەكسانی سەیری هەموان بكرێت” جەعفەر نەجم وای وت.

ئەو خوێندكارە تەمەن 23 ساڵە، ناڕازی بوو لە دانانی دوو لافیتەی ناونیشان بەسەر دوو كۆلێژی زانكۆی كەركوكەوە، ئەوەش تەنیا بە یەك زمان.

چەند مانگێك لەمەوبەر، دوو تابلۆی ناونیشانی نوێ‌ بۆ هەردوو كۆلێژی ئاداب و كارگێڕی و دارایی زانكۆی كەركوك بە زمانی عەرەبی دانران، لەكاتێكدا خوێندكارانی كورد و توركمان و كریستیانیش لە هەمان شوێن دەخوێنن، بۆیە ئەو پرسە مشتومڕی لە پارێزگاكە دروستكرد.

شوان داودی، پەرلەمانتاری عیراق لە فراكسیۆنی یەكێتیی نیشتمانیی كوردستان بە (كەركوك ناو)ی وت “ئەو وێنانەی لە تۆڕە كۆمەڵایەتیەكان بڵاوبونەوە و دەركەوت تەنیا پشت بە زمانی عەرەبی بەستراوە بۆ نوسینی دوو لافیتەكە، پێشێلكاری دەستوریی و یاساییە، چونكە عەرەبی و كوردی دوو زمانی فەرمین”.

جەختیكردەوە لەوەی بەوهۆیەوە ناڕەزایی دەگەیەنێتە سەرۆكایەتی ئەنجومەنی نوێنەرانی عیراق.

ئەو دوو لافیتەیە، لە دوای روداوەكانی 16ی ئۆكتۆبەری ساڵی رابردووەوە دانراون، كاتێك هێزە عیراقییەكان گەڕانەوە بۆ كەركوك و پێشمەرگە كشایەوە، بەهۆی بارگرژییەكانی نێوان هەولێر و بەغدا لە ئەنجامی ریفراندۆم.

“بابەتی لافیتەكان كاردانەوەی جیاوازی بە دوادا هاتووە، بەڵام من هیوادارم زانكۆ تایبەت بێت بە خوێندن و تەداخولی سیاسەت نەكات”، فانە عەبدوڵا (20 ساڵ) كچە خوێندكاری زانكۆكە بۆ (كەركوك ناو) وای وت.

هەروەها ئەحمەد عەتیە (21 ساڵ)، خوێندكاری هەمان زانكۆ ناڕازییە لە لافیتەكان و دەڵێت “كەركوك بۆ هەمو دانیشتوانەكەیەتی، موڵكی تەنیا كەسێك نییە”، داوایكرد چاو بەبابەتەكەدا بخشێنرێتەوە.

ئیدارەی پارێزگای كەركوك لە ساڵی 2008دا، بڕیاریدا تابلۆ و ناونیشانی فەرمانگە حكومیەكان بە چوار زمانی عەرەبی، كوردی، توركمانی و سریانی بنوسرێن، وەكو هەنگاوی یەكەمی پێكەوەژیانی ئاشتییانە لە شارەكە.

مەعد عاسی، بەرێوەبەری راگەیاندنی سەرۆكایەتی زانكۆی كەركوك رەتیكردەوە ئەو لافیتانەی بە یەك زمان نوسراون جێگەی تابلۆی سەرەكی ناونیشانەكە بگرنەوە، بۆ (كەركوك ناو) رونیكردەوە ئەو لافیتانە بۆ ناوەوەیە و تابلۆی سەرەكی لە دەرەوەیە و بە چوار زمان نوسراوە.

كەركوك، 2018، لافیتەی زمانی عەرەبی گەورەترە لەو لافیتەیەی بە چوارزمان دانراوە لەكۆلێژی كارگێڕی و دارایی فۆتۆ: كەركوك

هاوكات عەمران جەمال، راگری كولێژی ئاداب جەختیكردەوە تابلۆ و لافیتەی سەرەكی نەگۆڕدراون، دوو لافیتە بە چوار زمان لەبەردەم كۆلێژەكەدا هەن و لافیتە نوێیەكان، تەنیا بۆ رونكردنەوەی ناونیشانەكەیە و هیچی تر.

(كەركوك ناو) سەردانی هەردوو كولێژەكەی زانكۆی كەركوكی كرد، دەركەوت ئەو لافیتەیەی تەنیا بە عەرەبی نوسراوە لە قەبارە و رونیدا زیاتر دەركەوتووە بەراورد بەو تابلۆیانەی بە چوار زمان نوسراون.

لافیتە گەورەكە بە زمانی عەرەبی لەسەر باڵەخانەی كولێژی ئاداب دانراوە بەڵام ئەوەی بە وار زمانە بە دیواری دەرەوەی كولێژەكەیە.

نەجیب ئەحمەد، راگری كۆلێژی كارگێڕی و ئابوری بە (كەركوك ناو)ی وت “ئێمە لافیتەی سەرەكی كولێژەكەمان نوێ كردۆتەوە كە بە چوار زمان نوسراوە و دەتوانن سەردان بكەن و بیبینن، هەروەها یەكێكی ترمان داناوە بە عەرەبی تەنیا ناونیشان”.

بەپێی بەدواداچونەكانی (كەركوك ناو)، ئەو لافیتەیەی بە عەرەبی نوسراوە لەسەر دەرگای سەرەكی كولێژی كارگێڕی و دارایی دانراوە و دوو ئەوەندەی قەبارەی ئەو لافیتەیەیە كە بە چوار زمان نوسراوە و لەسەر دەركای كۆلێژ دانراوە.

نەجیب ئەحمەد دەڵێت ئەو لافیتەیەی بە چوار زمان نوسراوە وشەكانی بچوكن بۆیە یەكێكی تریان بە وشەی رونتر و گەورەتر داناوە.

مشتومڕەكان دانانی ئەو دوو تابلۆی ناونیشانە لە زانكۆ لەكاتێكدایە، ئیدارەی كەركوك سەرەتای ئەمساڵ بڕیاریدا كاربكرێت بە دانانی تابلۆ و لافیتەی ناونیشانی فەرمانگە حكومییەكان بە چوار زمان، لە پێناو پاراستنی پێكەوەژیانی ئاشتییانە لەنێوان هەموو پێكهاتەكاندا.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری