خانەقین لە مانگێكدا
زیاتر لە 20 قوربانی و دەیان رووداو تۆماركراون

February 9, 2018 at 7:55 pm

دیالە، شوباتی 2018، ناوبازاڕی گشتی ناوەندی قەزای خانەقین فۆتۆ: هاوڕێ‌ ئازاد

هاوڕێ‌ ئازاد
هاوڵاتیانی سنوری قەزای خانەقین، لە ماوەی كەمتر لە مانگێكدا روبەروی دەیان رووداوی جیاواز بوونەتەوە و بەهۆیەوە، زیاتر لە 20 مەدەنی و سەرباز كوژراون و برینداربوون.

كۆتا روداوی خوێناوی لە ناوەندی ئەو قەزایە، شەوی پێنجشەممە 8-2ی ئەمساڵ بوو، كاتێك ژمارەیەك گەنج بە دەستڕێژی گوللە كوژران، تائێستاش ئەنجامدەرانی زۆربەی رووداوەكان دیارنین و دۆسیەكان، بە هەڵپەسێراوی ماونەتەوە.

خانەقین یەكێكە لە “ناوچەی جێناكۆك”، لە نێوان حكومەتی بەغداو هەرێمی كوردستان‌و سەر بە پارێزگای دیالەیە لە خۆرهەڵاتی عیراق، دانیشتوانەكەی لە عەرەب‌، كوردو توركمان، هەروەها كاكەیی‌و كریستیانی‌و هەردوو مەزهەبی شیعەو سونە پێكدێن.

دوایین رووداو
شەوی پێنجشەممە لە گەڕەكی بەختیاری خانەقین، حەوت هاوڵاتی كوژران و دوو كەسی تر برینداربوون، بەهۆی دەستڕێژی ژمارەیەك چەكدارەوە و تەواوی قوربانییەكانیش، ئاوارەی هەردوو ناوچەی جەلەولا و سەعدیە بوون.

محەمەد مەلا حەسەن، قایمقامی قەزای خانەقین بە (كەركوك ناو)ی وت “هێزێكی چەكداری نەناسراو لە گەڕەكی بەختیاری دەستڕێژی گوللەیان لە كۆمەڵێك گەنج كردووە”، ئاماژەی بەوەشدا نازانرێت ئەوانەی تەقەیان كردووە كێ بوون، ئەو هێزە نەناسراون.

قوربانیەكانی ئەو روداوە پێنجیان خەڵكی سەعدیە و لە هۆزی زرگوشی بوون، دوانیانیشیان خەڵكی جەلەولایە، لە ساڵی 2014وە ئاوارەی خانەقین بوون.

بە وتەی چەند شایەتحاڵێكی رووداوەكە بۆ (كەركوك ناو)، ژمارەیەك چەكدار بە ئۆتۆمبێلێك بە خێرایی گەیشتوونەتە بەردەم ژمارەیەك دوكانی گەڕەكی بەختیاری خانەقین، هەڕەمەكییانە تەقەیان كردووە و دواتر هەڵاتوون.

گەڕەكی بەختیاری دەكەوێتە باشوری خانەقین لەسەر رێگای خانەقین_سەعدیە، تائێستاش كەس بە تۆمەتی روداوەكە دەستگیرنەكراوە.

خانەقین، 8-2-2018، بەهۆی تەقەكردنەوە 9 قوربانی رەوانەی نەخۆشخانەی گشتی كران فۆتۆ: هاوڕێ‌ ئازاد

شوبات چی پێبوو بۆ خانەقین؟
جگە لەو رووداوە خوێناوییەی شەوی پێنجشەممە، لە سەرەتای ئەم مانگەوە چەند ئۆپەراسیۆن و حاڵەتێكی تری توندوتیژی، لە سنوری خانەقین تۆماركراون.

كاتژمێر 7:30 خولەكی شەوێكی سەرەتای هەفتەی رابردوو، لە ناحیەی سەعدیەی سەر بەخانەقین بەهۆی هێرشی ژمارەیەك چەكدارەوە، هاوڵاتییەك گیانی لە دەستدا.

ئەو هاوڵاتییە بە ناوی خالد فەرحان، موختاری گوندی عەساچرە بوو لە باشوری سەعدیە ‌و لە پێكهاتەی عەرەب بوو، بە وتەی پۆلیسی نەهێشتنی تاوانی ناحیەكە بۆ (كەركوك ناو)، پاشماوەی چەكدارانی داعش لە نزیك ئەو گوندە جموجۆڵیان هەبووە بە تایبەت بە شەوان.

4ی شوبات لە ناوچەكانی نەفتخانە و دەوروبەری لە خانەقین، ئۆپەراسیۆنێكی ئەمنی و هەڵمەنی گەران بەرێوەچوو، بە پێی راگەیەندراوێكی هێزەكانی دیجلە ژمارەیەك حەشارگەی پاشماوەی داعش خاپور كراون، دەستیش بەسەر تەقەمەنی و چەكی جیاوازدا گیراوە.

هەر لەو مانگەدا، چەندین هەڵمەتی تری گەڕان و پشكنین هەبووە، بە تایبەت دەربارەی ئەو جموجوڵەی لەلایەن خەڵكەوە هێزە ئەمنیەكانی لێ‌ ئاگاداردەكرێتەوە و بە پاشماوەی داعش ناودەبرێن، هەرچەندە هێشتا هیچ بەڵگەیەكی یەكلاییكەرەوە لەوبارەیەوە نییە.

كانونی دوەم؛ مانگی رووداوەكان
زۆربەی روداوەكانی سنوری خانەقینە لە مانگی یەكی ئەمساڵدا بوون، لە رفاندنی هاوڵاتیانەوە بۆ تەقەكردن و تەقاندنەوەی بۆمبی چێنراو، زۆربەی قوربانییەكانیش هاوڵاتی بوون.

16ی 1ی ئەمساڵ لە نزیك سەعدیە لە قەزای خانەقین، پۆلیسێكی عیراقی بە ناوی كەرار حەسەن كوژرا، بەهۆی هێرشی ژمارەیەك چەكدارەوە بۆ سەر هێزەكەیان لە ناوچەی كوباشی.

شەوی 17ی كانونی دووەمی ئەمساڵ لەسەر رێگای سەرەكی خانەقین_جەلەولا، ژماریەك چەكدار بازگەیەكی وەهمی دادەنێن‌و هاوڵاتییەك دەڕفێنن و تەقە لە ئۆتۆمبێلێك دەكەن كاتێك هەوڵی خۆ دەربازكردنی داوە، بەهۆیەوە دوو هاوڵاتی كوژراون.

عەمید هشام ئیسماعیل، بەرێوبەری پۆلیسی خانەقین سەر بە عیراق بە (كەركوك ناو)ی وت “ژمارەیەك چەكدار بازگەیەكی وەهمیان داناوە لە نزیك كارگەی قیر لە سەر رێگای خانەقین_جەلەولا ‌و تەقەیان لە ئۆتۆمبێلی هاوڵاتییەك كردووە كە نەیویستووە بوەستێت، لە ئەنجامدا سەرنشینێكی ئۆتۆمبێلەكە كوژراوە و بریندارێكیش دوای رۆژێك مانەوە لە نەخۆشخانە گیانی لەدەستداوە”.

هەروەها وتیشی “هەردوو قوربانییەكە خەڵكی جەلەولا بوون و لە كاتی گەڕانەوەیان بۆ ناحیەكە روبەروی روداوەكەوە بوونەوە”.

بەپێی سەرچاوەیەكی ئەمنی لە خانەقین، هەمانی شەوی 17-1 ژمارەیەك چەكداری نەناسراو، هاوڵاتییەكی تری خەڵكی خانەقین دەڕفێنن كە كاری شوفێری كردووە و لە گەڕانەوەدا بووە بۆ ماڵەوە، دوای بردنی ئۆتۆمبێلەكەیی ئەو هاوڵاتییە بە 110 هەزار دۆلار ئازادكراوە.

سەرچاوەكە وتی “دوای سێ‌ رۆژ لە هەمان شوێنی رفاندنەكە لە نزیك كارگەی قیری خانەقین لە نزیك گەڕەكی بەختیاری لە باشوری خانەقین پارەكە دراوە و رفێنراوەكە ئازادكراوە”.

هەر لە 17-1ی ئەمساڵ و لە ناوچەی تبج-ی ناحیەی جەلەولای قەزای خانەقین، پۆلیسێكی عیراقی كوژراو و شەشی تر برینداربوون، بەهۆی تەقینەوەی بۆمبێكی چێنراو بە كاروانێكی هێزەكانی پۆلیسی فیدراڵی.

بەپێی سەرچاوەیەك لەو هێزە لە كاتی هەڵمەتی گەڕان و پشكنین لە ناوچەكەدا، بۆمبەكەدا تەقیوەتەوە.

هەڵمەتەكە دوای ئەوەهاتوە روداوەكانی لەو سنورە زیادیانكردووە و وەكو سەرچاوەكە بە (كەركوك ناو)ی وت “لە گوندەكانی شارەدێی قەرەتەپە سەر بە شارۆچكەی خانەقین شەش هاوڵاتی ڕفێندراون كە بەشێكیان شوان بوون”.

لە 19ی كانونی دووەم لە خانەقین، كارمەندێكی پۆلیسی فیدراڵی عیراق بەهۆی تەقەكردنەوە بریندار بوو.

سەلام ئەسعەد، بەرپرسی بەشی فریاكەوتن لە نەخۆشخانەی گشتی خانەقین بە (كەركوك ناو)ی وت “ئەو كارمەندەی پۆلیسی فیدراڵی ئاسەواری سێ‌ فیشەك بە قاچیەوە بوو، دوای چارەسەری خێرا گوازرایەوە بۆ نەخۆشخانەی گشتی باقوبە”.

لە 21ی كانونی دووەم بۆمبێكی چێنراو بە كاروانێكی سوپای عیراقی لە ناوچەی ندە لە باشوری خانەقین تەقییەوە و لە 30ی هەمان مانگیش، لە گوندی محەمەد شیربەك لە خۆرئاوای شارۆچكەی خانەقین دوو بۆمبی چێنرا بە دوو ئۆتۆمبێلی بارهەڵگردا تەقییەوە، بە وتەی ژمارەیەك لە دانیشتوانی ئەو گوندە بۆ (كەركوك ناو) “چەند چەكدارێكی ریشدار لە چەمی ئەڵوەند لە نزیگ گوندەكە بینراون”.

بەردەوامی رووداوەكان لەو سنورە لە كاتێكدایە، زیاد لە جارێك هەڵمەتی گەورەی گەران و سەربازی ئەنجامدراون، لە نێویاندا ئۆپەراسیۆنی 20ی كانونی دوەمی ئەمساڵ لەسەر راسپاردەی فەرماندەی گشتی هێزە چەكدارەكانی عیراق لە ناوچەی نارین و خلاویە سەر بە جەلەولا، لە ئەنجامدا و بەپێی راگەیەندراوێكی هەڵمەتەكە سێ‌ حەشارگەی داعش خاپور كراوە و چەندین پارچە تەقەمەنی دەستی بەسەرداگیراوە.

ئەمنیەتی قەزای خانەقین و ناوچەكانی تری جێناكۆكی پارێزگای دیالە، لە دوای 16ی ئۆكتۆبەری ساڵی رابردووەوە كەوتۆتە دەستی هێزە عیراقییەكان دوای كشانەوەی ئاسایش و پێشمەرگەی حكومەتی هەرێمی كوردستان.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری