بەراز تەنگ بە جوتیارانی كەركوك هەڵدەچنێت

February 10, 2018 at 9:42 pm

كەركوك، 2012، دوو جوتیار لەكاتی كێڵان و تۆوكردنی زەوییەكانیاندا فۆتۆ: كەركوك ناو

ئیبراهیم عەلی – كەركوك
جوتیارانی كەركوك، دادوبێدادیانە لە دەست زۆربونی بەرازی كێوی و ئەو زیانانەی بەر كێڵگە كشتوكاڵیەكانیان دەكەوێت، جگە لە مەترسی بڵاوبونەوەی نەخۆشی، بەبێ‌ ئەوەی هیچ قەرەبوویەك بكرێنەوە.

بڵاوبونەوەی بەرازی كێوی لە دەوروبەری پارێزگای كەركوك حاڵەتێكی نوێ‌ نییە، بەڵام وەكو خەڵكی ناوچەكە دەڵێن لەمدواییانەدا ژمارەیان زۆر زیادیكردووە و بۆتە هەڕەشەیەكی جددی، بۆ ژیانی خۆیان و بەروبومە كشتوكاڵیەكان.

عەبدولعەزیز عوبێدی، جوتیار لە گوندێكی قەزای دوبز (35كم باكوری رۆژئاوای كەركوك) بە (كەركوك ناو)ی وت “لە 10 ساڵی رابردوودا بەرازی كێوی بەم ژمارە زۆرەی ئێستا بوونی نەبووە، لەم وەرزەدا بە رێژەیەكی زۆر بڵاوبونەتەوە”.

ئەوەش لەكاتێكدایە وەكو عوبێدی دەڵێت، بەرازی كێوی زۆر مەترسیدارە بۆ مرۆڤ و كشتوكاڵ،بە تایبەت بۆ گەنمەشامی و دەیان تەن لە بەروبومە چێنراوەكان خراپ دەكات.

پارێزگای كەركوك، بە ناوچەیەكی گرنگی كشتوكاڵی دادەنرێت لە عیراق، بە ناوبانگە بە گەنمەشامی و بەروبومەكانی تری گەنم و جۆ.

كەركوك، 2018، بەرازێكی كێوی دوای كوشتنی لەلایەن جوتیارێكەوە فۆتۆ: كەركوك ناو

زاهیر عەلی، بەرێوەبەری كشتوكاڵی كەركوك بە (كەركوك ناو)ی وت “بەرازی كێوی لە ناوچە جیاوازەكانی كەركوك بەربڵاون وەكو سەرگەڕان، دوبز، دەوروبەری یایچی و تازە، لە وەرزی دورینەوەی گەنمەشامی”.

بەرەنگاربونەوەی بڵاوبونەوەی بەراز لە ناوچەكە، لەسەرشانی جوتیارانە و هیچ قەرەبویەكی ماددی نیە بۆ ئەو زیانانەی بەر كێڵگە كشتوكاڵییەكان دەكەون، بە وتەی بەرێوەبەری كشتوكاڵ تەنیا لە كاتی پەتا و نەخۆشیە باوەكانی بەروبومدا قەرەبوو هەیە.

لایەنە پەیوەندیدارەكانی ئیدارەی كەركوك، تەنیا بە ژمارەیەك رێنمایی و پلانی روبەروبونەوەی بەرازە كێوییەكان، هاوكاری جوتیاران دەكەن.

مۆفەق عەبادی، جوتیارێكی سنوری كەركوك و دەڵێت یەكێك لە رێگاكانی رێگری لە بەرازی كێوی دانانی كارەبایە لەسەر پەرژینی كێڵگەكان، تا ئاژەڵەكە لە كاتی پەڕینەوەیدا تەزوی كارەبا بیگرێت.

ئەو رێگایەی عەبادی باشیكرد “مەترسیدار و هەڵەیە”، چونكە مەترسی هەیە هاوڵاتیەك یان جوتیارێك بێ‌ ئاگایانە لە پەرژینی كێڵگەكانەوە تێپەرێت و كارەبا بیگرێت”.

ئەو جوتیارە رونیكردەوە رێگایەكی باو لە ناوچەكە ئەوەیە، شوێنی ئاژەڵەكان بسوتێنرێت و خاپور بكرێن، یان بە چەك روبەرویان ببنەوە.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری