تەرمی یەكێك دۆزراوەتەوە
دوایین زانیاری دەربارەی رفێنراوەكانی دوزخورماتوو

February 10, 2018 at 4:59 pm

سەڵاحەدین، كانونی دوەمی 2017، بازگەیەكی هێزە ئەمنیەكان لەدوزخورماتوو فۆتۆ: هێزی بەرپەرچدانەوەی خێرا

لەیلا ئەحمەد – سەڵاحەدین
تەرمی مێرمنداڵێك لە دوزخورماتوو دۆزرایەوە، بەوتەی لێپرسراوانی ئەمنی یەكێك بووە لەو پێنج هاوڵاتییەی لە سنوری قەزاكە رفێنران و ئەوانی دیكەش، چارەنوسیان لە نێوان ئازادكردن یان كوژراندا هێشتا دیارنییە.

پێنج هاوڵاتی لە گوندێكی نێوان جلێوە و دوزخورماتوو، دوێنێ‌ هەینی 9-2 لەلایەن ژمارەیەك چەكدارەوە رفێنران و دوای تێپەڕینی رۆژێك تەرمی یەكێكیان دۆزراوەتەوە، بەڵام زانیاری جیاواز لەبارەی چارەنوسی چوار كەسەكەی دیكەوە هەیە.

عەلی حسێنی، سەركردە لە حەشدی شەعبی ل سنورەكە و جێگری سەرۆكی ئەنجومەنی قەزای دوزخورماتوو بە (كەركوك ناو)ی وت “لەو پێنج كەسەی رفێنرابوون ئەمڕۆ شەممە 10-2 تەرمی یەكێكیان دۆزرایەوە، كە مێردمنداڵێكی تەمەن 14 ساڵە ‌و تەرمەكەی، لە نێو گژوگیای دەوروبەری گوندی حلێوە بەجێهێڵدرابوو”.

ئەو هاوڵاتییەی رفێنراون، بە كاری كشتوكاڵیی و شوانییەوە سەرقاڵ بوون لە گوندەكانی رۆژئاوای قەزای دوزخورماتوو، سێ‌ كەسیان لە پێكهاتەی عەرەبی سونەمەزهەب و دوانیان توركمانی شیعەمەزهەب بوون.

رائید كەمال عەبدوڵا، بەرێوەبەری ئاسایشی قەزای دوزخورماتوو (سەر بە یەكێتیی نیشتمانیی كوردستان) بە (كەركوك ناو)ی وت “ئەوەندەی ئاگامان لێی بێت سێ كەس لەو رفێنراوانە ئازادكراون و دووانی تریان كە شیعەمەزهەب بوون بێسەروشوێن بوون، ئەو تەرمەی ئەمڕۆ دۆزراوەتەوە یەكێك بووە لە دوو هاوڵاتییە بێسەروشوێنەكان”.

هەروەها رونیكردەوە هۆكاری ئازادنەكردنی دوو كەس لە رفێنراوەكان، بەهۆیەوە ئەوەوە بووە شیعەمەزهەب بوون و پێشتر حەشدی شەعبی، لە ناوچەكەدا هاوكاری كردوون.

ئەو ناوچەیەی هاوڵاتییەكی تێدا رفێنراوە، هێشتا ئاوەدان نەبۆتەوە و هیچ خێزانێكی تێدا ناژی، بە وتەی لێپرسراوانی ئەمنی و سەربازی ئەنجامدەرانی ئەو رووداوەكە، لە پاشماوەی چەكدارەكانی داعش بون.

عەقید كاوە مەلاپەروێز، بەرێوەبەری ئاسایشی قەزای دوزخورماتوو (سەر بەپارتی دیموكراتی كوردستان) بە (كەركوك ناو)ی وت “ئەو پێنج هاوڵاتییەی لەلایەن داعشەوە رفێنران هەموویان ئەمڕۆ شەممە كوژراون، بەڵام هێشتا تەرمی یەكێكیان دۆزراوەتەوە و بە دوای تەرمی ئەوانی دیكەدا دەگەڕێین”.

جیاوازی زانیارییەكان لەبارەی چارەنوسی چوار لە رفێنراوەكان، لەكاتێكدایە هیچ یەكێك لە لێپرسراوانی ئەمنی بەڵگەی تەواو یەكلاییكەرەوەیان بۆ لێدوانەكانیان پێ نەبوو.

رفاندنی ئەو هاوڵاتییانە دوای ئەوەدێت، چەند رۆژێك لەمەوبەر هێزە سەربازییەكانی عیراق ئۆپەراسیۆنێكی بەرفراوانیان لە رۆژهەڵات و چەند ناوچەیەكی تری قەزای دوزخورماتوو ئەنجامدا، بە ئامانجی پاككردنەوەی سنورەكە لە پێشێلكاری و گروپە چەكدارەكان.

قەزای دوزخورماتوو تاكە ناوچەی جێناكۆكی سەر بە پارێزگا سەڵاحەدینە، دانیشتوانەكەی لە عەرەب، كورد و توركمان پێكدێت، لە 16ی ئۆكتۆبەری 2017وە ئەمنیەتی ناوچەكە كەوتۆتە دەستی هێزە عیراقییەكان دوای كشانەوەی پێشمەرگە.

فۆتۆ گه‌له‌ری

چاپکردن چاپکردن