خێزانێكی بێ‌ ناسنامە
چیرۆكی هاوسەرگیری و منداڵبون لە سەردەمی داعش

February 23, 2018 at 7:17 pm

كه‌ركوك/4-10-2017/ ساتی گه‌یشتنی ژمارەیەك هاوڵاتی لە نێویاندا ژن‌و منداڵ له‌ قه‌زای حه‌ویجه‌وه‌ بۆ مه‌كته‌ب خالید له‌ باشوری خۆرئاوای كه‌ركوك فۆتۆ: سۆران محه‌مه‌د

كەركوك ناو
ئیبراهیم باوكێكی گەنجی خەڵكی موسڵە، لەگەڵ خەدیجەدا یەكەم منداڵیان سێ‌ ساڵ لەمەوبەر هاتە دنیا، بەڵام وەكو پرۆسەی هاوسەرگیرییەكەیان ئەویش نەبووە خاوەنی هیچ بەڵگەنامە ‌و ناسنامەیەك.

هاوسەرگیرییەكەی ئیبراهیم و خەدیجە، لە دەرەوەی دادگا ئەنجامدراوە بەهۆی حوكمڕانی داعش لە موسڵ، ئەوەش دوای نەمانی دەسەڵاتی ئەو رێكخراوە روبەڕوی زۆرترین كێشەی كردنەوە، ئەوەش بەپێی راپۆرتێكی بەرنامەی نەتەوە یەكگرتووەكان بە پەرەپێدان (UNDP).

“خەدیجە و منداڵەكە لە هیچ لە بەڵگەنامەكاندا هەژمار نەكران، ئەگەر بڕوانامەی هاوسەرگیری و بەڵگەنامەی پشتڕاستكردنەوەمان لەدایكبونمان دابین نەكردایە لە كامپەكە دەردەكراین”، ئیبراهیم كە ئاوارەی كەمپی دارئلەسەلام (80كم باشوری بەغدا) بووە وای وت.

ئیبراهیم لە بەغدا لەدایك بووە ‌و لە خۆرهەڵاتی موسڵ گەورە بووە، لەلایەن داعشەوە دوو جار بە قامچی لەناو خەڵكدا سزادراوە، چونكە وەكو خۆی دەڵێت بە شۆرتەوە هاتوچۆی دەكرد و تەلەفونی بۆ برادەرەكانی دەكرد بە مۆبایل.

لەگەڵ دەستپێكردنی شەڕی ناو موسڵ، ئیبراهیم لەگەڵ خێزانەكەیی و دایكی و باوكیدا بەنیازی ماڵی پوری لە بەغدا شارەكەیان بەجێهێشت، دوای بڕینی یەكەم خاڵی پشكنینی هێزە عیراقییەكان بە پاس و لۆری گەورە بەرەو گەیارە (باشوری نەینەوا) بەڕێكران.

“لە بازگەكە وتیان ناتوانن بڕۆین بۆ بەغدا بەبێ بەدەستهێنانی مۆڵەت لەلایەن دەسەڵاتدارانی ناوخۆوە”، ئیبراهیم توانی لە شارەوانی گەیارە، ئەنجومەنی گەڕەك، نوسینگەی دژەتیرۆر‌و ئاسایشی نیشتیمانیەوە مۆڵەت بەدەسبهێنێت بەهۆی ئەوەی تاوانی لەسەر نەبوو.

موسڵ، 9-5-2017، ئاوارەبوونی سەدان كەس لە گەڕەكی هەرەمات لە بەری راستی شارەكە فۆتۆ: كەركوك ناو

ئەو خێزانە درێژەیان بە گەشتەكەیان دا ‌و لە نزیك شارۆچكەیەكی بچوكی بەغدا، لە خاڵێكی پشكنین راگیران و بەڵگەنامەكانی گەیارەش سودی نەبوو، دەبوو ئەفسەرێكی سوپا ببێتە كەفیلیان، بۆیە ناچار بەرێكەوتن بۆ كەمپی دارئەلسەلام.

پاش چەند ڕۆژێك لەو گەشتە، دووەم منداڵی ئەو ژن‌و مێردە لە دایكبوو، ئەویش نەیتوانی ببێتە خاوەنی هیچ بەڵگەنامەیەكی فەرمی.

هاوسەرگیریی لە دەرەوەی دادگادا، بە تاوان هەژمار دەكرێت بەپێی یاسای باری كەسێتی عیراقی ‌و سزای هەیە، ناسنامەش بنەمایەكی سەرەكییە كاروبارەكانی هەموو هاوڵاتییەكە، بەڵام زۆربەی ئاوارەكان كاتی داعش یان لە هەڵاتندا ئەو بەڵگەنامە فەرمییانەیان لە دەستدا، بەشێكی لە خەڵكیش نەیانویست رێكارەكانی هاوسەرگیری و منداڵبون لای داعش ئەنجامبدەن.

محەمەد توركی، لەسەردەمی داعش هاوسەرگیری كردووە و بووە بەباوكی دوو منداڵ، لەگەڵ ئەوەشدا بڕیاریدا هیچ بەڵگەنامەیەكی لای داعش تۆماربكرێت.

“داوای یارمەتیم كرد بۆ چارەسەركردنی بڕوانامەی هاوسەرگیرییم كە نەمتوانی تەواوی بكەم بەهۆی ئەو بارە سەختانەی روبەرومان بووەوە، بۆیە ئامۆژگاری كرام و كەیسەكەم بۆ دادگا ڕەوانە كرا”، ئەو هاوڵاتییەی خەڵكی ناوچەی تەحریر لە موسڵ دەڵێت بەمزوانە بەڵگەنامەكانی وەردەگرێت.

كەیسەكەی محەمەد، لەرێی پرۆژەیەكی رێكخراوی نێودەوڵەتی كۆچەوە هاوكاریكرا بە هەماهەنگی لەگەڵ حكومەتی عیراقی و هاوبەشانی مرۆیی، ئەوەش لەچوارچێوەی سەنتەری زانیاری كۆمەڵگەیی گەڕۆك كە بۆ هاریكاری ئاوارە گەڕاوەكان دامەزرێندراوە.

موسڵ، 27-7-2017، بەهۆی شەڕەوە زیانی زۆر لە بەری راستی شارەكەوە كەوتووە فۆتۆ: كەركوك ناو

هێرشەكانی داعش و شەڕی دژ بەو رێكخراوە، زیاتر لە پێنج ملیۆن هاوڵاتی ئاوارەكرد كە زۆرینەیان لە موسڵ بوون، تائێستا بەشێكی زۆریان نەگەڕاونەتەوە و هەزاران كەسیش كێشەی نەبونی بەڵگەنامە یاساییەكانیان هەیە.

دوای ماوەیەك مانەوەی لە كەمپ، ئیبراهیم رۆژێك چاویكەوت بە هێمای زانیاری ژمارەیەك رێكخراو بەهاوبەشێتی لەگەڵ رێكخراوی (UNDP)، كە بانگەوازی هاریكاری یاسایی ئاوارەكانیان دەكرد بە خۆڕایی.

دۆسیەكەی ئیبراهیم درایە پارێزەرێك لە رێكخراوی بەشدار لەو هەڵمەتە، لە دادگای خێزانی داواكاری پشتڕاستكردنەوەی هاوسەرگیری و منداڵبوونیان پڕكردەوە، دادگا دوای پێداچونەوە بە كەیسەكەدا رەوانەی دادوەری لێكۆڵینەوەی كرد.

“دادوەری لێكۆڵینەوە وتی ئەو ناچارە من بەند بكات بەهۆی ئەوەی هاوسەرگیریم كردووە لە دەرەوەی دادگا، بەڵام من كەفیلێكم هەبوو، ئەو كەفالەتی منی كرد لەسەر ڕاست‌ودروستی هاوسەرگیریەكەم”.

ئەو دۆسیەیە بۆ بەڵگەی زیاتر، پێویستی بە نەخۆشخانە و دواتر بەڕێوەبەرێتی جینایات هەبوو، بۆ زانیاری لەسەر لەدایكبونی منداڵەكە ‌و هەروەها باوانی.

ئیبراهیم و پارێزەرەكەی سەردانی بەڕێوەبەرێتی ناسنامەی نیشتیمانییان كرد لە بەغدا، بۆ پشتڕاستكردنەوەی بەرواری لەدایكبوون و ناو و تەمەن و باری هاوسەرگیری و پەیوەندیە خێزانیەكان، دوای بەدواداچون لەچەندین فەرمانگەی تر، جارێكیتر كەیسەكە رەوانەی دادگای خێزانی كرا.

ئیبراهیم ‌و خەدیجە، دوای چەند ساڵێك لە هاوسەرگیری و لەدایكبوونی دوو منداڵ، دواجار توانییان بەڵگەنامەی یاسایی ‌و ناسنامە وەربگرن.

فۆتۆ گه‌له‌ری

چاپکردن چاپکردن