بەوێنە: فیستیڤاڵی زانستی لە كەركوك

February 25, 2018 at 10:08 pm

كەركوك، 25-2-2018، دەیان پرۆژە لە فیستیڤاڵێكی زانشتیدا نمایشكران فۆتۆ: محەمەد عەبدولخالق

محەمەد عەبدولخالق
قوتابیانی پێكهاتە جیاوازەكان، بە دەیان پرۆژە بەشدارییان كرد لە فیستیڤاڵی زانستی لە كەركوك، بە ئامانجی نیشاندانی بەهرە و بیرۆكەكانیان بۆ پرۆژەی داهێنەرانە لە داهاتوودا.

سیانزەهەمین فیستیڤاڵی زانستی ئەمڕۆ یەكشەممە 25-2 لە كەركوك بەرێوەچوو، بە بەشداری 10 خوێندنگەی كچان و كوڕان، تێیدا 195 قوتابی 100 پرۆژەیان لە بوارەكانی دیزاین، ژینگە، بیركاری، سۆشیال، كۆمپیوتەر، زانست، كورتە فیلم‌و تەكنەلۆجیا نمایشكرد.

بەرائەت ئەحمەد (17 ساڵ) خوێندكاری ئامادەیی كەركوكی كچان و بەشداربوو بە پرۆژەی بەكارهێنانی وزەی خۆر لەبارەی هەوڵەكانیەوە بە (كەركوك ناو)ی وت “دەتوانین لە ڕێگەی تیشكی خۆرەوە كارەبا دروست بكەین… دەتوانیت بە تاقە شەمسی كێشەی بێ‌ كارەبایی چارەسەر بكەین”.

فیستیڤاڵەكە لەلایەن خوێندنگەی چاغەوە رێكخرابوو، بە ئامانجی نیشاندانی توانا و بیركردنەوەی خوێندكاران بۆ داهاتوو، تا بتوانن پەرەی بدەن.

جەنە محەمەد (16 ساڵ)، خوێندكاری ئامادەیی چاغی كچان بە پرۆژەی “منداڵی زیرەك” بەشداربووە و دەڵێت ئامانجی لەو هەنگاوەی ئەوەیە دایكان و باوكان بتوانن منداڵەكانیان بەخێو بكەن بە ڕێگەیەكی ئاسان و تێچوویەكی كەمتر.

ئەوەشی بە (كەركوك ناو) وت “چەند كەرەستەیەك كە لە بازاڕەكاندا هەیە بەكارمهێناوە و پەرەم پێداوە بە بەستنەوەیان لەگەڵ وایفایی لەڕێگەیی مۆبایل ‌و پێنج ئامێری هەستیارەوە بۆ باری منداڵەكە، پلەی گەرمی ژوورەكەی، ڕێژەی شێ ‌و دەرگای لیزەر ‌و هەستیاری دەنگ”.

لیژنەیەكی داوەری دوای هەڵسەنگاندنی پرۆژەكان لە رۆژانی داهاتوو مەدالیای ئاڵتونی و زیو و برۆنز بەسەر سێ‌ كەسی یەكەمدا دابەشدەكات.

كچە بەشداربوویەكی تری چالاكییەكە بە كامێرای زیرەك، بۆ (كەركوك ناو)ی رونكردەوە لە پرۆژەكەیدا وایكردووە كامێراكە بەپێی جوڵەی كەس و جەستەی مرۆڤ لە هەر شوێنێكدا وێنە بگرێت، ئەوەش لەرێی یەك كامێرا و بەكارهێنانی هەستیاری سەروبنەوشەیی، تا هەر ماڵێك لە بوونی ژمارەیەكی زۆر كامێرا و تێچووی زیادە رزگاربن.

براوەی فیستیڤاڵەكە بەوتەی رێكخەرانی ئەو چالاكییە، دەرفەتی ئەوەیان بۆ دەرەخسێت لە داهاتوودا بەهرەكانیان لە بۆنەی تری وڵاتانی ئەوروپا و ئەمریكا و ئاسیا نمایش بكەن.

محەمەد ساڵح (16 ساڵ)، خوێندكاری ئامادەی كەركوكی كوڕان لەرێی پرۆژەی خانووی زیرەكەوە بەشداری كردووە‌و دەڵێت، لەو رێگەیەوە هەموو پێداویستیەكانی ماڵەكە بە مۆبایلەوە دەبەستێتەوە وەكو دەرگا، سپلیت، بۆیلەر و تەلەفزیۆن.

فۆتۆ گه‌له‌ری

چاپکردن چاپکردن