سازان ئومێدی بۆ باوكی گەڕاندەوە

March 1, 2018 at 10:13 pm

دوزخورماتوو، شوباتی 2018، سازان لەگەڵ باوكی لەبەردەم دوكانە سوتاوەكەیاندا فۆتۆ: تایبەت بەكەركوك ناو

ژینۆ خەلیل – سەڵاحەدین
كۆڵەكەیەكی سەرەكی ماڵەكەی بێستون سازان-ی كچێتی، ئەو لە یەككاتدا خوێندكارێكی زیرەك و دوكاندارێكی بەهرەمەندیشە، بۆیە كەمئەندامبونی باوكی هیچ كاتێك بێ‌ ئومێدی لە خێزانەكەیاندا دروستنەكرد.

ئەو كچە هێشتا لە تەمەنی 11 ساڵیدایە، بەڵام رۆژانە لەگەڵ تەواوبونی دەوامی خوێندنگە رووئەكاتە دوكانە سوتاوەكەی باوكی ‌و سەرقاڵی كاری نۆژەنكردنەوەیە، تا هەرچی زووە ژیانی ئاسایی لە دوزخورماتوو دەستپێبكەنەوە.

“رۆژانە دوای گەڕانەوەم لەقوتابخانە دەچم بۆلای باوكم یارمەتی دەدەم لەنۆژەنكردنەوەی كتێبخانە سوتێنراوەكەمان” سازان بێستون بۆ (كەركوك ناو) وای وت.

دوكان و ماڵی خێزانەكەی سازان، دەكەوێتە گەڕەكی كۆماری، كە گەورەترین گەڕەكی كوردنشینی دوزخورماتووە ‌و لە روداوەكانی 16ی ئۆكتۆبەری 2017دا زیانی زۆری بەركەوت.

بێستون نەجات، جگە لە سازان كوڕێكی تری هەیە ‌و زیاتر لە مانگێكە گەڕاونەتەوە بۆ دوزخورماتوو “ئێستا لەگەڵ سازانی كچم خەریكی نۆژەنكردنەوەی كتێبخانەكەمم”.

كتێبخانەكەی بێستون چەند رۆژێك دوای ئاوارەبونی ‌و لە روداوەكانی دوای 16ی ئۆكتۆبەر سوتێنرا، “چەند كەسێك دوكانەكەیان سوتاندم ‌و خۆیان تەلەفۆنیان بۆ كردم، وتیان ئەوە دوكانەكەمان سوتاند چونكە بەرپرس ‌و دەسەڵاتدار سەردانی دوكانەكەیان دەكردیت” بە وتەی بێستون.

باوكی سازان، خاوەن پێداویستی تایبەتە و هەردوو قاچی توانای رۆیشتنی نەماوە، وەكو خۆی دەڵێت بەهۆی پێشمەرگایەتیەوە بووە، بەڵام سەرباری هەموو روداوەكان بێ‌ ئومێد نەبووە‌و چاوەڕێی ئەوەیە، لە نزیكترین ماوەدا وەكو جاران ئشوكار دەستپێبكاتەوە.

گەڕانەوەی هێزە عیراقیەكان بۆ دوزخورماتوو دوای كشانەوەی پێشمەرگە لە چەند مانگی رابردوودا كوژرانی چەند مەدەنییەكی لێكەوتەوە، ماڵ و دوكانی خێزانە كوردەكانی قەزاكە روبەڕوی سوتان و تاڵانكردن بوونەوە، ئەوەش بەپێی بەدواداچونێكی تیمی رۆژنامەنووسانی (كەركوك ناو).

“بەرەبەیانی 16ی ئۆكتۆبەر لەگەڕەكی كۆماری دەنگی تەقە ‌و هاوەن مناڵەكانمی بەخەبەر هێنا، دەستیانكرد بەگریان ‌و هاوار.. براكانم لەكفرییەوە هاتن بەدواماندا و رزگاریان كردین” بێستون لەبارەی یەكەم شەوی ئاوارەبونیانەوە وای وت.

دوای دەرچونیان لە دوزخورماتوو، خێزانەكەی بێستون رودەكەنەوە ناوچەی داودیە و دوای ماوەیەك، بەرەو كفری دەڕۆن ‌و لە خانوویەكدا بە كرێی 200 هەزار دیناری مانگانە نیشتەجێدەبن.

بێستون وتی “50 رۆژ لەوی َماینەوە، چونكە كرێی خانوم پێنەدەدرا ‌و بارودۆخمان زۆر خراپ بوو”.

ئەوان لەگەڵ هەزاران خێزانی تری دوزخورماتوو، دوای چەند مانگێك لە ئاوارەیی لە سەرەتای ئەمساڵەوە بڕیاری گەڕانەوەیان دا، بە تایبەت لەگەڵ چڕكردنەوەی هەوڵەكاندا بۆ هێوركردنەوەی دۆخی قەزاكە و پێیانوایە، ئێستا ناوچەكەیان تارادەیەك ئارامە.

سازان زۆر دڵخۆشە بە گەڕانەوە، جارێكیتر توانی بچێتەوە خوێندن و بەشێك لە هاوڕێكانیشی ببینێتەوە، “كە خورماتومان بەجێهێشت زۆر ترسام لەدەنگی تۆپ ‌و هاوەن، باوكم وتی ئیتر ئەوە دوبارە نابێتەوە و بەئارامی دەژین”.

فۆتۆ گه‌له‌ری

چاپکردن چاپکردن