خێزانێكی كەركوكی دەسوتێنرێن
پێنج كەس بوون ‌و یەكێكیان ژنێكی دووگیانە

March 12, 2018 at 7:19 pm

كەركوك، 12-3-2018، پرسەی قوربانیانی خێزانەكە لە گەڕەكی خەزرای كەركوك فۆتۆ: كەركوك ناو

كاروان ساڵحی – كەركوك ناو
تەواوی ئەندامانی خێزانێكی كەركوكی لەلایەن داعشەوە دەسوتێنرێن، دوای ئەوەی پێشتر لە نێو ئۆتۆمبێلەكەیاندا دەدرێنە بەر دەستڕێژی گولە، ئەوەش لە رێگای نێوان هەردوو قەزای داقوق ‌و دوزخورماتوو.

رووداوەكە شەوی یەكشەممە 11-3 بووە، كاتێك ئەو خێزانە لە رێگەدا بوون لە كەركوكەوە بەرەو حلە، لە رێی بازگەیەكی وەهمییەوە كەوتوونەتە كەمینی چەكدارانی داعش.

محەمەد هیشام، وێنەگری كەناڵی (هنا سەڵاحەدین) كە قوربانییەكان ماڵی مام ‌و هاوكات خێزانی هاوسەرەكەیەتی بە (كەركوك ناو)ی وت “كاتژمێر یەكی شەوی رابردوو ماڵی مامم ویستوویانە بەرەو حلە (پارێزگای بابل) بڕۆن، بەڵام تیرۆریستانی داعش لە نێوان داقوق و دوزخورماتوو بەر فیشەكیان داون ‌و دواتر بەنزینیان كردووە بە ئۆتۆمبێلەكە و گڕیان تێبەرداون”.

قوربانییەكان لە پێنج كەس پێكهاتوون لە نێویاندا دوو برا، وەلید قاسم ‌و فواد قاسم لەگەڵ هاوسەری فواد ‌و دوو منداڵ، هاوسەرەكەیشی دووگیان بووە.

خێزانەكە بە وتەی كەسوكاریان لەم ئۆتۆمبێلەدا بوون فۆتۆ: لە پەیجەكانی فەیسبوك بڵاوكراوەتەوە

ئەو خێزانە لە نێو یەك ئۆتۆمبێلدا بوون، لە كاتی دەرچوونیان لە سنوری داقوقەوە بەرەو دوزخورماتووی سەر بەپارێزگای سەڵاحەدین، بازگەیەكی كاتی رایگرتوون بەبێ‌ ئەوەی بزانن چەكداری داعشن، لە پڕ دراونەتە بەر دەستڕێژی گولە، ئەوەش بە وتەی كەسوكاری قوربانییەكان ‌و سەرچاوە ئەمنییەكان.

سەرچاوەیەكی ئەمنی ئاگادار لە كەركوك كە نەیویست ناوی بڵاوبكرێتەوە بە (كەركوك ناو)ی وت “شەوی رابردوو تیرۆریستانی داعش بازگەیەكیان داناوە ‌و لە كاتی تێپەڕبونی ئۆتۆمبێلێكی مەدەنی لە جۆریا كیا كە ژمارەیەك هاوڵاتی تێدابووە، تیرۆریستان دەستڕێژی گولەیان لێكردوون‌و پاشان ئاگریان لە ئۆتۆمبێلەكە بەرداوە”.

بەپێی سەرچاوەكە بەهۆی ئاگرەوە تەواوی سەرنشینەكانی ئۆتۆمبێلەكە كە نیشتەجێی شاری كەركوك بوون سوتاون.

قوربانییەكان خەڵكی كەركوك ‌و دانیشتووی گەڕەكی خەزرا بوون، ئەمڕۆ دووشەممە 12-3 دوای بەخاكسپاردنی تەرمەكانیان پرسەیان لە هەمان گەڕەك بۆ دانرا.

كەركوك، 12-3-2018، لافیتەی پرسەی ئەندامانی ئەو خێزانەی كوژراون فۆتۆ: كەركوك ناو

محەمەد هیشام دەڵێت یەكێك لە مامەكانی كە لە نێو قوربانییەكاندا بووە سەربازە لە سوپای عیراقی و ئەویتریان قوتابییە، ئەو كە لە میدیادا كاردەكات وتی “هەر دوێنێ‌ شەو داعش لە سەر پەڕەی خۆیان لە تویتەر وێنەكانیان بڵاوكردوە ‌و بەرپرسیارێتی روداوەكەیان گرتەئەستۆ”.

داعش هەرچەندە لە ئەیلولی ساڵی رابردووەوە لە كەركوك كۆتاییهاتنی راگەیەندراوە، بەڵام ناوبەناو چالاكی دژە بە هێزە عیراقییەكان لە چەند ناوچەیەك ئەنجامدەدات ‌و لە نێویاندا كوشتنی 27 چەكداریی حەشدی شەعبی بوو لە ناحیەی ریاز دوای ئەوەی كەوتنە بۆسەی چەكدارانی ئەو رێكخراوەوە لە 18-2.

هێزە عیراقییەكان، تائێستا چەندین ئۆپەراسیۆنیان بۆ راوەدونانی پاشماوەی ئەو رێكخراوە ئەنجامداوە دواینیان دوێنێ‌ یەكشەممە دەستیپێكرد ‌و بەپێی راگەیەندراوی روبەروبونەوەكانیش لە ماوەی چەند هەفتەیەكدا، زیاتر لە 50 چەكداری داعش كوژراون لە سنوری كەركوك.

هه‌واڵی دیكه‌..

فۆتۆ گه‌له‌ری

چاپکردن چاپکردن