بەوێنە: نەورۆزی كەركوكییەكان لە قەڵا

March 20, 2018 at 7:29 pm

سۆران محەمەد – كەركوك
هەزاران هاوڵاتی شاری كەركوك، ئەمڕۆ لە مەراسیمێكدا بە هەڵكردنی ئاڵای هەرێمی كوردستان ‌و كردنەوەی ئاگر، بەشدارییان لە جەژنی نەورۆز.

مەراسیمەكە لە دوانیوەڕۆی ئەمڕۆ سێشەممە 20-3وە تا دەمەوئێوارە لەسەر قەڵای كەركوك بەردەوامی هەبوو، هێزی زۆری ئەمنی لە ناوچەكەدا بڵاوەپێكرابون ‌و زۆربەی شەقامە سەرەكییەكانی دەچنەوە سەر قەڵا داخرابون.

بەشداربوانی مەراسیمەكە، وەكو هاوسۆزی بۆ شاری عەفرینی سوریا (رۆژئاوای كوردستان) كە لەلایەن توركیا ‌و هاوپەیمانەكانیەوە دەستی بەسەرداگیراوە ئاهەنگی گۆرانی ‌و هەڵپەڕكێیان نەگێڕا.

نەورۆزی ئەمساڵ، یەكەم بۆنەی گشتی تایبەت بە پێكهاتەی كوردە بە ئاڵای هەرێمی كوردستانەوە لە دوای روداوەكانی 16ی ئۆكتۆبەری 2017 ‌و كشانەوەی پێشمەرگە، دوای ئەوەی دۆسیەی ئەمنی شارەكە كەوتە دەستی سوپا‌و حەشدی شەعبی ‌و دژەتیرۆری عیراق.