ورده‌كاریی كوشتن و ده‌ستدرێژیی سێكسی بۆ سه‌ر منداڵێكی پێنج ساڵان

May 17, 2018 at 8:56 pm

عه‌زام هومام (پێنج ساڵ) له‌لایه‌ن دوو مێردمنداڵی دراوسێیانیه‌وه‌ ده‌ستدرێژی سیكسی كرایه‌ سه‌ریی و دواتر گیانیله‌ده‌ستدا

كاروان ساڵحی – كه‌ركوك

عەزام هومام بەیاتى (پێنج ساڵ)، به‌ ئاگاداری دایك و باوكی‌ به‌ره‌و مزگه‌وتی نزیك ماڵیان به‌ڕێده‌كه‌وێت بۆ “نوێژی عیشا” له‌ گه‌ڕه‌كی واستی كه‌ركوك، به‌ڵام دوو كاتژمێر دواتر ته‌رمه‌كه‌ی گه‌ڕایه‌وه‌.

به‌پێی وته‌ی كه‌سوكارو لێكۆڵینه‌وه‌كانی پۆلیس دوو كه‌س به‌تۆمه‌تی كوشتن و ده‌ستدرێژی سێكسی بۆ سه‌ر عه‌زام ده‌ستگیركراون و دانیان به‌و دوو تاوانه‌دا ناوه‌.

عه‌زام كاتژمێر 8ی شه‌وی 15ی ئایار، به‌ ته‌نیا به‌ره‌و مزگه‌وت ده‌چێت، به‌پێچه‌وانه‌ی رۆژانی تر كه‌ له‌گه‌ڵ باپیری نوێژه‌كانی له‌ مزگه‌وت ده‌كرد.

بۆ نوێژ چوو و نه‌گه‌ڕایه‌وه‌

هومام بەیاتى باوکى عەزام، به‌ (كه‌ركوك ناو)ی وت “سێشه‌ممه‌ 15ی ئایار باپیرى نه‌یتوانی بڕوات بۆ مزگه‌وت، بۆیه‌ عەزام بەتەنها رۆیشت، تا گه‌یشته‌ كاتژمێر نۆی شه‌و عه‌زام نه‌گه‌ڕایه‌وه‌ به‌ڵام ئیمه‌ پێمان ئاسایی بوو وتمان پێدەچێت لەگەڵ هاوڕێكانی یارى بکات یاخود چوە بۆ ماڵى خزم و کەسوکارەکانمان کە نزیکى خۆمانن”.

تا گه‌یشته‌ كاتژمێر نۆی شه‌و عه‌زام نه‌گه‌ڕایه‌وه‌ به‌ڵام ئیمه‌ پێمان ئاسایی بوو وتمان پێدەچێت لەگەڵ هاوڕێكانی یارى بکات

كاتژمێر نزیكده‌بێته‌وه‌ له‌ 10، مێردمنداڵێكی دراوسێیان كه‌ هومام به‌ “كه‌سێكی خراپ و پیس” ناوی برد، له‌ ده‌رگایان ده‌دات و ده‌ڵێت “عه‌زام ونبووه‌، لە نزیک مزگەوتەکە بینیم پێی وتم دەڕوم بۆ شوێنێکى دور”.

دایك و باوكی عه‌زام ده‌ست به‌ گه‌ڕان ده‌كه‌ن و له‌نێو مزگه‌وته‌كه‌و و خزم و كه‌سوكارییان، به‌ڵام بێسود ده‌بێت.

هومام وتی “چوین سەیرى کامێراى چاودێرى ماڵەکانمان کرد، ده‌ركه‌وت عەزام تاوەکو سەر کۆڵانى خۆمان دێت، بەڵام دواتر دیارنامێنێت”.

“كوڵان و ماڵه‌كان هه‌موی گه‌ڕاین عه‌زام هه‌ر نه‌دۆزرایه‌وه‌” هومام زیاتر وتی “له‌كۆڵانی ماڵی خۆمان عاره‌بانه‌یه‌كی بارهه‌ڵگری ئۆتۆمبێل (قاتورەومەقتورە) هه‌یه،‌ وتم با سه‌یرێكی ئه‌وێ بكه‌ین، بینیم كوڕه‌كه‌م لە نێو لە چادرێکدا له‌ناو عاره‌بانه‌كه‌ پێچراوە”.

هومام باوشی پێدا ده‌كات و هه‌ڵیده‌گرێت، وتی “توشی خوێنبه‌ربون بوو بوو، زانیم ده‌ستدرێژی سێكسی كراوه‌ته‌سه‌ر، شوێنی ئه‌شكه‌نجه‌ به‌ جه‌سته‌یه‌وه‌ بوو، به‌ په‌ت  دەست و دەمى بەسترابوو، بە پەلە گەیاندمانە نەخۆشخانە به‌ڵام دیاربوو گیانیله‌ده‌ستدابوو”.

سكاڵا تۆمارده‌كه‌ن

دایك و باوكی عه‌زام یه‌كه‌م كه‌س كه‌ گومانی لێده‌كه‌ن، ئه‌و مێردمنداڵه‌یه‌ كه‌ هه‌واڵی ونبونی عه‌زام-ی پێگه‌یاندن.

هومام وتی “له‌ بنکەى پۆلیسى عەدالە سکاڵام لەسەر تۆمارکرد، دەستبەجێ دەستگیرکرا و دواى کەمتر لەنیو کاتژمێر لێکۆڵینەوە له‌به‌رده‌م ئه‌واندا دانی به‌ تاوانه‌كه‌یدانا”.

به‌پێی لێكۆڵینه‌وه‌كانی پۆلیس كه‌ دراوه‌ به‌ (كه‌ركوك ناو)، ئه‌و مێردمنداڵه‌‌ له‌گه‌ڵ كه‌سێكی تردا ئه‌و كاره‌ی كردوه‌، ئه‌وه‌ش كاری یه‌كه‌م جاریان نه‌بووه‌ له‌و گه‌ڕه‌كه‌.

دایکى عەزام به‌ (كه‌ركوك ناو)ی وت “کوڕەکەم تازه‌ باخچه‌ی ساوایانی ته‌واو كردبوو، چاوه‌ڕێ بوو ساڵی داهاتوو بچێته‌ خوێندنگه‌و كه‌لوپه‌لی خوێندنی بۆ بكڕین”.

“هیچ کێشەیەکمان لەگەڵ کەس نییە تاوەکو بەو جۆرە ناشرینە ره‌فتارمان لەگەڵ بکەن، داواکارین لە هێزە ئەمنییه‌کان لێکۆڵینەوەى زیاتر بکەن، ئێمە دەمانەوێت لە سێدارەبدرێن لەو شوێنەى کە کوڕەکەمیان لێ کوشت و دەستدرێژى سێکسییان کردە سەری”، دایكی عه‌زام وای وت.

هیچ کێشەیەکمان لەگەڵ کەس نییە تاوەکو بەو جۆرە ناشرینە ره‌فتارمان لەگەڵ بکەن

سەرچاوەیەک له‌ ده‌زگا ئه‌منییه‌كانی كه‌ركوك كه‌ به‌ باشی نه‌زانی ناوی بڵاوبكرێته‌وه‌ وتی “ئەو کەسەى کە پلانى ده‌ستدرێژیی و دواتر كوشتنی عه‌زام-ی داناوه‌ دراوسێی خۆیانه‌”.

وتیشی “کەسی تریش ده‌ستگیركراوه‌ و به‌شداربوه‌ له‌و تاوانه‌”.

فۆتۆ گه‌له‌ری

چاپکردن چاپکردن
سه‌ره‌تا هه‌واڵ راپۆرت فۆتۆ به‌دواداچونی رۆژنامه‌وانی خزمەتگوزاری