ورده‌كاریی دۆزینه‌وه‌ی ته‌رمی منداڵێكی ساوا له‌ زنانه‌

January 10, 2019 at 6:31 pm

دیاله/ ناوه‌ڕاستی 2017/ پۆلیسێکی حکومه‌تی هه‌رێمی کوردستان له‌ ناو بازاڕی ناحییه‌ی جه‌له‌ولا سه‌ر به‌ قه‌زای خانه‌قین به‌ر له‌ روداوه‌کانی 16ی تشرینی یه‌که‌م فۆتۆ: هاوڕێ ئازاد

ژینۆ خه‌لیل – دیاله‌

ته‌رمی منداڵێكی ساوا له‌ ناوه‌ندی ناحیه‌یه‌كدا دۆزرایه‌وه‌، به‌وته‌ی لێپرسراوانی ئیداریی و ئه‌منی، هێشتا لێكۆڵینه‌وه‌ به‌رده‌وامی هه‌یه‌ و هیچ كه‌سێك به‌وهۆیه‌وه‌ ده‌ستگیرنه‌كراوه‌.

چوارشه‌ممه‌ 9ی كانونی دوه‌م له‌ پشت قوتابخانه‌یه‌ك له‌ ناحیه‌ی زنانه‌ له‌ قه‌زای كفری، ته‌رمی منداڵێكی ساوا له‌نێو عه‌لاگه‌یه‌كی ره‌شدا دۆزرایه‌وه‌، له‌ ئێستاشدا ره‌وانه‌ی پزیشكی دادوه‌ری كراوه‌.

جەمال ساڵح، بەڕێوه‌بەری ناحیەی زنانە به‌ (كه‌ركوك ناو)ی وت “دوای ئەوەی لەلایەن خەڵکی سنورەکە پۆلیسی زنانە ئاگادارکراوەتەوە لەپشت قوتابخانەی زنانە منداڵه‌كه‌ فڕێدراوەو تەمەنی یەک ڕۆژ بووە، دەستبەجێ ڕەوانەی پزیشکی دادوەری کراوە و تا ئەم کاتە لێکۆڵینەوەی لەسەر دەکرێت”.

ته‌رمه‌كه‌ هێشتا له‌ پزیشكی دادوه‌رییه‌ و به‌هۆی به‌رده‌وامی لێكۆڵینه‌وه‌كانه‌وه‌ به‌خاك نه‌سپێردراوه‌.

محه‌مه‌د مه‌هنا، به‌رێوه‌به‌ری پزیشكی دادوه‌ری گه‌رمیان به‌ (كه‌ركوك ناو)ی وت “ئه‌و منداڵه‌ی ته‌رمه‌كه‌ی دۆزراوه‌ته‌وه‌ له‌ ره‌گه‌زی نێر بووه‌ و حه‌وت مانگه‌ له‌ دایك بووه‌، له‌ناو عه‌لاگه‌یه‌كی ره‌ش لای قوتابخانه‌ی زنانه‌ ته‌رمه‌كه‌ دانراوه‌”.

“ته‌رمه‌كه‌ نوێ بووه‌، شه‌وی پێشتر له‌و شوێنه‌دا دانراوه‌ و 9ی به‌یانی رۆژی دواتر دۆزراوه‌ته‌وه‌، هیچ نیشانه‌یه‌كی ئه‌شكه‌نجه‌ی پێوه‌دیار نه‌بووه‌”.

له‌ سنوری گه‌رمیاندا، كه‌ قه‌زای كفری و ناحیه‌كانی له‌روی ئیدارییه‌وه‌ سه‌ر به‌ ئیداره‌ی ئه‌و ناوچه‌یه‌ن، ئه‌وه‌ یه‌كه‌م حاڵه‌تی دۆزینه‌وه‌ی منداڵی ساوایه‌ به‌ مردویی یان زیندوێتی له‌مساڵدا تۆماربكرێت.

عه‌لی جه‌مال قدوری، به‌رێوه‌به‌ری پۆلیسی گه‌رمیان به‌ (كه‌ركوك ناو)ی وت “ته‌رمی منداڵه‌كه‌ لەنێو چاڵێکدا دۆزراوه‌ته‌وه‌، لە بنکەی پۆلیسی نەوجول پەڕاوی لێکۆڵینەوەی بۆ کراوەتەوە و بەبڕیاری دادوەر تەرمی ئەو منداڵە ساوایە ڕەوانەی پزیشکی دادوەری قەزای کەلار کراوە”.

به‌وته‌ی قدوری، هێشتا دیارنیه‌ ئه‌و منداڵه‌ ساوایه‌ پێش دانانی له‌و شوێنه‌دا له‌ژیاندا بووه‌ یاخود نا.

فۆتۆ گه‌له‌ری

چاپکردن چاپکردن