“بەمانەوە یان هەڵاتن، مەترسی مردن هەر نزیك بوو”

March 27, 2017 at 5:58 pm

كەمپی حەمام عەلیل، ئەبو فەهد‌و منداڵەكانی دوای هەڵاتنیان لە بنكەی پێشوازی ئاوارەكان فۆتۆ: UNHCR

كەركوك ناو
دانیشتوانی موسڵ، لەبەردەم چەند بژارەیەكدان كە هیچ كاتێك ئاواتی بۆ ناخوازن، چونكە بە چڕبوونەوەی شەڕ‌و پێكدادانەكان مانەوەیان لە مردن نزیكیان دەكاتەوە‌و هەڵاتنیشیان، لەو رێگەیە مەترسیدارترە.

كۆمسیۆنی باڵای نەتەوە یەكگرتووەكان بۆ كاروباری پەنابەران، لە راپۆرتیكدا ئاماژەی داوە بەو مەترسییانەی روبەڕوی خەڵكی رۆژئاوای شاری موسڵ بۆتەوە، بەهۆی ئۆپەراسیۆنی كۆنتڕۆڵكردنەوەی لە ژێر دەستی داعش.

ئەبو فەهد (29 ساڵ)، باوكی پێنج منداڵە‌و لە گەڕەكی تنەك لە بەری راستی موسڵ نیشتەجێییە، دەڵێت “لە هەموو بژاردەكانی بەردەمماندا مەترسی مردن روبەڕومان دەبووەوە”، زیاتر وتی “بەمانەوەمان دەكەوتینە ژێر بۆردومانی ئاسمانی‌و تۆپباران، بە هەڵاتنیش ئەگەر هەبوو بكوژرێین، بەراستی بژادەیەكی زۆر قورس بوو”.

سەدان خێزان لە بەری راستی موسڵ، بەهۆی خراپی دۆخی مرۆیی‌و برسێتییەوە بە ناچاری ئاوارەبوون، سەرباری مەترسی زۆری رێگە‌و چەكدارانی داعش.

ئەبو فەهد، هەرچەندە مامێكی چەند رۆژێك لەمەوبەر لە كاتی ئاوارەبوونیدا بە فیشەكی قەناس كوژراوە، بەڵام ئەو رووداوە پەشیمانی نەكردەوە لە بڕیاری هەڵاتن.

“بۆ ماوەی مانگێك لە برسێتیدا بووین، پێموابوو ئەگەر بۆ ماوەیەكی زیاتر بمێنینەوە دەمرین”.

بەپێی ئامارێكی وەزارەتی كۆچ‌و كۆچبەرانی عیراق، ئاوارەكانی بەری راستی موسڵ گەیشتۆتە زیاتر لە 201 هەزار كەس‌و بەسەر كەمپەكاندا دابەشكراون، ئەوەش هاوكاتە لەگەڵ بەڕێوەچوونی ئۆپەراسیۆنی‌ كۆنتڕۆڵكردنەوەی‌ ئەو بەشەی شارەكە كە 19-2 دەستیپێكرد‌و تائێستا هێزە عیراقییەكان، چەند گەڕەك‌و ناوچەیەكیان كۆنتڕۆڵكردۆتەوە.

حەمام عەلیل، رۆژانە سەدان كەس بە پاس و بارهەڵگر دەگەنە كەمپی ئاوارەكان فۆتۆ: UNHCR

مریەم دەحام، یەكێكی ترە لە هەڵاتوانی بەری راستی موسڵ‌و دەڵێت ئەو گروپە چەكدارییانەی لە گەڕەكی تنەك باڵادەست بوون، دەیان مەدەنییان كوشتووە تا خەڵك چاوترس بكەن.

“نزیكەی 30 خێزانیان لەسێدارەدا كە پلانی هەڵاتنیان دانابوو، بینیم تەرمەكانیان لەسەر شەقام‌و ئەو قوتابخانەیە دانابوو كە خۆیانیان تێدا شاردبووەوە، ئەو خێزانانە پلانیان هەبوو بەشەو هەڵبێن بەڵام یەكێك هەواڵی لەبارەیانەوە دا‌و هەموویان كوژران”.

مریەم دەڵێت ئەو كارەی چەكدارەكان، تەنیا بۆ ئەوەبوو خەڵك بیر لە هەڵاتن نەكاتەوە بەرەو رووی هێزە عیراقییەكان.

ئەو ژنە كە بەشەو لەگەڵ نزیكەی 50 خێزانی تردا هەڵاتووە، دەڵێت “سەرباری هەموو هۆشدارییەكان، لەهەموو بارەكاندا روبەروی مەرگ دەبوینەوە، بۆیە بڕیارماندا هەڵبێین، رێگاكەش زۆر ماندوكەر بوو، چەند كاتژمێر دەبوو بەپێی بڕۆین”.

بەپێی ئامارێكی نەتەوە یەكگرتووەكان، ژمارەی‌ هاوڵاتی مەدەنی‌ لە بەری‌ رۆژئاوا (راستی)‌ شاری‌ موسڵ بە 750 بۆ 800 هەزار كەس دەخەمڵێنرێت‌و پێشبینی ئاوارەبوونی زیاتر لە 250 هەزاریان دەكرێت، هۆشداریش دەدرێت لەوەی ژیانیان لەمەترسیدایە بەهۆی پێكدادانەكانەوە.

ئەو خێزانانەی لەگەڵ مریەم‌و ئەبو فەهد هەڵاتوون، ئێستا لە بنكەی پێشوازی ئاوارەكانن لە كەمپی حەمام عەلیل كە هەفتانە هەزاران هاوڵاتی رووی تێدەكەن، ئەوان ئێستا بە ئومێدی ئەوەوەن شوێنێكیان بۆ مانەوە دەستبكەوێت تا ئەوكاتەی دەتوانن بگەڕێنەوە ماڵەكانی خۆیان.

ئەبو فەهد وتی “بەیارمەتی خوا بەمنزیكانە دەگەڕێیینەوە بۆ ماڵەكانمان، من زۆر گەشبینم كە هەواڵێكی دڵخۆشكەر بەمزوانە بە گوێمان دەگات‌و ناوچەكانمان بەتەواوەتی كۆنتڕۆڵدەكرێنەوە”.

هه‌واڵی دیكه‌..

فۆتۆ گه‌له‌ری

چاپکردن چاپکردن