یاریده‌ده‌ری پارێزگاری تێدایه‌
نه‌زاهه‌ ژماره‌یه‌ك لێپرسراوی كه‌ركوك ده‌داته‌ دادگا

كه‌ركوك، شه‌قامێكی سه‌ره‌كی له‌ نێو شاری كه‌ركوك فۆتۆ: كه‌ركوك ناو

كه‌ركوك ناو – كه‌ركوك

ده‌سته‌ی نه‌زاهه‌، فه‌رمانی ده‌ستگیركردن و بانگهێشتی بۆ ژماره‌یه‌ك لێپرسراوی كه‌ركوك ده‌ركرد، له‌ نێویاندا یاریده‌ده‌ری پارێزگار و قایمقامی پێشووی دوبز و سه‌رۆكی پێشووی زانكۆ، ئه‌وه‌ش به‌ چه‌ندین تۆمه‌تی جیاواز و به‌پێی یاسای سزادانی عیراق.

فه‌رمانگه‌ی لێكۆڵینه‌وه‌كانی ده‌سته‌ی نه‌زاهه‌، ئه‌مڕۆ چوارشه‌ممه‌ 20ی تشرینی دوه‌م له‌ به‌یاننامه‌یه‌كدا بڵاویكرده‌وه‌، فه‌رمانی بانگهێشتكردن ده‌ركراوه‌ بۆ یاریده‌ده‌ری پارێزگاری كه‌ركوك بۆ كاروباری هونه‌ری.

عه‌لی حه‌مادی، یاریده‌ده‌ری پارێزگار به‌پێی مادده‌ی 331 له‌ یاسای سزادان بانگهێشتكراوه‌.

بەپێی ئەو ماددەیە هەر فەرمانبەرێكی حكومی، پێشێلی ئەركەكەی خۆی بكات، یان كارەكەی جێبەجێنەكات، بەئەنقەست و لەپێناو زیانگەیاندن بە كەسانی تر، ئەوە بە زیندانیی و غەرامە یاخود یەكێكیان سزادەدرێت.

ده‌سته‌ی نه‌زاهه‌ له‌ به‌یاننامه‌كه‌دا ئاماژه‌ی به‌وه‌شداوه‌ فه‌رمانی بانگهێشتكردن بۆ هه‌ریه‌ك له‌ سه‌رۆكی پێشووی زانكۆ، یاریده‌ده‌ری زانستی سه‌رۆكی زانكۆ، راگری پێشووی كۆلێژی یاسا و سه‌رۆكی به‌شی یاسا ده‌ركراوه‌.

له‌چوارچێوه‌ی لێكۆڵینه‌وه‌كانی تری نه‌زاهه‌دا، فه‌رمانی ده‌ستگیركردن بۆ قایمقامی پێشووی دوبز ده‌ركراوه‌، به‌پێی مادده‌ی 332 له‌ یاسای سزادان.

به‌پێی ئه‌و مادده‌ یاساییه، هه‌ر فه‌رمانبه‌رێك یان راسپێردراو به‌ خزمه‌تی گشتی كه‌سێك ده‌ستگیربكات یان ده‌ستبه‌سه‌ری بكات له‌ بارودۆخێكی نایاساییدا، ئه‌وا سزاده‌درێت به‌ زیندانی تا حه‌وت ساڵ و ئه‌گه‌ر تاوانه‌كه‌ به‌ جلوبه‌رگی فه‌رمییه‌وه‌ بوو، ئه‌وا سزاكه‌ ده‌گاته‌ 10 ساڵ زیندانی.

هه‌ر له‌ به‌یاننامه‌كه‌ی ده‌سته‌ی نه‌زاهه‌دا هاتووه‌، فه‌رمانی ده‌ستگیركردنی بۆ 10 لێپرسراوی كۆگاكانی سه‌ر به‌ كۆمپانیای به‌رهه‌مه‌ نه‌وتییه‌كان له‌ كه‌ركوك ده‌ركراوه‌، ئه‌وه‌ش له‌ نێوان ساڵانی 2015 تا 2018، به مادده‌ی 349 له‌ یاسای سزادانی عیراقی.

به‌پێی ئه‌و مادده‌یه‌ هه‌ر كه‌سێك به‌ ئه‌نقه‌ست و له‌رێی نقومكردنه‌وه‌ مه‌ترسی له‌سه‌ر ژیانی خه‌ڵك دروستبكات به‌ 15 ساڵ زیندانی سزاده‌درێت، ئه‌گه‌ر ئه‌و روداوه‌ ببێته‌ هۆی مردنی كه‌سێك سزاكه‌ ده‌گاته‌ له‌ سێداره‌دان، ئه‌گه‌ریش زیانی زۆر به‌ ماڵ و سامانیان بگه‌یه‌نێت سزاكه‌ی زیندانی هه‌تاهه‌تایی یان كاتییه‌.

ده‌سته‌ی نه‌زاهه‌ ئاشكرایكردووه‌ له‌ سه‌ره‌تای ئه‌م مانگه‌وه، 60 فه‌رمانی ده‌ستگیركردن و بانگهێشت بۆ ئه‌ندامانی په‌رله‌مان و لێپرسراوانی ناوخۆیی ده‌ركراوه‌، به‌ تۆمه‌تی گه‌نده‌ڵی و زیانگه‌یاندن به‌ سامانی گشتی.

  • FB
  • Instagram
  • Twitter
  • YT