د.شوان ئادەم ئەیڤەس مامۆستای بەشی راگەیاندن و سەرنوسەری گۆڤاری دەرگاوان، بە سێ مانگ بەندكردن سزادرا، ئەوەش بە بڕیاری دادگای سلێمانی و لەسەر پرسیارێكی تاقیكردنەوەكان.
د.شوان ئادەم دووشەممە 3ی حوزەیران و لە دادگای كەتنی سلێمانی/دوو، سزادرا، لەسەر پرسیارێكی تاقیكردنەوەی وانەی ئیتیكی میدیا بۆ خوێندكارانی قۆناغی دووەمی بەشی راگەیاندنی زانستە مرۆڤایەتییەکانی زانكۆی هەڵەبجە لە وەرزی خوێندنی 2020 – 2021.
لە پرسیارەكەدا نمونەی كۆمەڵێك مانشێتی هەواڵی میدیای كوردی هێناوەتەوە، تاوەكو خوێندكارەكان راست و هەڵەكانی لەڕوی ئیتیكی میدیاییەوە دیاری بكەن، ئەوەش بەپێی وتەی كارمەند عەبدوڵا، پارێزەری شوان ئادەم ئەیڤەس.
لە یەكێك لە پرسیارەكاندا ئاماژە بە مانشێتی هەواڵی یەكێك لە میدیاكان كراوە – بەبێ ناوهێنانی میدیاكە- و تیایدا نوسیویانە "(....) بووە بە لەشفرۆش"، بەو هۆیەوە ئەو كەسەی دەزگاكە ناوی هێناوە و لە پرسیاری مامۆستاكەشدا دوبارەبۆتەوە، سكاڵای لەسەر د. شوان ئادەم ئەیڤەس تۆماركردووە. ناوی كەسەكە لای (كەركوك ناو) پارێزراوە.
كارمەند عەبدوڵا، بە (كەركوك ناو)ی وت "پرسیارەكە بە فیلتەری لیژنەی تاقیكردنەوەكان و ئەنجومەنی كۆلێژ و زانكۆشدا تێپەڕ بووە، پرسیارەكە تەنیا هێنانەوەی كۆمەڵێك نمونەی زیندوو بووە بۆ خوێندكاران، تاوەكو راست و هەڵەی مانشێتەكان لەڕوی ئیتیكی-یەوە هەڵبسەنگێنن، ئامانج لێی تەنیا پرۆسەی فێربون بووە و هیچی تر".
پرسیارەكە تەنیا هێنانەوەی كۆمەڵێك نمونەی زیندوو بووە بۆ خوێندكاران، تاوەكو راست و هەڵەی مانشێتەكان لەڕوی ئیتیكی-یەوە هەڵبسەنگێنن
پرسیارەكان دوای ئەنجامدانی تاقیكردنەوە لە خوێندكارەكان وەرنەگیراونەتەوە، دواتر تەنیا ئەو بڕگەیەی باسی سكاڵاكەری تیایە، لە ژمارەیەك پەیجی سۆسیال میدیا بڵاوكراوەتەوە و لە بەشێكیدا سوكایەتی بە شوان ئادەم ئەیڤەس كراوە، بەڵام ناوبراو هیچ سكاڵایەكی لەسەر ئەو پەیجانە تۆمارنەكردووە.
كارمەند جەختیكردەوە "تەنانەت د. شوان وایزانیوە ئەو كەسەی لە مانشێتەكەدا ناوی هاتووە، ناوەكەی خوازراوە"، ناوی كەسەكە لای (كەركوك ناو) پارێزراوە.
دادگای بەپێی ماددە 433/ێ لە یاسای سزادانی عیراقی حوكمەكەی دەركردووە.
كارمەند وتی "سزای سێ مانگ بەندكردن بۆ د. شوان دەركراوە، بەڵام بە وەستاندنی جێبەجێکردنی سزاکە بەو مەرجەی بەڵێننامە پڕبكاتەوە كە بۆ ماوەی سێ ساڵ لە رۆژی دەرچونی ئەم بڕیارەوە كارێكی هاوشێوە ئەنجامنەدات".
بەپێی زانیارییەكانی (كەركوك ناو) سكاڵاكەر تەنانەت سكاڵای لە هیچ یەكێك لەو دەزگایانە نەكردووە، كە ناوی ئەویان لە هەواڵ و مانشێتەكانیاندا هێناوە.
د. شوان ئادەم ئەیڤەس، هاوكات سەرنوسەری گۆڤاری دەرگاوان – گۆڤارێكی تایبەتمەندە بە پەروەردەی میدیایی – و سەرۆکی رێکخراوی چاودێریی میدیای کوردیی (چمک)ە، ئەزمونی 20 ساڵ كاری رۆژنامەوانی هەیە.
تۆڕی ئەکادیمیی کوردیی – تۆڕێكی سەربەخۆیە و لەلایەن كۆمەڵێك ئەكادیمیست-ەوە دامەزرێنراوە-، لە راگەیەنراوێكدا لەسەر ئەو كەیسە دەڵێت "سزادانی لەسەر بڕگەکانی پرسیاری تاقیکردنەوە و لە پای هێنانەوەی نمونەی زیندوو لە هەواڵ و بابەتی رۆژنامەوانیی میدیای کوردیی؛ بە پێشلکارییەکی زەق و دیاری ئازادییەکانی دەربڕین و رۆژنامەگەریی و ئەرک و مافی کارکردنی ئەکادیمیی و ئەکادیمییانی کوردستانی دەزانین. لەو سۆنگەیەوە و وێڕای رەتکردنەوەی بڕیارەکەی دادگای کەتنی دوی سلێمانی؛ داواکاریین هەموو ئازادییخوازان لە ناوەوە و دەرەوەی کوردستان بێنەسەر خەت و گوشار بۆ تێهەڵچونەوەی سزاکە و هەڵوەشاندنەوەی بڕیارەکە بکەن".
هەروەها هاتووە "ئەگەر ئەم بڕیارە هەڵنەوەشێتەوە؛ ژیان و ماف و ئازادییەکانی هیچ ئەکادیمییەکی کورد و کوردستان پارێزراونابێت و بە ناچاریی دەبێت دەست لە هێنانەوەی نمونەی زیندوو لە پرۆسەی پەروەردە و فێرکردن یاخود کنە و پشکنین و توێژینەوەی وردی زانستیی هەڵبگرن، وەگەرنا بۆ باسکردنی خەوشییەکانی کورستان، دەبێت بە زمانی جەستە یاخود نمونە لە وڵات و کولتور کەلەپوری دیکە وەربگرن".
ئەگەر ئەم بڕیارە هەڵنەوەشێتەوە؛ ژیان و ماف و ئازادییەکانی هیچ ئەکادیمییەکی کورد و کوردستان پارێزراونابێت
نوێنەری وەزارەتی خوێندنی باڵا و سەندیكای رۆژنامەنوسانی كوردستان لە دانیشتنەكەی دادگا ئامادەبون، بەهۆی ئەوە حوكمدراو ئەندامی سەندیكای رۆژنامەنوسانە.
عەباس ئەكرەم، وتەبێژی وەزارەتی خوێندنی باڵا و توێژینەوەی زانستی هەرێم، وتی "من ئاگاداری ئەو بڕیارەی دادگا نیم، نازانم كەیسەكە چییە و چۆنە".
د. شوان ئادەم ئەیڤەس ئامادەنەبوو لەسەر بابەتەكە قسە بكات، ئەوەش بەهۆی ئەوەی وەك خۆی وتی تا تانەی لێدەدەن نایەوێت قسەی لەسەر بكات. بەڵام پێشتر لەكاتی دادگایكردنی لە رونكردنەوەیەكیدا دەڵێت "پرسیارەكە لەسەر بنەمای ئەو زانیاریی و ھەواڵ و بابەتانە ھێنراونەتەوە کە پێشتر لە میدیای کوردییدا بڵاوکراونەتەوە. ئامانج لەوەش ئەوەیە کە خوێندکاران باشتر لەپێشێلکاریی پێوەرەکانی رێسای پیشەیی راگەیاندن تێبگەن و جیایی بکەنەوە کە چ بابەتێک لەڕوی پیشەییەوە رێگەپێدراوەو چ بابەتێکیش رێگەپێنەدراوە لەمیدیاکاندا بڵاوبکرێتەوە".
كارمەند عەبدوڵا، پارێزەری د، شوان وتی "حوكمی دادگا دەرچووە، بەڵام هێشتا نەنوسراوەتەوە، لەگەڵ نوسینەوەی حوكمەكەدا تانەی لێدەدەین".
