خاچ و كورسی و كەرەستەكانی دیكەی ناو كڵێسای مارعودیشۆ، بەردەوام بریقەیان دێت لە خاوێنیدا و بە بیری كەسدا نایەت، كە ئەو شوێنە دوو دەیەیە پەرستشی تیادا نەكراوە.
21 ساڵی رەبەقە كڵێساكە چۆڵە، بەڵام هیچ كاتێك دەرگاكەی دانەخراوە و خێزانێكی ئێزیدی، خۆبەخشانە خزمەتی دەكەن وەكو ئەو ساڵانەی خودی كریستیانەكانی تێدا بوو.
كڵێسای مارعودیشۆ دەكەوێتە كۆمەڵگەی نسرێی ناحیەی ئەلقوش (40كم باكوری موسڵ). كۆمەڵگەكە رۆژانێك زێدی بەشێك لە كریستیانەكانی دەشتی نەینەوا بوو، تا لە ساڵی 2003ـدا دوایین كەسیان بە یەكجاری ناوچەكە و كڵێساكەشیان بەجێهێشت.
لەوكاتەوە تائێستا، وا بوو بە 21 ساڵ، خێزانەكەی شەهناز برایم، بە هاوسەر و منداڵەكانیەوە هەفتەی دووجار، هەموو یەكشەممە و پێنجشەممەیەك كڵێساكە خاوێن دەكەنەوە و ناهێڵن تەپوتۆزی لێبنیشێت، "ئەم كارە بێبەرامبەر بۆ خوا دەكەین و هیچ نیەتێكی ترمان نییە" شەهناز، بۆ (كەركوك ناو) وای وت.
پاككردنەوەی كڵێساكە، لە باوك و خوشك و برا و كەسوكارەوە بۆ ئەو خێزانە بە جێماوە، هەرچەندە ئەوان ئێزیدیین و لە ئایینێكی جیاوازن.
وائیل چیچو خودێدا (32 ساڵ)، هاوسەری شەهناز وتی "هەمومان لەم ناوچەیە دەژین و جیاوازیمان نییە، ئەمەی دەیكەین، باشترین نمونەی پێكەوەژیانی ئایینیی و قبوڵكردنی یەكترییە" ئەو دەڵێت چەندین ساڵە كەسوكاری چوونەتە دەرەوەی وڵات و هەڵمەتی پاككردنەوەی كڵێساكە، بۆ خێزانەكەی ئەو ماوەتەوە، "دایك و باوكم بەردەوام ئامۆژگارییان دەكردم و وەسیەتی ئەوانە هەر چاوم لە كڵێساكە بێت".
كۆمەڵگەی نسرێی، شوێنی كڵێساكە، كەمتر لە هەشت كیلۆمەتر لە ناوەندی ئەلقوشەوە دوورە و لە رابردودا دانیشتوانەكەی تەنیا كریستیان بوون، بەڵام 21 ساڵە كریستیانی تێدا نەماوە و ئێستا تەنیا ئێزیدی تێدایە، كە 500 خێزان دەبن.
"هەفتانە دووجار سەردانی کڵێساكە دەكەین بۆ خاوێنكردنەوە، هەر ئەوەش نییە، هەر شتێكی تری پێویست بێت دەیكەین، بۆ نمونە ئەگەر گڵۆپێكی بسوتێت دەیگۆڕین" خودێدا وادەڵێت، هەموو كەرەستەكان، لە نێویاندا ماددەكانی پاككەرەوە لە گیرفانی خۆیان دەیكڕن.
وائیل و شەهناز كچێك و كوڕێكیان هەیە، بە خێزانی دەچن بۆ كڵێسا، ئەو دوو رۆژەی هەفتە زیاتر لە هەڵمەتی پاككردنەوە دەچێت بەراورد بە رۆژەكانی تر، وەكو ماڵی خۆیان، یەكێك سەرقاڵی رێكخستنەوە و سڕینەوەی كورسییەكانە، یەكێكی تر وێنەكان دادەگرێت و بە پارچەیەك پەڕۆ وایلێدەكات تا بریقە دەداتەوە، هەر جارێك زیاتر لە دوو كاتژمێر دەمێننەوە.
"هەموو شتێکی کڵێساكە خاوێن دەكەینەوە، لە خاچ و كورسی و شوێنی نوێژەكەوە تا بەشەكانی تر، تەنانەت ناو حەوشەكەش پاك دەشۆین" شەهناز برایم، وتی هیچ هەفتەیەكیان بەبێ سەردانیی كڵێساكە بەڕێنەكردووە.
كڵێسای مارعودیشۆ، مێژوی بنیاتنانی دەگەڕێتەوە بۆ ساڵی 1712ـی زایینی، یەكێك بووە لە پێگە ئایینییە گرنگەكانی ناوچەكە بۆ كریستیانەكانی نەینەوا، هەولێر و دهۆك و زۆر شوێنی تر، لەوێ هەر ئەو كڵێسایە و مەزارگەیەكی ئێزیدیی هەن.
وائیل چیچو خودێدا وتی "ئەگەر مزگەوتێکیش بوایە، بەهەمانشێوەی کڵێساكە چاودێریمان دەكرد و خاوێنمان دەكردەوە، هیچ جیاوازی نییە لای ئێمە، مادام شوێنێكی ئایینییە كەواتە پیرۆزە و وەكو چاوی خۆمان دەیپارێزین، وەك ئێزیدی جیاوازی لە نێوان ئایینەكاندا ناكەین و ئەوەش موڵكی كریستیانەكانە كە پێویستە بیپارێزین".
ژمارەی كریستیانەكان بۆ 250 هەزار كەس كەمبۆتەوە كە زۆرینە لە هەرێمی كوردستانن، لەكاتێكدا پێش ساڵی 2003 دەگەیشتنە ملیۆن و نیوێك، بەپێی ئامارێكی كۆمسیۆنی باڵای مافەكانی مرۆڤ لە عیراق.
